Nabe Samuel 5 - Quiché Bible

Ri caxa chquixo'l ri aj pilisteyib

¹ Aretak xkaj ri u caxa ri Dios pa qui k'ab ri aj pilisteyib pa Eben-ezer, xquic'am bic xequiya' pa Asdod;

² xquic'amo xquicoj pa ri rachoch ri dios Dagon, xquiya' c'u chuxcut ri Dagon.

³ Ak'ab chucab k'ij aretak xebopan ri aj Asdod, xequirika' ri Dagon tzakinak cho ri ulew chuwäch ri u caxa ri Ajawaxel. Xquiwalijisaj ri Dagon xquiya' can pa ri u c'olbal.

⁴ Xebopan chi c'u ri aj Asdod chucab k'ij, xequirika' chi jumul ri Dagon tzakinak cho ri ulew chuwäch ri u caxa ri Ajawaxel. K'ipk'obinak chic ri u jolom xukuje' e k'ajinak chic ri quieb u k'ab e yo'm puwi' ri apal. Xuwi ri u cuta'mil ri Dagon xcanajic.

⁵ Rumal ri' c'ä camic, aretak queboc ri e cojol tabal tok'ob chuwäch ri Dagon pa ri rachoch ri c'o pa Asdod, man cäquitac'alej taj ri apal.

⁶ Ri Ajawaxel sibalaj c'u xuc'äjisaj qui wäch ri aj Asdod xebunojisaj c'u che xe'n ib xukuje' conojel ri e qui winakil, xebuc'am ulok sipoj paquiwi'.

⁷ Aretak c'u xquil ri aj Asdod ri cätajin cäc'ulmatajic, xquibij: “Ri u caxa ri qui Dios ri aj israelib man cuya' taj cäcanaj kuc', rumal rech chi we Dios ri' cätajin cuya' c'axalaj c'äjisabal wächaj chke, ri uj xukuje' ri Dagon, ri ka dios.”

⁸ Rumal c'u ri' xquitak u bixic chque ri e qui nimal ri aj pilisteyib chi chebopan cuc', xequic'ot c'ut qui chi': “¿Jas cäquiban che ri u caxa ri qui Dios ri aj israelib?” “Chic'ama' bic pa ri tinimit Gat,” xecha' we winak ri'. Ri aj pilisteyib xquic'am bic xequiya' can chila'.

⁹ Aretak c'o chi chila', ri Ajawaxel xulic' ri xe'n ib pa ri tinimit, xebusoc ri winak cuc' tak sipoj ri xeq'uiy ulok chquij, chi nimak chi ch'utik.

¹⁰ Xepe c'u ri aj pilisteyib xquik'axaj ri u caxa ri Dios pa Ecron; aretak c'u xopan ri caxa chila', ri aj Ecron xquirak qui chi': “C'amom ulok ri u caxa ri qui Dios ri aj israelib kuc' rech cujucämisaj konojel.”

¹¹ Rumal c'u rech chi conojel ri winak pa ri tinimit xenoj che jun cämisanelalaj xe'n ib u mac ri c'axalaj c'äjisabal wächaj ri u takom ulok ri Dios paquiwi', xequitak qui siq'uixic ri e qui nimakil ri aj pilisteyib xquibij c'u chque: “Chiwesaj bic ri u caxa ri qui Dios ri aj israelib. Jitzelej can pa ri u c'olbal, rech man cujucämisaj ta konojel.”

¹² Ri qui rakoj chi'aj conojel ri winak xopan c'ä chicaj, e aretak c'ut ri man xecäm taj, nojinak ri qui cuerp chque tak sipoj.