San Mateo 21 - Qheshwa Biblia DC

Jesús Jerusalenman yaykun

^1-2 Jerusalenman qayllashaspa, Olivos orqoj chimpampi Betfagé llajtaman chayarqanku. Chaymantataj Jesusqa iskay yachachisqasninta kacharqa, nispa: Jaqay chimpa ranchoman riychej; chaypitaj tarinkichej uj china burrota uñanwan khuska watasqata; phaskaraspataj aysamuychej.

³ Pillapis ima nisunkichejman chayqa, niychej: Señor necesitan kay burrosta. Chantá kutichimponqapacha.

^4-5 Kaytaj karqa profetaj nisqan junt'akunampaj. Kay jinatataj nerqa: Jerusalén llajtata niychej: Reyniyki jamushasunki, llamp'u sonqoyoj, uj burropi tiyasqa, chaytaj uña burro, chajnana uywa.

⁶ Yachachisqasnintaj rispa, Jesuspa kamachisqanman jina ruwarqanku.

⁷ Burrota uñantinta aysamuspa, p'achasninkuwan caronaykorqanku; Jesustaj chayman tiyaykorqa.

⁸ Runastaj p'achasninkuta ñanman mast'arqanku; wakintaj sach'a ramasta k'utuspa ñanman mast'allarqankutaj.

⁹ Ñaupaqenta qhepanta ima rejkunataj qhaparisharqanku, nispa: Yupaychasqa kachun Davidpa Churenqa! Señorpa sutimpi jamojqa, jatunchasqa kachun! Janaj pachakunapipis yupaychasqallataj kachun!

¹⁰ Jerusalenman Jesús yaykusqantawantaj, tukuy llajtantin maytapuni aywirispa qhollpikorqanku. Pitaj kayri?, nispa.

¹¹ Kuticherqankutaj: Kayqa profeta Jesús, galileo, Nazaret llajtamanta.

Jesús qharqon templomanta vendejkunata

¹² Jesusqa temploman yaykuspa, tukuy vendejkunata, rantejkunata ima, jawaman qharqorqa. Jinallataj qolqe trocajkunaj mesasninkuta, palomasta vendejkunaj tiyanasninkutapis tijrararqa.

¹³ Nerqataj: Escribisqa kashan: Waseyqa Diosmanta mañakunapaj wasi sutichasqa kanqa; qankunarí, suwaj cuevanman tukuchisqankichej.

¹⁴ Ajina Jesús templopi kashajtintaj, jamorqanku ciegos, cojos ima. Paykunatataj thañicherqa.

¹⁵ Kuraj sacerdotes, leymanta yachachejkuna ima, Jesuspa milagrosninta rikuspa, wawastapis: Yupaychasqa, Davidpa Churin!, nejta uyarispa, maytapuni phiñakorqanku.

¹⁶ Nerqankutaj Jesusman: Uyarinkichu kaykuna imatachus nisqankuta? Jesustaj kuticherqa: Arí, uyarini. Qankunarí, manachu jayk'ajpis Escrituraspi leerqankichej: Wawaspa siminwan ñuñojkunawan ima, allinta yupaychasqankuta?

¹⁷ Paykunata llajtapi saqerpayaspataj, Betaniaman rerqa. Chay tutataj chaypi qhepakorqa.

Higos sach'ata maldicin

¹⁸ Q'ayantin paqarintaj, Jerusalenman kutishaspa, yarqhachikorqa.

¹⁹ Ñan patapitaj uj higo sach'ata rikorqa, qayllaykuspataj laqhesllata tarerqa, chay sach'amantaj nerqa: Kunanmantapacha, ama jayk'aj poqoyniyki p'utuchunchu. Sach'ataj chay kikimpacha ch'akiporqa.

²⁰ Yachachisqasnintaj chayta rikuspa t'ukorqanku, nerqankutaj: Imaraykutaj higos sach'a, chay kikimpacha ch'akipunri?

²¹ Jesustaj kuticherqa: Noqaqa cheqata niykichej: Feniyojchus kawajchej chayqa, mana higos sach'awan ruwasqallaytachu ruwawajchej. Astawanqa, mana iskayrayaspa, kay orqotapis niwajchej: Ithiriy kaymanta, qochaman wijch'uykukuy, nispa. Ajinatataj ruwakunman.

²² Creespatajchus tukuy imata mañakuwajchej chayqa, mañakusqaykichejta jap'inkichej.

Jesusta atiyninmanta tapunku

²³ Jesús temploman kutiykuspa yachachishajtintaj, kuraj sacerdotes, llajtapi kuraj runas ima, payman qayllaykuspa taporqanku: Ima atiywantaj kay imasta ruwankiri? Pitaj kay atiyta qosorqa?

