Bakkaahit 16 - Wori Haaggane Yeesso Kiriisto Miinsan Ayyinti Husube Waakh Enenyet Igooche

¹ ꞌDeerka hooyoo buurenye minki Waakhe buure goya kasooyeede herti Waakhe teebee leeyeede daage, wihi us iyidah, “Nyaama, irda, holi Waakhe baakhuulleti teebee kijiro, harra kakhuba!”

Baakhuuli oraate holi Waakhe jiissi uskul keeno lasookhuba

² Herti Waakhe oraat la iratte, wihi baakhuliche kijire harra kakhubte. Jiisohoo uskule weyti bolokhe ꞌdooꞌdi sumatti binaat khabo toro iyookkoti binahaas wahte sar kasoofoofeen.

Baakhuuli lammaatteete holi Waakhe bey diig kayeelo lasookhuba

³ Herti Waakhe lammaatteet wihi baakhuuliche kijire beyti buure kakhubte. Bey tuumman iꞌdi diiggi eti yumuy titahye, wihi goya kijiro rubey khabo tuumman la tuumeen.

Baakhuuli seyyahnaatteete holi Waakhe hawo ichoow indohi biccheet diig kayeelo lasookhuba

⁴ Herti Waakhe seyyahnaatteet la wihi baakhuuliche kijire hawohi ꞌdulo ichoow indohi biccheet kakhubte. Icho la urgiyeene, diig yitaaheen.

⁵ ꞌDeerka herti Waakhe bicche itolosso ichehi waha elatti daage, “Atihi Munyee, ki toolla jiro, goorat tuumman laka jire, at a fissantahe jeenteti sinayyoha at ꞌdooꞌdi ati kigaran ikagoosse u.

⁶ A mehe icho diiggi ꞌdooꞌdaah ichoow ꞌdooꞌdi kiyeyyeedo harra ikhubeene, at la diiggi icho damaane siisse. Waha a wihi rumanka icho imale.”

⁷ Ani la hooyoo koondihi gaꞌdaar ka sooyeede daage, “Aa, Kamuri Waakhenye Miig Tuumman Leh, hukkunka at ꞌdooꞌd igoosse a wihi rummaate toro fissan.”

Baakhuuli affarnaatteete holi Waakhe enenyet gubo lasookhuba

⁸ Herti Waakhe affarnaatteet wihi baakhuuliche kijire orrah kakhubte. Orrah la miigti iche ꞌdab ka enenyet weyti gubto lasiiche.

⁹ Kuleeli weyti buure enenyet gube, icho la magahi Waakkhi sinayyoha khuccho igafeen. Iꞌdaasenyi icho uskeelicho kasoonokhan ichoow Waakkhi icho weynaachaan ꞌdiiꞌdeen.

Baakhuuli channaatteete holi Waakhe mugꞌdi ichoow bolokh keeno lasookhuba

¹⁰ Herti Waakhe channaatteet wihi baakhuuliche kijire komborti antoote too binahi oraate kakhubte. Harrati binaha dakhtaan tuumman la mugꞌdi kalday titah. Jeenteti bolokkhi uskul u enenyet harrabbe iskhaniine.

¹¹ Toro la jeenteti bolokkhichoki uskul ichoow jiissichuu, Waakkhi goobi Waakh igafeen. Iꞌdaasenyi wihi icho yeelaan ma kasoonokhan ba.

Baakhuuli lihnaatteete holi Waakhe hawti buurenye Yuufereet angagicho lasookhuba

¹² Herti Waakhe lihnaatteet wihi baakhuuliche kajire hawti buurenye ꞌdusso Yuufereet kakhubte, bicchehiche angageene, ꞌdee karnatohi beri kayamiit jit iyeessa.

¹³ Ani la ꞌdeerka ginna seyyah rah iyoog arge. Too afi khorojebsi goya kasoobahte, too la afi binahi oraate goya kasoobahte, ti addan la afi eti eti Waákh íyeyyeedo iskaayyeelo goya kasoobahte.

¹⁴ Icho a rubeyohi ginnayyohi girmo tuso. Ginnayyoha karnatohi harra tuummane iirtaane, ꞌdee ibeenki weene Waakkhi Miig Tuumman Leh ka diho iururichaan.

¹⁵ Yeessohi Kamure wihi us essi kallaayo, “Nabah suda! An saggi eti walah hato iamiit. Eti iurꞌdine, gaaddiis marte, ꞌdee murukh isohanne, lakhaanyotiis ꞌdow liikasoobihin a liimaala.”

¹⁶ Ginnayyoha ꞌdeerka karnatoha meessi afi Ibiraaniya ka Harmageedo layadeeh ka isikeeneen.

Baakhuuli teebannaatteete holi Waakhe harra weyti sesseehicho lasookhuba

¹⁷ Herti Waakhe teebannaatteet wihi baakhuuliche kijire, hafar kakhubte. Hooyoo buure minki Waakhe buure goyaka komborti antoote Waakhe ka usuhi sooyeedo daage, wihi us yidah, “Walah tuumman a massateen.”

¹⁸ ꞌDeerka ankhad ichoow borooꞌd ichoow karkaraho ba soobaheene, harra la weyti sesseehte. Uuꞌ Waakh harra soouume, injire harra geedda ma sesseehin, a mehe harra saggoo uskule isesseehte.

¹⁹ Ilkerengeetti weene Baabiloon meel seyyahe ikharradde, ilkerengeetohi yaafohi harra la bar waayeen. Waakh uskeeli ꞌdooꞌdi ilkerengeetti Baabiloon yeele tuumman ma kadabine, ꞌdooꞌdi ilkerengeetta farsoti sabiibe kokkoob buuhto holi Waakh itolosso siiche.

²⁰ Kurohi bicche goya kijiro tuumman firdeene, halal tuumman la baabeen.

²¹ Dagahti burbuurenye baraafo, kooba geeddi kiilo tomon affare serey ka enenyet kasookhubatte. Enenyet jeenteti sinata weyti buurenye dagahti baraafo keentuu Waakh igafe, a mehe sina weyti suuj eheet.