1 Timooti 1 - Wori Haaggane Yeesso Kiriisto Miinsan Ayyinti Husube Waakh Enenyet Igooche

Baawulo bariito erga

¹ Eti khadaaba kisoochiiro a ani Baawulohi ergaano Yeesso Kiriistee. Ani la Waakkheenki ꞌDoorribeheene ichoow Yeesso Kiriistohi inno khajjeello iche amuricho ka ergaano ikayeele.

² Eti an isoochiiro la, a ati Timooti. Ati jiroti inno Kiriisto kakhuufno ka a weelaaya. Waakkhi Aabbaheene ichoow Yeesso Kiriistohi Kamureene ba kimaalaane, uur kisoonugleestaane toro la nebey kaakaalaan.

ꞌDooꞌdi worassi beenaat cheeko yuubso

³ Maanti an boroofenhi Makedooniya isohdi a kihawwaasde, ilkerengeetti Efeesso fiddiye kiidah. Efeesso fiddiita ꞌdee ꞌdooꞌdi worassi beenaate Waakh miinsan ꞌdooꞌd abcho amur ibihissa wahaas a toollicheen.

⁴ Toro la ꞌdooꞌdi hawweesseti beenaat ichoow magahenyeti ittaawenye hiiyyassichooda icho immarah wawwahaan ꞌdiicha itadeeh. Waha la jaakh on keenaane, toro la gargaar icho hili Waakh ikhabaan mele. Wihi hili Waakh indigir ikhabo, a chirri Waakh lakakhuufo.

⁵ Jeenteti an waha yeel ikaadeeh la, a iꞌdoo ꞌdee ꞌdooꞌd Kiriisto ꞌdoonin isikhabo. ꞌDooninta la inti iche katamiit a uuri eloo rucchul laka ikhabin ichoow rubeyti suujoon inno ikacheekan ichoow kakhuufnaanki rummaate Kiriisto lakakhuufo.

⁶ ꞌDooꞌdaas wori beenaat enenyet abcho waha dakkhan a buje, hawweesi indigir laa inokhteen.

⁷ Icho ichohi tagaammeti amurre Muusa yateehiine ꞌdee liinkaanyito ꞌdoonaane, iꞌdaasenyi wihi icho kaayyeedaan ma gartaane ommos waha icho roorro laan ꞌdooꞌd abchaan wihichekoo rucchul laka ma gartaan.

⁸ Inno tuumman a garanna, amurre Muusa a haaggantahe chirri kootte mujjum laraaho.

⁹ Inno saggi amurretaas ꞌdooꞌdi liiyeele ki fiffissan ieheynan laka a garanna. Iꞌdaasenyi amurre a ti ꞌdooꞌdi amurreti Waakh iraahin ichoow ki weynaan iinkaanyitin ichoow ki Waakh igaran ichoow ki uskeel yeelo ichoow ki Waakh ikahamaadin ichoow ki Waakh iinkaanyitin ichoow ki ꞌdooꞌdi dele bakkicho ichoow ki diig gelo.

¹⁰ Toro la amurre a ti ꞌdooꞌdi isidisanne isleeurꞌdo ichoow mejeli isleeurꞌdo ichoow ꞌdooꞌdi enenyet ororsati ichoow ꞌdooꞌdi been leh ichoow ki garti beenaat cheeko ichoow wihi tuummane wori mujjumenye Waakh buusan.

¹¹ Woraas mujjume ichoow Wori Haaggane weynaanti Waakkhi lasaaꞌdo tusso us ikorche a israahaan.

Waakh Baawulo haaggiiski buure tusta

¹² An Yeesso Kiriistohi Kamureene weyti kalaꞌd ilaaba. Us a imiigooche toro eti lakakhuufo iekkaache, hiliis ikorche.

¹³ An goorat ꞌhor usu a igafe, ꞌdooꞌdiis sina omhiche, ꞌdooꞌdiis leeabaarrame. Eheetteey laka Waakh uliba uur a isoonugleeste. Ulla jeenteti an Kiriisto ikakhuufine, wihi an yeele igaran, iche iꞌda iyeele.

¹⁴ Kamureen la haaggiiski buurenye an imunneynan weyti ituste. Toro la Yeesso Kiriisto ka, kakhuufnaanki an Waakh kakhuufo ichoow ꞌdooninti an ꞌdooꞌd ꞌdoono a isiiche.

¹⁵ Yeesso Kiriisto harratane yimiyye ꞌdee ꞌdooꞌdi uskeel leh riba. Waha a ayti rummaate kootte incheenka tuum lakakhuufo. Ani rubeytey la ꞌdooꞌdi uskeel leh goyaka, eti kuto eheet.

¹⁶ Iꞌdaasenyi jeentetane Waakh ani uur isoonugleeste, ꞌdee anihi uskeel ka enenyet tuumman kuto, Yeesso Kiriisto walahbaaw an yeele ka samacchaari imassan ituse. Ulla ani a isamacchaare ꞌdooꞌdi addane usu soorummeesti jiroti jirtuu imassan ꞌhelo iyookko ikayeele.

¹⁷ Toollaka Karnati jirtuu tuumman jiro, jirtuu iumaatane, indo ka liiargine, Waakkhi keleye, jirtuu tuumman a liinkaanyito toro la a lasaaꞌdo. Aamiin.

Baawulo Timooti Waakh kakhuuf iyadeeh

¹⁸ Timooti, weelaaw, amura an kisiicho ichoow wori kimiinsane goorat ꞌdooꞌdi Waákh íyeyyeedo cheeke kisoobaho, a israahaan. Amurane kisiicha ꞌdee woraas at raahto ka, dihoti haaggan gessa,

¹⁹ orey isohatta, Kiriisto kakhuufta, kol dakkhan la rubeyti suujoon ikaacheekan jurkhissa. A mehe ꞌdooꞌd gaasoo wahanyeyyohaas a ꞌdiiꞌde. Jeentetaas u la kakhuufnaanki icho Waakh kakhuufaan a suujaacheen.

²⁰ Goycho la a Hamenaaya ichoow Alekisaanda. An icho dahanohi Seytaane gesse, ꞌdee Waakkhi liikagafin laabcha.