Salmib 28 - Quiché Bible

Ri Ajawaxel cutatabej ri ka bochi'nic

¹ Ajawaxel, ch'ukul wech, quinrak nu chi' che ch'abexic la. ¡Mäk'il ib la che nu to'ic! We cäk'il ib la che nu to'ic quinna' wib ri' chi in c'o chic chquixo'l ri cäminakib.

² Tatabej la ri nu rakoj chi'aj che u tz'onoxic ri to'banic la, aretak quinyuk apan ri nu k'ab chusuq'uil ri tastalicalaj achoch la.

³ Mincharchatej la bic junam cuc' ri e banal tak etzelal, je minc'ulmaj jas ri cäquic'ulmaj ri banal tak c'ax, ri cäquiban quib chi sibalaj e utz e nojinak c'u che ronojel u wäch etzelal.

⁴ Chya' la chque ri takal chque, jas ri itzel tak qui chac; je tojbal chya' la chque jacha' ri etzelal ri qui banom.

⁵ Man quenataj ta chi cuya' chque ri jastak ri xebuban ri Ajawaxel, ¡are' c'ut chsachow qui wäch, mebuyac chi c'u jumul!

⁶ ¡Chyo'k ta u k'ij ri Ajawaxel, ri e u tatabem ri e nu bochi'nic!

⁷ Ri Ajawaxel are' cuinelalaj to'l wech; chrij xinya' wi ronojel ri cu'lbal nu c'u'x, xinuto' c'ut. Cäquicot ri wanima'; quinbixonic, xukuje' quinya' maltioxinic che ri Ajawaxel.

⁸ Ri Ajawaxel are' ri u chuk'ab ri u tinimit; are' to'bal rib xukuje' to'tajisal rech ri rajawinel ri u cha'om.

⁹ To'tajisaj la ri tinimit la, Ajawaxel; chetewichi'j la ri e ech la. Chebechajij la jacha' ri cuban jun ajyuk'; ¡cheloquej la bic pa k'ab la amak'el!