Ri Jeremiy 3 - Quiché Bible

Ri Israel man uxinak ta jic che ri Ajawaxel

¹ Ri Ajawaxel je cubij wa': “We jun achi cujach bic ri rixokil, ri ixok, aretak jachtajinak chic rumal ri rachajil, cäc'uli' chi c'ut ruc' jun achi, ri nabe man cuya' ta chic cac'uli ta chi ruc'. ¡Jun c'axalaj yok'obal wa' che ri ulew! Are c'u ne ri at, Israel, cuc' q'ui awachil at caban wi ri qui mac ri e quech ri nim ch'utin, ¡are c'u cawaj cattzelej ta chi wuc' camic! In, ri Ajawaxel, quinjiquiba' u bixic.

² Chebawila' ri e qui wi' tak ri juyub ri e tol, utz qui ca'yexic chabana': ¿jawije' ta ri ma ta esam wi a q'uixbal? At t'uyulic jacha' ri aj Arab re ri chaki'j uwo sak, chuchi' ri be quebaweyej tak wi ri e awachil. Atz'ajom ri ulew cumal tak ri e awuc'axic awib cuc' achijab ixokib che qui banic macunic xukuje' ri awetzelal.

³ Rumal ri' e k'ilk'obinak tak ri jäb pa ri k'aläj xukuje' pa ri nabe tak ic'. Junam catpe ruc' jun ixok quech nim ch'utin; ¡chc'ol ba' a q'uixbal!

⁴ Maja' naj oc'owinak xabij chwe: ‘Nu tat, rachil ri walc'alal,

⁵ ¿la amak'el c'o oyowal la? ¿La cäbeytaj ri oyowal la chbe k'ij sak?’ C'ä cätajin cabij wa', cätajin c'u caban ronojel ri etzelal ri catcuin che u banic.”

Ri Ajawaxel cupixbej ri Israel xukuje' ri Juda che ri q'uexoj c'uxaj

⁶ Pa tak ri e u k'ijol ri ajawinel Josiy xubij ri Ajawaxel chwe: “¿La awilom ri xuban ri Israel ri man nimanel taj? Xbec xujach rib che u banic ri cuc'axic quib cuc' achijab ixokib che qui banic macunic puwi' ri juyub ri naj elinak chicaj xukuje' chuxe' ronojel che' ri e jewel u xak.

⁷ In xinchomaj chi, chwi' ronojel ri u banom, cätzelej na ulok wuc'; man c'u xtzelej taj. Ri rachalal, ri man jic taj ri Juda, xril wa';

⁸ xrilo xukuje' chi ri in xinwetzelaj u wäch ri Israel ri man nimanel taj xinjach c'u bic kas xa' rumal ri xriktaj pa mac. Are c'u ri Juda, ri rachalal ri Israel ri man jic taj, man xuxe'j ta rib, xane' xukuje' ri are' xbec xuchaplej u banic ri mac re ri nim ch'utin.

⁹ Man c'o ta c'u k'atibal xurik che ri u banic, chi xuxok'olij ri ulew. Man jic taj xbin chnuwäch xebuk'ijilaj tak ri abaj xukuje' ri juwi' tak che'.

¹⁰ Bantajinak chi c'u ronojel wa', ri Juda ri man jic taj mawi xutzelej ta rib wuc' ruc' ronojel ri ranima', xane' xa' subunic xuban chnuwäch. In, ri Ajawaxel quinjiquiba' u bixic.”

¹¹ Ri Ajawaxel xubij chwe: “Ri Israel ri man nimanel taj cätan na ri u mac chuwäch ri u mac ri Juda ri man jic taj.

¹² Jät jaya' u bixic wa' ri xinbij chawe cäbe a wäch pa ri riquiak'ab ri elebal k'ij: ‘Ri Ajawaxel cujiquiba' u bixic: ¡Chattzelej ulok wuc', Israel c'ulelanel! Man xak ta c'ax chwe catinc'amowaj mawi quinjekeba' ri woyowal amak'el chbe k'ij sak, rumal rech chi in aj utzil. In ri Ajawaxel, quiya' ri nu tzij.

