Nabe Tzijobelil 18 - Quiché Bible

Ri ch'o'j ri xebuban tak ri David

¹ Xc'ulmataj c'ut chi ri David xebuch'äc ri aj pilisteyib, xekaj c'u pa u k'ab xutokij c'ut ri tinimit Gat chque xukuje' ri alaj tak u tinimit.

² Xukuje' xebuch'äc ri aj moabib, xecanaj c'u chuxe' ri u takanic ri David xetojon c'u na pa u k'ab.

³ Ri David xukuje' xuch'äc ri Hadad-ezer, ajawinel re Soba, ri c'o chusuq'uil ri Hamat, aretak are ta xraj xbe che u majixic ri ulew ri c'o chuchi' ri nima' Euprats.

⁴ Jumil carwaj re ch'o'j xutokij ri David chque wa', wukub mil ajch'ojab aj quiejab xekaj pa u k'ab xukuje' juwinak mil ajch'ojab ri xak quebin chcakan; xebuk'ajisaj c'ut ri cakan conojel tak ri quiej ri quejurun tak ri carwaj re ch'o'j, xuwi xebuto' can ri quiej ri quejurun jun sient carwaj.

⁵ Xebopan tak c'ut ri aj siriyab aj Damasc che u to'ic ri Hadad-ezer, ri ajawinel re Soba, xebuch'äc c'ut ri David ri aj siriyab, xebucämisaj c'u juwinak quieb mil chque wa'.

⁶ Xebucojo c'u chajinelab ri David pa Siriy aj Damasc xecanaj c'u can ri aj siriyab chuxe' ri u takanic xquichap c'u tojonic pa u k'ab ri David. Je c'u ri' ri Ajawaxel cuya' ri ch'äcanic che ri David apawije' ta ne ri cabe wi che u banic ch'o'j.

⁷ Ri David xuban rech chque tak ri quetecak ch'ich' re k'an puak ri xequicoj ri quinimal tak rajch'ojab ri Hadad-ezer, xebuc'am c'u bic pa Jerusalen.

⁸ Xukuje' xuban rech che jumulaj k'an ch'ich' ri petinak pa Tibat xukuje' pa Cun, e tak tinimit wa' ri e c'o pa u k'ab ri Hadad-ezer. Ruc' we k'an ch'ich' ri' xuban ri Salomon ri nimalaj pila, xukuje' tak ri rakan ja xukuje' tak ri chaconisan re k'an ch'ich' ri xebajwataj chupam ri rachoch Dios.

⁹ Aretak ri Toy, ajawinel re Hamat, xoc pa u jolom chi ri David xebuch'äc conojel ri rajch'ojab ri Hadad-ezer, ajawinel re Soba,

¹⁰ xutak ulok ri Adoram ri u c'ojol e ruc'am ulok ronojel qui wäch jastak re k'an puak, re sak puak xukuje' re k'an ch'ich', rech cuya' rutzil u wäch xukuje' che u ya'ic u k'ij ri ajawinel David rumal rech chi xutij u chuk'ab ruc' ri Hadad-ezer xcuin c'u che u ch'äquic, ri Toy xukuje' c'olinak pa ch'o'j ruc'.

¹¹ Ri David xebujach conojel we jastak ri' che ri Ajawaxel, junam ruc' ri k'an puak xukuje' ri sak puak ri xutokij chque conojel ri nimak tak tinimit, che ri Edom, che ri Moab, chque ri aj amonib, chque ri aj pilisteyib xukuje' chque ri aj amalesib.

¹² Are chi c'u ri Abisay, ral ri Sarb, xebuch'äc wajxaklajuj mil (18,000) aj edomib chupam ri beya' re atz'am.

¹³ Xebucojo c'u chajinelab ri David pa Edom, conojel c'ut ri aj edomib xecanaj can chuxe' ri u takanic; are c'u ri Ajawaxel cäyo'w ri ch'äcanic che apawije' ta ne ri cabe wi.

E u nimal tak rajch'ojab ri David

¹⁴ Ri David xajawin puwi' ronojel Israel, xuban c'ut ri suq'uilal xukuje' ri colomal cuc' conojel ri e u winakil.

¹⁵ Ri takanel paquiwi' ri ajch'ojab are' ri Joab, ral ri Sarb; xukuje' ri Josapat, u c'ojol ri Ahilud, are' ri rajtz'ib ri ajawinel.

¹⁶ Ri Sadoc, u c'ojol ri Ahitob, xukuje' ri Abimelec, u c'ojol ri Abiatar, e cojol tabal tok'ob; ri Sabs are' ri tz'ibal tzijol,

¹⁷ xukuje' ri Benaiy, u c'ojol ri Joiad, c'o che qui nimal ri chajinelab aj sereteyib xukuje' peleteyib. Ri e u c'ojol ri David e are' ri e nimak tak to'l rech.