Hilassi Ergaano 18 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Baawulo ilkerengeetti Koriinto ka Wori Haaggan cheeka

¹ Inkoo waha kuteen ka Baawulo ilkerengeetti Aaꞌden kabahe ilkerengeetti Koriinto irte.

² Intaas ka etoo Yaꞌhuude Akiila layadeehe ili Boontus kadesse ꞌhele. Ulla makhaabassiisti Birisiila layadeeh khabaayi, ili ꞌDeylaane kayimiy, a mehe karnati ilaase Kilaawudiyo layadeeh, iche eti Yaꞌhuude tuumman ilkerengeetti weene Rooma a kabaho yidah. Baawulo icho sooyeyin irte,

³ jeenteti us iꞌdichuu eemayyo itolo khookhaani isikayowtuu la, icho geeddoo leefiddiye toro la hil leehaaggiche.

⁴ Seeri Lanaso tuumman la minki weysiite Yaꞌhuude irte ꞌdooꞌdi Yaꞌhuud ichoow ꞌdooꞌdi Yaꞌhuud ieheynan, wori Waakh icheeke anki Waakh isoojiite.

⁵ Maanti Siila ichoow Timooti ili Makedooniya kayimaateen ka, Baawulo Yeedi Waakhe us cheeko kalday miinsate, ꞌdooꞌdi Yaꞌhuud saggi Yeesso rumanka Ki Lasubhe iyahe icheeke.

⁶ Iꞌdaasenyi chirri ꞌdooꞌdi Yaꞌhuud Baawulo tirrime icho usu leeabaarrameen ka, ebeeri darfohiis ijillaanjilliche saggi icho ikhufeen tuse. Wihi us iyidah, “Chirri atin baabaateen, atin on awtiin u isooya. Ani walah liiworsati mele. Uus toolla kakhabatti, an yaafohi Yaꞌhuud ieheynane iirda.”

⁷ Baawulo ꞌdeerka minki weysiit kabahe, minki etoo Tiitiyo Yaasto layadeehe minkiis minki weysiit khuccho irte. Eta la a etoo weyti Waakh karooro.

⁸ Eti Kiriisbo layadeehe minki weysiite Yaꞌhuud itoollo la, usu ichoow minkiis ba Kamur a rummeesteen. ꞌDooꞌdoo ittaawenye ilkerengeetti Koriinto kajiro Baawulo daage la, Kiriisto rummeeste, labaattissiye.

⁹ Ibeenkooka Kamur Baawulo fooltabcho ka leeyyeede wihi us iyidah, “ꞌDooꞌda akaroorin, leeyeyyeede, waha at haaggisso la aꞌdiin.

¹⁰ Wihi tahe an a kileejira. Et wohoo kiyeelo la mele, iꞌdi tahe ilkerengeetta ka ꞌdooꞌdi ittaawe a kaaya.”

¹¹ Ulla goycho guꞌhoo ichoow hay lih fiddiye Yeedi Waakh abche.

¹² Maanti Gaalliyo ili Akhaaya iweynaate ka, ꞌdooꞌdi Yaꞌhuud tuumman yimiyye Baawulo khabte, kootiin ortiis geecheen.

¹³ Icho la wihi icho yidaaheen, “Eta jitoo amurre buusane ꞌdooꞌd Waakh kawahda idowa!”

¹⁴ Chirri Baawulo yeedin leheet ka, Gaalliyo ꞌdooꞌdi Yaꞌhuud leeyeede, wihi us iyidah, “Chirri atinhi Yaꞌhuude kootte waha uskeeloo layeele tahe ommos wohoo suuje tahe, a geeddi an nabah atin isudo.

¹⁵ Iꞌdaasenyi waha a iriir ichoow magahenye ichoow yeedassi amurretiinna one, atin on haaggicha. An wahanyeyyohi iꞌdaase ka enenyet hukkumin ma ꞌdoono.”

¹⁶ Ulla ꞌdeerka kootiin goya ꞌdooꞌd kasoobahche.

¹⁷ Geeddi icho isoobahin, icho tuumman eti minki weysiite Yaꞌhuud itoollo Soosteena layadeeh khabteene, kootiin ortiis ka jaheen. Iꞌdaasenyi Gaalliyo wahaas ma ibaalin ba.

Baawulo toro meelassi ittaawe irta

¹⁸ Baawulo ilkerengeetti weene Koriinto ibeennetoo fiddiye. Saahka ꞌdooꞌdi Kiriisto rummeeste katabe, Akiila ichoow Birisiila khabaayi kooban ka boroofenhi Siiriya ikahe. Geeddi us kooban igelin, ilkerengeetti Kenkereeya ka matah lahaaꞌde, a mehe ibeenneti us Waakh idaatte a massatte.

¹⁹ Chirri icho ilkerengeetti Efeesso yimaateen ka, Baawulo Birisiila ichoow Akiila intaas katabe. Baawulo minki weysiite Yaꞌhuud irte, ꞌdooꞌdi Yaꞌhuud leehawwooche.

²⁰ Chirri icho usuhi geeddoo leefiddiyo daaheen ka, fiddi ꞌdiiꞌde.

²¹ Iꞌdaasenyi chirra us kaho ka, “Chirri Waakh ꞌdoono a atin isoonokhda,” iyidahye, kooban kore ilkerengeetti Efeesso kabahe.

²² Chirri us ilkerengeetti Kaaysareya yimiy ka, kooban kasooyege ilkerengeetti weene Yeerusaleem irte urur Kiriisto bariitiche, ꞌdeerka ilkerengeetti Antiyookhiya ikhubte.

²³ Inkoo us geeddoo intaas fiddiye ka, irte ili Galaatiya ichoow ki Furiijiya tabe abatti faajjiye.

Aboollo ilkerengeetohi Efeesso ichoow Koriinto ka Wori Haaggan cheeka

²⁴ Etoo Yaꞌhuudenye ili Alekisaandariya kadesse Aboollo layadeeh la ilkerengeetti Efeesso yimiy. Ulla a etoo af ka miigenye weyti Chiirnaanneti Waakh laka garti.

²⁵ Usu jiti Kamur ka a lawaaniche, uuriis tuumman ka yeyyeede, wori Yeesso miinsan mujjum ꞌdooꞌd abche. Iꞌdaasenyi baattissiyoti us garti tuumman a baattissiyo Yoohana on.

²⁶ Ulla minki weysiite Yaꞌhuud ka ꞌdooꞌd roorro laan leeyyeede. Chirri Birisiila ichoow Akiila usu daageen ka, khaateene minkicho ka mujjum jiti Waakh idowdoween.

²⁷ Maanti Aboollo ili Akhaaya ikahin ꞌdoone ka, ꞌdooꞌdi Kiriisto rummeeste ilkerengeetti Efeesso kijiro usu uur miigooche, abattiti intaas kijirto khadaab ichiireene, ꞌdee etaas a martiisteen. Maanti us intaas eleele ꞌdooꞌdi haaggi Waakhe buurenye inno imunneynan ka Kiriisto rummeeste weyti gargaare.

²⁸ A mehe us chirri us ꞌdooꞌdi Yaꞌhuud enenyet tuumman ortiis ka leehawwoocho, af ka a kahataate, Chiirnaanneti Waakh ka, saggi Yeesso rumanka Ki Lasubhe iyahe tuse.