²⁴ Jesustaj paykunaman kuticherqa: Noqapis ujta tapurillasqaykichejtaj; kutichiwankichej chayqa, noqapis nisqaykichej ima atiywanchus kayta ruwasqayta.

²⁵ Pitaj Juanta bautizanampaj churarqa, Dioschu, chayrí runaschu? Tapojkunataj ninakorqanku: Dios kamacherqa nejtinchejqa, imaraykutaj chantá mana paypi creerqankichejchu?, niwasun.

²⁶ Juanta runas churanku nejtinchejrí, runastañataj manchachikunchej; tukuy yachanku Juanqa profeta kasqantaqa.

²⁷ Chaymantataj Jesusman nerqanku: Mana yachaykuchu, nispa. Jesustaj kuticherqa: Noqapis manallataj niykichejmanchu ima atiywanchus kaykunata ruwasqayta.

Iskay churismanta yachana

²⁸ Nillarqataj: Imaynataj rijch'asunkichej? Uj runa iskay wawasniyoj karqa; ujninmantaj nerqa: Wawáy, kunan p'unchay riy uvas chajraman llank'aj.

²⁹ Paytaj, mana riymanchu, nerqa. Chantaqa sonqonta nanachikuspa rerqa uvas chajraman.

³⁰ Ujninmantaj kikillantataj nerqa: Qampis riy llank'aj. Paytaj, risaj nerqa; chantá manataj rerqachu.

³¹ Mayqentaj tatampa munayninta ruwarqa? Paykunataj kuticherqanku: Ñaupaj kaj, nispa. Jesustaj nerqa: Cheqamanta niykichej, impuestota orqhojkuna millay puriyniyoj warmis ima, Diospa reinonman ñaupaqeykichejta yaykushanku.

³² Juanqa ñaupajta jamorqa cheqa kajta yachachej. Qankunataj paypa nisqanta mana creerqankichejchu. Impuestota orqhojkunataj, millay puriyniyoj warmis ima, payta creerqanku. Qankunarí, kay imasta rikushaspapis manapuni creerqankichejchu, Diosman kutirikunaykichejpaj.

Runa wañuchis

³³ Uyariychej waj rijch'anachinata: Uj patrón uvasta plantarqa jallp'ampi; perqawantaj muyuykucherqa. Chaupimpitaj uvas ch'irwanata wakicherqa. Qhawana torretataj perqarqa. Chaymantataj llank'ajkunaman partidopi qospa, karuman ch'usarqa.

³⁴ Uvas pallaypitaj, wakin kamachisninta kacharqa, paypa partenta qopunankupaj.

³⁵ Llank'ajkunataj, kamachista jap'iytawan, ujninta jasut'erqanku, ujnintataj wañucherqanku, ujnintatajrí rumiswan ch'anqaykorqanku.

³⁶ Ujtawan patronqa, aswan ashkha kamachisninta kacharqa; chaykunatapis kikillantataj ruwarqanku.

³⁷ Qhepatarí, churintañataj kacharqa. Paytaqa respetanqankupuni, nispa.

³⁸ Llank'ajkunataj, churinta jamojta rikuspa, paykuna pura ninakorqanku: Kayqa chayaqeta jap'ej. Jamuychej, wañuchisun; jallp'antataj jap'ikapusunchej.

³⁹ Jap'iytawantaj, chajramanta jawaman orqhospa wañucherqanku.

⁴⁰ Chaymantataj Jesús taporqa: Uvas chajrayoj kutimuspaqa, imatataj llank'ajkunata ruwanqari?

⁴¹ Paykunataj kuticherqanku: Chay sajra llank'ajkunataqa, mana khuyaspa wañurachenqa; jallp'antataj waj llank'ajkunaman qonqa, cosechapi partenta qopunankupaj.

⁴² Jesustaj nerqa: Manachu jayk'ajpis Escriturapi leerqankichej? Ajinata nin: Wasi ruwajkunaj qhesachasqanku rumeqa, aswan sumaj wasi esquina rumi kapun. Chaytaqa Señor ruwasqa t'ukunanchejpaj jina.

⁴³ Chayrayku niykichej: Diospa reinontaqa qhechusonqachej, qoponqataj Diospa munayninta ruwajkunaman. [

⁴⁴ Pillapis kay rumi pataman urmajqa, t'unasqa kanqa. Chantá, pejpa patanmanchus kay rumi urmaykunman chaytaj, phirisqa kanqa.]

⁴⁵ Kuraj sacerdotestaj, fariseos ima yacharqanku, Jesusqa rijch'anachinaswan paykunaman parlasqanta.

⁴⁶ Chayrayku payta jap'iykuyta munarqanku; runasta manchachikuspataj, mana imanayta aterqankuchu; imaraykuchus runas Jesusqa profeta kasqanta yacharqanku.