Ucab Tzijobelil 22 - Quiché Bible

Rajawinic ri Ocoziy

¹ Ri aj Jerusalen are' xquicoj ri Ocoziy ri ch'i'p u c'ojol ri Joram pa ri u c'olbal che ajawinel, e are' tak c'ut ri e jupuk eläk'omab e cachil tak ri aj arabib qui ch'äcom ri kajebal re ajawibal, xequicämisaj c'ut conojel ri e u c'ojol ri Joram ri e nabeal, ajawinel re Juda. Je c'u ri', ri Ocoziy ri u c'ojol ri Joram ajawinel re Juda, xuchaplej ajawinic.

² Juwinak quieb u junab aretak xuchaplej ajawinic, jun junab c'ut xajawin pa Jerusalen. Ataliy u bi' ri u nan, rija'lil c'ut ri Omri.

^3-4 Ri Ocoziy xukuje' xutakej u banic rech jas ri xuban ri Acab xukuje' ri e rija'lil, are c'u ri u nan are' cayo'w ri itzel tak cojbal c'uxaj che, u mac c'u rech chi cäruc'aj rib cuc' ri e rija'lil ri Acab, man utz taj ri e u banoj chuwäch ri Ajawaxel. Kas c'u e are', ri xeyo'w u no'j aretak cäminak chic ri u tat, xquic'am c'u bic chupam ri sachbal wächaj.

⁵ Rumal ri u nimaxic ri cojbal c'uxaj ri xban che, ri Ocoziy xujunaj rib ruc' ri Joram, u c'ojol ri Acab ri xukuje' ajawinel re Israel, che u banic ch'o'j pa Ramot re Galaad ruc' ri Hazael, ajawinel re Siriy. Are c'u ri e aj siriyab xquisoc ri Joram,

⁶ xtzelej c'u wa' pa Jezreel rech cucunaj ta rib chque ri socotajic ri xeban che pa Ramot aretak cätajin cäch'ojin ruc' ri Hazael, ajawinel re Siriy. Rumal c'u rech chi yawab ri Joram, ri Ocoziy xbe pa Jezreel che rilic.

Ri Jehu cucämisaj ri Ocoziy

⁷ Bantajinak chic rumal ri Dios chi cäcäm ri Ocoziy aretak cäbe che rilic ri Joram. Xak xuwi c'u xopanic chanim xel bic rachil ri Joram xebe che u rikic quib ruc' ri Jehu (ri u tat ri Jehu are' ri Nimsi). Are' c'u ri Dios chowinak ri Jehu che u sachisaxic qui wäch ri e rija'lil ri Acab.

⁸ Are' c'u ri Jehu aretak cätajin cuq'uis tzij paquiwi' ri rachalal ri Acab, xeburik ri e c'amal tak be pa Juda xukuje' ri e rachalaxic ri Ocoziy, ri e c'o che u patanixic wa', xebucämisaj c'ut.

⁹ Xukuje' xutak u tzucuxic ri Ocoziy ri u c'u'm rib pa Samar, xchap c'ut xc'am bic chuwäch ri Jehu xcämisax c'ut. Xmuk c'ut, rumal rech chi u c'ojol ri Josapat, ri xutzucuj ri Ajawaxel ruc' ronojel ri ranima'. Je c'u ri' man c'o ta jachin jun xcanaj ta can chque ri rachalaxic ri Ocoziy ri ticarel taj ri cajawin ta che ajawinel.

Ri Ataliy cutokij ri tem re ajawibal

¹⁰ Aretak ri Ataliy, ri u nan ri Ocoziy xoc pa u jolom chi xcämisataj ri ral, xwalijic xebucämisaj conojel ri e rachalal ri ajawinel ri e c'o pa Juda.

¹¹ Are c'u ri Josab, u mia'l ri ajawinel Joram, xumajij ri Joas, u c'ojol ri Ocoziy, chquixo'l ri e u c'ojol ri ajawinel ri cätajin qui cämisaxic, xuc'u' c'u chuwäch ri Ataliy, xrachilaj ri rajtubis, pa jun warabal. Man c'u xcämisax taj. Ri u mia'l ri ajawinel Joram rana'b ri Ocoziy rixokil c'ut ri Joiad, cojol tabal tok'ob, are' xbanow wa'.

¹² Xc'u' c'ut ri Joas cuc' chupam ri rachoch ri Ajawaxel. Are' c'u xutakej ajawinic ri Ataliy puwi' ri winak pa ri ulew.