Mattaayo 23 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Yeesso ꞌdooꞌd tagaammeti amurre ichoow Faarissayo katootoocha

¹ Yeesso saahka wihi us urur ichoow abattitiis ba iyidah,

² “Tagaammeti amurre ichoow Farissaayo ba antohi icho amurre Muusa enenyet kaabchaan a khabaan.

³ Maantaka wihi icho atin idowaan nabah isuda, toro la yeela, iꞌdaasenyi wihi icho yeelaan ayeelina, iꞌdi tahe icho wihi icho cheekaan ma raahaan.

⁴ Icho huleesi buurenye atin kararaane adah atin korchaane, iꞌdaasenyi icho rubeycho far ma okkhichaane enenyet ma leekhabtaan.

⁵ “Wihi iche yeesso tuumman a yeessa, ꞌdee enenyet arga. Saabohi balballaaddane miinan ichoow keymo kahiitaan. Saabassaas la Chiirnaanneti Waakhe goya kakhabaan.

⁶ Sukuukuyyo ka ichohi inti weyti lakiinkaanyito koorronti ꞌdoonaane, minassi weysiite Yaꞌhuud ka la komborohi weynaaneete ꞌdoonaan.

⁷ Sokkoyyo ka la ichehi weyti inkaanyit ka labariiticho, enenyet tuumman, ‘Eti weenoow,’ idowo iche ꞌdoonaan.

⁸ “Iꞌdaasenyi uus, ‘Eti ween,’ atin liidowin. A mehe Kamuriin a koo kaldach one, atin la a ꞌdooꞌdi yaaftoo kaldach.

⁹ Harrata ka la etoo kalday laka, ‘Aabba!’ iidaahana. Iꞌdi tahe Aabbahoo kaldache serey jiro on khabtaan.

¹⁰ Toro la uus, ‘Eti ween,’ atin liidowin, iꞌdi tahe atin wohoo kaldache titaaheene, eti atin iween la a koo one, ulla a Ki Lasubhe.

¹¹ Eti goytiin ka weyti ween, a falfatiinna.

¹² A mehe eti tuummane isweynaacho a lanuglaacha, eti tuummane isnuglaacho la a laweynaacha.”

Yeesso tagaammeti amurre ichoow Farissaayo hukkuma

¹³ “Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Atin aritti dakhi goobi Waakhe ꞌdooꞌd kahiddaane, atin rubeytiin la goobi Waakh ma gessaane, toro la ꞌdooꞌdi gelin ꞌdoono kajeyissaan.

¹⁵ “Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Atin harra tuumman ichoow beyohi burbuurenye tabtaane, ꞌdee etoo kalday wihi ꞌdooꞌdi Yaꞌhuud wahti iurgiyissaane, chuꞌus atin sooraahe ka, weyti ꞌdirihiin baabiissaan. Saggi atin meessi ꞌdabi armaanjireen iirattaan u, etaas laka ꞌdirihiinna baabiissaane meessi ꞌdabi armaanjireen irta.

¹⁶ “Atinha indolaaye ꞌdooꞌd angaamissaan, sinati atin sugto eenna a buure! Atin, ‘Chirri etoo daatte, minki Waakhe buure wahe laka a walahba on,’ iche elattaan. Iꞌdaasenyi ‘Chirri etoo ꞌdahabi minki Waakhe buure kadaatte, wihi us kadaatte a buuhicho,’ iche elattaan.

¹⁷ ꞌDalammeti indo laa! Mehe khumman, ꞌdahab a, bal minki Waakhe buurenye ꞌdahabaas munyaacho?

¹⁸ Toro wihi addane atin ꞌdooꞌd abissaan a mehe ya, ‘Chirri etoo chalagti hoola lakasoorriyoocho kadaatte, daatotiis a geeddi lajebcho, iꞌdaasenyi chirri etoo wihi us Waakh siicho kadaatte, wihi us kadaatte a buuhicho.’

¹⁹ Indomeleyyo! Mehe khumman, wihi us Waakh siicho bal chalagti wihi us Waakh siicho munyaasso? Chalag on khumman!

²⁰ Toollaka eti tuummane chalag kadaatti, chalag ichoow wihi tuummane sarche fuulo iche kadaatta.

²¹ Eti minki Waakhe buure kadaatti la minki Waakhe buure ichoow Waakkhi goya fiddiyo iche kadaatta.

²² Eti goobi Waakh kadaatti la, komborti Waakhe antoot ichoow Waakkhi kafiddiyo kadaatta.

