Salmib 67 - Quiché Bible

¹ Nu Dios, chel c'u'x la chke xukuje' chujtewichi'j la; utz kilic chbana' la,

² rech conojel ri nimak tak tinimit cho ri uwächulew cäquetamaj ri rayibal la xukuje' ri colobenic la.

³ Nu Dios, chk'ijilax la cumal tak ri tinimit; ¡conojel tak ri tinimit chk'ijilax la cumal!

⁴ Chquiraka' qui chi' tak ri nimak tak tinimit ruc' quicotemal, lal c'ut cäk'atow na la tzij paquiwi' tak ri winak; lal cac'amow la qui be ri nimak tak tinimit cho ri uwächulew.

⁵ Nu Dios, chyok k'ij la cumal tak ri tinimit; ¡conojel ta ba' ri tinimit chquiya' k'ij la!

⁶ Ri ulew u yo'm ri u wächinic; ¡ri ka Dios uj u tewichi'm!

⁷ ¡Chujutewichi'j ri Dios! ¡Chyo'k u k'ij cumal conojel ri winak cho ri uwächulew!