Nabe Tzijobelil 14 - Quiché Bible

Ri Hiram quebutak ulok u q'uexwäch ruc' ri David

¹ Ri Hiram, ajawinel re Tir, xebutak ulok e u q'uexwäch ruc' ri David, xebutak c'u ne ulok banal tak tz'ak xukuje' ajanelab ri e cuc'am ulok tz'alam re chacalte' che u yaquic ri rachoch ri ajawinel.

² Xuch'ob c'ut ri David chi co tiquibam che ajawinel puwi' ri Israel rumal ri ajawaxel, u yo'm c'u u k'ij ri rajawinic puwi' ri tinimit Israel.

Niq'uiaj chic u c'ojol ri David

³ Ri David xebuc'am chi niq'uiaj rixokil pa Jerusalen, xec'oji' chi niq'uiaj e u c'ojol xukuje' u mia'l.

⁴ Ri e u c'ojol ri xil qui wäch pa Jerusalen e are' qui bi' wa': Samu, Sobab, Natan, Salomon,

⁵ Ibar, Elisu, Elpelet,

⁶ Nog, Nepeg, Japiy,

⁷ Elisam, Eliad xukuje' ri Elipelet.

Ri David quebuch'äc ri aj pilisteyib

⁸ Aretak xoc pa qui jolom ri aj pilisteyib, chi xtastaj ri David jacha' ajawinel re ronojel Israel, xewalij conojel che u tzucuxic; xoc c'u pa u jolom ri David xel c'u bic che qui c'ulaxic.

⁹ Xquichuk'ubej c'ut ri aj pilisteyib xquimajij ri beya' re Repaim.

¹⁰ Rumal ri', ri David xutz'onoj che ri Ajawaxel, xubij c'u che: “¿La quinch'ojin cuc' ri aj pilisteyib? ¿La cäya' la ri ch'äcanic chwe paquiwi'?” Ri Ajawaxel xutzelej u bixic che: “Chatch'ojin cuc', quinya' na ri ch'äcanic chawe paquiwi'.”

¹¹ Ri David xpaki' pa Baal-perazim, chila' c'u xebuch'äc wi. Rumal ri' xubij: “Jacha' jun rekbala', ri Dios xujak nu be chquixo'l tak ri nu c'ulel.” Xbinax c'ut Baal-perazim che u bi' we c'olbal ri'.

¹² Ri aj pilisteyib xequitzak c'u ne can tak ri e qui diosib pa tak ri juyub, xtak c'u qui poroxic rumal ri David.

¹³ E are' c'u ri aj pilisteyib xquichaplej chi u mulixic quib pa ri beya' re Repaim,

¹⁴ jeri' ri David xutz'onoj chi jumul che ri Dios, xutzelej c'u u bixic ri Dios che: “Maya' awib chquiwäch che u banic ri ch'o'j cuc' xane' chaya' awib chquij aretak c'u catopanic jawije' e c'o wi ri c'oc'alaj tak che'.

¹⁵ Aretak c'u cata' ri u pa rakan winak paquiwi' tak ri che', chachapa' u banic ch'o'j cuc', ri quel cubij wa' chi in quinnabej chawäch che qui soquic ri ajch'ojab aj pilisteyib che cämical.”

¹⁶ Ri David je xubano jas ri takanic ri xuya' ri Dios che, xequich'äc c'ut ri cajch'ojab ri aj pilisteyib kas pa Gabaon c'ä pa Jezer,

¹⁷ rumal c'u wa' xel u tzijol pa conojel tak ri tinimit xuban c'ut ri Ajawaxel chi conojel ri nimak tak tinimit chiquixe'j quib chuwäch.