Nabe Tzijobelil 19 - Quiché Bible

Ri David quebuch'äc ri aj siriyab xukuje' ri aj amonib

¹ Oc'owinak chi c'u jun k'ijol xcäm ri Nahas, cajawinel ri aj amonib, are' c'u xajawin ri u c'ojol pa ri u c'olbal.

² Xuchomaj c'u ri David chi cuban utzil che ri Hanun, u c'ojol ri Nahas, rumal rech chi ri u tat xuban utzil che, xebutak c'u bic jujun tak u q'uexwäch che u cu'bisaxic u c'u'x ri Hanun rumal chi xcäm ri u tat. Aretak c'u xebopan ri e u tako'n ri David chuchi' ri culew ri aj amonib,

³ ri e qui nimal tak ri c'amal tak be aj amonib xequiya' u bixic che ri Hanun: “¿La are c'u pa c'u'x la chi ri David e u takom ulok achijab che u cu'bisaxic c'u'x la, xa' ta che u ya'ic u k'ij ri tat la, ajaw? ¡Wa' e petinak xa' che u ya'ic qui wäch, che u nic'oxic xukuje' che rilic ri uwächulew!”

⁴ Xuya' c'u takanic ri Hanun chi checoj ri e u nimakil tak ri e rajch'ojab ri David pa che', chajos c'u bic ri quismachi' xukuje' chi chejistak bic ri catz'iak pa niq'uiajil c'ä pa tak cächak. C'ä te' c'u ri' xebutzokopij bic.

⁵ Aretak xebix che ri David ri xquic'ulmaj tak we achijab ri', xtakanic chi chebec'ulaxok, sibalaj c'u e nojinak ri' che q'uixbal, chbix c'u chque chi checanaj can pa Jerico c'ä chq'uiy na ri quismachi', c'ä te' c'u ri cuya' quetzelejic.

⁶ Ri aj Amon xquich'obo chi xquetzelaj quib chuwäch ri David, rumal c'u rech wa' ri Hanun xukuje' ri aj Amon xquitak bic wakib sient ruc' oxc'al (660) quintal sak puak che qui tojic tak carwaj quech ch'o'j xukuje' ajch'ojab aj quiejab pa Mesopotam, pa Siriy, pa Maac xukuje' pa Soba,

⁷ xequitoj c'u juwinak cablajuj mil (32,000) carwaj que ch'o'j, xukuje' c'u ri ajawinel re Maac e rachil ri e rajch'ojab. Xebopan wa' xquicholajij tak quib chuwäch ri Medeb. Xebel chi c'u ulok ri aj amonib pa tak ri qui tinimit xquimulij quib rech queboc' che u banic ch'o'j.

⁸ Xoc c'u pa u jolom ri David, xutak c'u bic ri Joab xebuc'am bic conojel ri ajch'ojab ri e banal ch'o'j.

⁹ Ri aj Amon xebel c'u ulok xquisuc'umaj c'u quib che u banic ri ch'o'j kas chuchi' ri tinimit. E are' tak c'ut ri ajawinelab ri e petinak che qui to'ic xecanaj can pa tak ri juyub.

¹⁰ Aretak c'u xril ri Joab chi e petinak ri c'ulel chuwäch xukuje' chrij, xebucha' ri ajch'ojab aj israelib ri e utz na xusuc'umaj c'u rib che u banic ri ch'o'j cuc' ri aj siriyab.

¹¹ Che c'ut ri u k'atixic qui wäch ri aj amonib, xucoj ri Abisay ri u chak',

¹² xubij c'u che: “We c'u quinquich'äc ri aj siriyab catpe na che nu to'ic, we c'u e are' catquich'äc ri aj amonib, in quinbe na che a to'ic.

¹³ Chachajij anima', ruc' c'u chuk'ab ka ch'ojij ri nim ka tinimit xukuje' ri e u tinimit ri ka Dios. ¡Chubana' ba' ri Ajawaxel ri utz carilo!”

¹⁴ Xkeb c'u ri Joab e rachil ri e rajch'ojab che u banic ch'o'j cuc' ri aj siriyab, xebanimaj c'u wa' chuwäch.

¹⁵ Aretak c'ut ri aj amonib xquilo chi xebanimaj ri aj siriyab, xukuje' ri e are' xebanimaj chuwäch ri Abisay, u chak' ri Joab, xeboc chupam ri tinimit. Xtzelej c'ut ri Joab pa Jerusalen.

¹⁶ Aretak xquinabej ri aj siriyab chi xech'äcataj cumal ri aj Israel, xequitak bic tako'n rech quepe ri aj siriyab ri e c'o ch'käp che ri nima' Euprats. Are' c'u e u c'aninak ri Sopac qui nimal rajch'ojab ri Hadad-ezer.

¹⁷ Xya' c'u u bixic wa' che ri David, ri, xebumulij bic conojel ri aj israelib, xek'ax c'ut chupam ri nima' Jordan, xranej c'ut quimajixic qui c'olbal che qui c'ulelaxic. Ri David xebucholajij ri e rajch'ojab che u k'atixic qui wäch ri aj siriyab, xquitij c'u qui chuk'ab wa' ruc',

¹⁸ xebanimaj c'u na chquiwäch ri aj Israel, ri rajch'ojab ri xecämisax rumal ri David e cawinak mil (40,000) ri xak quebin chcakan xukuje' wukub mil (7,000) chque ri carwaj ri e re ch'o'j; ri David, xukuje' xucämisaj ri Sopac, ri qui nimal ri ajch'ojab aj siriyab.

¹⁹ Aretak xquil ri e to'l tak rech ri Hadad-ezer chi xech'äcataj cumal ri aj israelib, xquiban jamaril ruc' ri David xecanaj c'u chuxe' ri u takanic. Ri aj siriyab kas chi' xc'äj qui wäch, man c'o ta chi jumul ri xcaj ta chic xequito' ta chic ri aj amonib.