¹³ Xuwi ta ne we kas cach'ob ri awetzelal, chi xac'ulelaj ri Ajawaxel ri a Dios; xatxiq'uinilob c'u che qui tzucuxic jachin tak catajawinic ri e jule' chi wi chuxe' ronojel che' ri jewel u xak, man c'u xebanimaj taj ri e nu takanic. In, ri Ajawaxel, quinjiquiba' u bixic.’ ”

¹⁴ Ri Ajawaxel cujiquiba' u bixic: “Chixtzelej ulok walc'ual c'ulelanelab, in c'ut ri in Iwajaw. Quinmajij na jun pa jujun tak tinimit xukuje' cacab c'ut pa jujun tak ja winak, quinban c'u chque chi quetzelej na pa Sion.

¹⁵ Quebenya' na k'atal tak tzij chiwe ri quekaj chnuwäch, quequik'at c'u na tzij wa' piwi' ruc' no'j xukuje' etamanic.

¹⁶ Aretak c'u ri ix ix q'uiyirinak chic chupam ri ulew, e q'ui chi c'ut ri e iwalc'ual e c'olic, man c'o ta chi c'u jun c'o ta chi jas cubij chrij ri caxa rech ri u c'ulwächinic ri Ajawaxel; man c'o ta chi c'u jun cachoman ta chi che mawi canataj ta chi che; man cajwataj ta chi c'ut mawi cäban ta chi jun c'ac'. In, ri Ajawaxel, quinya' ri nu tzij.

¹⁷ Ri Jerusalen cabinax c'u na u tem re ajawibal ri Ajawaxel; conojel c'ut ri nimak tak tinimit caquimulij na quib chila' che u ya'ic nu k'ij, man caquitakej ta chi na ruc' taquil ri e itzel tak qui chomanic tak ri canima'.

¹⁸ Aretak chopan ri k'ij ri', ri Juda cujunaj na rib ruc' ri Israel, junam c'ut quetzelej na ulok caquiya' can ri ulew ri c'o pa ri riquiak'ab ri elebal k'ij, queboc chupam ri ulew ri xinya' jacha' che echbal chque ri e i mam ix.”

Ri aj israelib xquijal ri qui be

¹⁹ “Israel, in xinya' nu tzij che a c'amowaxic jacha' che walc'ual xinya' c'u jun ulew chawe ri carayixic, ri ulew ri sibalaj je'l na pa ronojel ri uwächulew. Xinchomaj c'ut chi quinbinaj na tataxel awumal chi mawi ta jumul xanajtajisaj ta awib chwe.

²⁰ Jacha' c'ut jun ixok ri man jic taj chuwäch ri rachajil, jeri' ri ix man ix jic taj chnuwäch. In, ri Ajawaxel, quinjiquiba' u bixic.

²¹ Quetataj rakoj tak chi'aj paquiwi' ri tol tak juyub: ¡E are' ri aj israelib, ri quebok'ic ri xukuje' caquitz'onoj tok'obisam wächaj! Xquijuluch'ij quib che ri colomalaj be xinsach pa qui jolom, ri Ajawaxel ri qui Dios.

²² Chixtzelej ulok wuc' walc'ual ri man ix nimanelab taj, ri in quixincunaj na che ri man i nimanic taj.” “Uj c'olic ri', cujnakajin chech la, rumal rech chi lal ri' ri Ajawaxel ri ka Dios.

Ri xquitzelej u bixic ri aj Israel che ri Ajawaxel

²³ Ri ka bic paquiwi' tak ri juyub man c'o ta cubij chke o ri u rakic ka chi' paquiwi' tak ri juyub; xuwi pa ri Ajawaxel ri ka Dios curik wi ri Israel ri u colotajic.

²⁴ Ri q'uixbal tak qui k'ijilaxic ri diosib xuban chke chi ka tzakom ri xecuin ri e ka mam che u rikic kas aretak c'ä uj ch'utik: chij tak, wacax tak, c'ojolab tak, mialaxelab tak.

²⁵ Kamach'aba' kib, elinak ka q'uixbal, uj ch'ukutajinak che yok'obal, kas aretak c'a uj ch'utik c'a camic, ri uj xukuje' ri e ka mam uj macuninak chuwäch ri Ajawaxel ri ka Dios man ka nimam taj.”