Proverbios 16 - Qheshwa Biblia DC

¹ Imatapis ruwanapaj wakichisqaqa runajtamin; chaykunas junt'akunampajtaj Señorpuni ari ninan tiyan.

² Runamanqa tukuy ima ruwasqasnin allinman rijch'an; chaywampis Señorlla qhawan ima laya yuyaywanchus qhawasqanta.

³ Ruwasqasniykitaqa Señorpa makinman saqey, imatachus ruwanaykipaj wakichisqasniykitaj ruwakonqanku.

⁴ Señorqa kay tukuy imasta ruwan uj yuyayllawan; juchasapa runatapis uj p'unchay jasut'isqa kanampaj.

⁵ Señorqa runaykachajkunata millachikun; jasut'isqapuni kanqanku.

⁶ Juchataqa, munakuywan cheqa kaywantaj perdonana; Señorta manchachikuspataj runaqa juchamanta t'aqakun.

⁷ Maypachachus uj runaj purisqan Señorta kusichin chaypachaqa, chejnejkunasnintinta paywan allinyakunata ruwan.

⁸ Cheqamanta aswan pisitapis ganakoyqa aswan allinmin, qhasi mana kajmanta ashkhata gananamanta nisqaqa.

⁹ Runaqa imata ruwanantapis yuyaynimpi wakichin, Señortaj chay wakichisqasninta cheqanchan.

¹⁰ Reyqa Diosmanta parlan, manataj kamachinchu mana allinyakunataqa.

¹¹ Cheqan pesaswan, chimpuswanqa Señorpatamin; chay tukuy pesasqa paypa ruwasqasnin.

¹² Tukuy sajra ruwaykunata reyesqa chejninku, imaraykuchus kamachiynenqa cheqan ruwaywampuni sayanqa.

¹³ Pichus k'achata cheqantataj parlajtaqa, reyes munakuywan, kusiywantaj qhawanku.

¹⁴ Reyespa k'ajaj phiñakuynenqa wañuymanta willanku, yachayniyojkunarí, allinyachiyta mask'anku.

¹⁵ Reypa kusiynenqa kausaymin, runaj khuyakuynintaj yakuyoj para phuyu jina.

¹⁶ Qorita rantinamanta nisqaqa aswan allin yachayniyoj kana; qolqeyoj kanamantaqa, aswan allin sumaj yuyayniyoj kana.

¹⁷ Cheqanta purejkunaj ñannenqa sajra ñanmanta t'aqakun; cheqanta purejqa pay kikinta waqaychakun.

¹⁸ Runaykachaypa qhepantapacha urmayqa jamun. Jatunchakuypa qhepantaqa urmay jamun.

¹⁹ Wajchaswan llamp'u sonqowan tukunaqa aswan allinmin, runaykachajkunawan qhapajyanamanta nisqaqa.

²⁰ Palabrata uyarejtaqa allimpuni renqa; kusikuyniyojmin pichus Señorpi atienekojqa.

²¹ Pichus sumajta unanchajqa yachayniyojpaj qhawasqa; misk'i parlaynenqa rikuchin yachayniyoj kasqanta.

²² Sumaj yuyayniyoj kayqa, kausaypa juturimpis kanman jina. Wampusman yuyaychay wampu kaywan ninakun.

²³ Pichus yachaywan unanchajqa parlayta yachan, k'acha palabrasnintaj sumajta yachachin.

²⁴ Palabrasnenqa wayronqo misk'iwan ninakun; yuyayta misk'ichan, ukhuntataj jampin.

²⁵ Ñankunas tiyan; chaykuna runapajqa cheqanman rijch'akunku, chaykunaj tukukuynimpirí wañuylla kashan.

²⁶ Uj llank'ajpa yarqhaynenqa paytaqa llank'achin; yarqhaynenqa astawan llank'achin.

²⁷ Sajra runaqa jusk'uta ruwan sajra kajta mask'aspa; palabrasnimpis nina lauraykunaman rijch'akunku.

²⁸ Sajra runaqa maqanachin; cuento q'epi mana allin ñanman pantaykuchin.

²⁹ Sajra runaqa kausaqenta ch'aukiyan, mana allin ñanmantaj pantaykuchin.

³⁰ Sajra imaspi yuyanampajqa ñawisninta ch'irmiykun; kirusninta khaniykurikun sajra imasta ruwasqanmanta.

³¹ Machuyaspa yuraj uma kayqa sumaj pillu; chayqa tarikun cheqan ñanta purisqapi.

³² Wapu kanamantaqa aswan allin llamp'u sonqo kanaqa; ashkha llajtasta jap'inamanta nisqaqa, aswan allinraj pay kikinta atipakunan.

³³ Suertetaqa runa choqan, Señortaj nin imaynachus kanantaqa.