²³ “Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Iꞌdi tahe atin wihi ikhummaneynane iꞌdi geeyohi golol haaggicho iꞌdi maanta nyaaykee ichoow bisaaree ka, Kamur gisi tomonnaatteet a ibihissaan. Iꞌdaasenyi wihi amurre ka wihi weyti khumman liiekkaacho a ꞌdiisseen. Waha a iꞌdi maanta ꞌdooꞌdi jiti fissan ka lahukkumo ichoow uurnugleel ichoow atinhi ꞌdooꞌdi lakakhuufo tateehiin a ꞌdiisseen. Kamur gisi tomonnaatteet ibahcha iꞌdaasenyi wahanyeyyohi weyti khumman aꞌdiinna.

²⁴ Atinha indo laaye toro ꞌdooꞌd angaamissaan, atin dahassihi bicchehi atin tabhuubiin goya kajiro taartaane iꞌdaasenyi naffi gaal khorkhissaan!

²⁵ “Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Atin kokkoob ichoow baakhuul khariissa dikhtaane, iꞌdaasenyi gololi goytiin kijiro a wihi atin ꞌdamaam ka ꞌdooꞌd sarteen.

²⁶ Atinha Farissaayo indo laa, koloo uurassiin goya dikha, ꞌdee wahanyeyyoha kharaat laka biꞌdir a bahaanee.

²⁷ “Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Atin a iꞌdi hawwaalohi sarcho riingihi dakhan lakadowe, kharicho haagganyahe, iꞌdaasenyi goya lafohi ꞌdooꞌdi tuume ichoow wahanyeyyohi biꞌdirenye buuha.

²⁸ Atin laka iꞌdaasu, chaꞌatin laargo ꞌdooꞌdoo fiffissane iyoogtahiine, ugoka uuriin goyaka, atin a ꞌdooꞌdi iskaayyeelo toro hugunꞌdarri kaassohti.

²⁹ “Atinhi tagaammeti amurree ichoow Farissaayo ba, iskaayyeessooy, sinati atin sugto eenna a buure! Atine goꞌddassi enenyet lakahawwaalo ꞌdooꞌdi Waákh íyeyyeedo idissaane, toro hawwaalohi ꞌdooꞌdi fiffissan eykoddaan.

³⁰ Atin mehe elattaan ya, ‘Kootte maanti goorat aacchinyeteen jirte jirre ka, diiggi ꞌdooꞌdi Waákh íyeyyeedo icho khubeen ma leegello.’

³¹ Atin ꞌdeerka ꞌdooꞌda goorat ꞌdooꞌdi Waákh íyeyyeedo bakkiche a aacchinyetaanya elattaane, iꞌdaas ka la saggi atin rubeytiin uskeel iyeessaane cheektaan.

³² Maantaka taba atin laka iꞌdi aacchinyetiin u, uskeelaas inti icho dabarroocheen buuhicha.

³³ “Atinha iꞌdi toofafe! Dessi toof! Saggoh meessi ꞌdabi armaanjireene Waakh atin igooche ikabahsattaan?

³⁴ Maantaka, ꞌdooꞌdi Waákh íyeyyeedo a atin isooerga, ꞌdooꞌdi kharayyee ichoow ꞌdooꞌdi jiti Waakh enenyet abcho a atin isooerga. Atin la gaasichekoo a tagiisiine, gaasoo laka massalaaba kakaahtaane, gaasoo laka minassiinki weysiite Yaꞌhuud ka jahtaane, gaasoo laka kolba ilkerengeettoo ka sina omhissaan.

³⁵ Jeentetaas u la, diiggi ꞌdooꞌdi fiffissane harra kakhubte tuumman berri atine atin fuula, uus diig Aabelhi fissan lakasookhabti ichoowka ínam Barachiiyahi magahiis Sakkariiya layadeeh. Ulla minki Waakhe buure ichoow chalagti hoola lakasoorriyoocho dahchooda dubunuunu kayigaaseen. Atin laka uskeelaas a leegesseen gon.

³⁶ Rume atin icheeka, waha tuumman ꞌdooꞌdi iꞌdee iche lakahukkuma.

Yeesso ilkerengeetti weene Yeerusaleem ooya

³⁷ “Yeerusaleemoow, ilkerengeetti weenoow, atin ꞌdooꞌdi Waákh íyeyyeedo a tagiisiine, ꞌdooꞌdi Waakh atin isooerge la dagah kachibtaan. Saggi orran lukki weylassiis barbarre goya igessatuu, an geeddi buurenye anihi dahanoheey atin koogoogo ꞌdoone, iꞌdaasenyi atin ma ꞌdoonin.

³⁸ Yeya, Waakh rubeytiis minki Waakhe buurenye kiine a kaguure, minki marah kalday atin ikatabe.

³⁹ A mehe wihi an atin icheeko, yombuu toro ma iargartaane ichoowka, ‘Waakh ki magahi Kamur kayamiit a imaale,’ tadeehiin.”