Ucab Tzijobelil 10 - Quiché Bible

Ri ajawibal cuban quieb

¹ Ri Roboam xbe pa Siquem, ronojel c'ut Israel benak chila' che u cojic che ajawinel.

² Xoc c'u pa u jolom ri Jeroboam, u c'ojol ri Nabat, ri c'o pa Ejipt, ri xanimaj wi bic chuwäch ri Salomon, xtzelej c'u ulok xuya' can ri Ejipt.

³ Aretak xquitak u siq'uixic, ri Jeroboam xukuje' ronojel Israel xebe che u tzijobexic ri Roboam, xequibij c'u che:

⁴ “Ri tat la sibalaj c'ax ri xuban chke; are c'u ri camic chk'ipa' la jubik' ri c'axalaj patanijic xukuje' ri alalaj eka'bal ri u yo'm pakawi', cakapatanij c'u na la.”

⁵ Ri Roboam xutzelej u bixic chque: “Chixpet che wilic pa oxib k'ij.” Xebe c'ut ri winak,

⁶ are c'u ri ajawinel Roboam xuta' u no'j chque ri nimak tak tatayib ri e patanajinak che ri Salomon, ri u tat, aretak c'asal wa'. Xuc'ot qui chi': “¿Jas ri no'j cäya' alak chwe ri quintzelej na u bixic chque we winak ri'?”

⁷ Ri e are' xquitzelej u bixic che: “We cäban la utzil chque we winak ri' cacoj c'u chuk'ab la che u ya'ic ri qui rayibal utzalaj tak tzij ta c'ut ri cäya' la u bixic chque, capatanix na la amak'el cumal.”

⁸ Are' c'u ri Roboam man xuya' ta u xiquin che ri no'j ri xquiya' ri nimak tak tatayib, xane' xuta' chi u no'j chque ri alabom ri junam u q'uiyic cuc' ri cätajin quetoban ruc',

⁹ xuc'ot c'u qui chi': “¿Jas ri no'j ri quiya' ix chwe ri quintzelej na u bixic chque we winak ri' ri qui tz'onon chwe chi quincopisaj ta jubik' ri eka'bal ri xucoj ri nu tat paquiwi'?”

¹⁰ Ri alabom ri' ri junam qui q'uiyic ruc', xquitzelej u bixic che: “Chque ri winak ri' ri qui tz'onon chawe chi chacopisaj jubik' ri eka'bal ri xucoj ri a tat paquiwi', jewa' chatzelej u bixic chque: ‘We ri nu tat xux co iwuc', ri in quinux chi na jubik' co iwuc';

¹¹ we ri are' xuya' jun alalaj eka'bal chiwij, ri in quinwalobisaj chi na; we c'u ri are' tz'um xurapubej iwech ri in quixinrapuj na cuc' tak rapubal ri e c'o ch'ich' chiquitza'm.’ ”

¹² Churox k'ij xopan chic ri Jeroboam rachil ronojel ri tinimit chuwäch ri Roboam, jacha' ri u bim ri ajawinel chque.

¹³ Are c'u ri ajawinel Roboam sibalaj c'ax ri xutzelej u bixic chque,

¹⁴ man xuya' ta u xiquin che ri no'j ri quibim ri nimak tak tatayib che, are xuya' u bixic ri no'j chque ri xquibij ri alabom che: chi we ri u tat xuya' jun alalaj eka'bal chquij, ri are' cuya' chi na jun chquij ri sibalaj al na, we c'u ri u tat tz'um xurapubej quech, ri are' queburapuj na cuc' tak rapubal ri e c'o ch'ich' chiquitza'm.

¹⁵ Ri ajawinel, man xunimaj taj ri xubij ri tinimit, rumal rech chi u chomam ri Ajawaxel chi je cac'ulmataj wa' rech cätz'akat ri xubij ri Ajawaxel che ri Jeroboam, ri u c'ojol ri Nabat, rumal ri Ahiy, ri aj Sil.

¹⁶ Aretak ronojel ri tinimit Israel xrilo chi ri ajawinel man xuya' ta u xiquin che, je u tzelexic u wäch u tzij wa' xubano: “¡Man c'o ta kech uj ruc' ri David! ¡Man c'o ta jun echbal ri cakac'am ta kech ruc' ri u c'ojol ri Isayi! ¡Jix cho tak iwachoch aj israelib! ¡Ri David chebuchajij ri rachalaxic!” Chanim, xebe ri aj israelib cho tak cachoch.

¹⁷ E are tak c'ut ri aj israelib ri e jekel chquipam ri tak tinimit ri e c'o pa Juda, ri Roboam xutakej ajawinic paquiwi'.

¹⁸ Aretak c'ut ri Roboam xutak bic ri Adoram, ri cojom paquiwi' ri winak ri quebanow ri chac ri man tojomtaj pune' man cacaj, xcämisax cumal conojel ri aj israelib chi abaj. Aninak c'ut xpaki'xtax ri ajawinel Roboam chupam ri u carwaj xanimajic xbe pa Jerusalen.

¹⁹ Ri Israel je xuban wa' che resaxic rib chuxe' ri u takanic ri rija'lil ri David c'ä pa ri k'ij camic.