Jueces 18 - Qheshwa Biblia DC

Micaiawan Dampa ayllunwan

¹ Chay tiempospeqa Israel ayllu ukhupi mana reyninku karqachu. Dan ayllojtapis manaraj jallp'an karqachu, ajinaqa mask'asharqanku maypichus tiyakunankuta.

² Chayrayku Danmanta kajkunaqa Zoramanta jinataj Estaolmanta kacharqanku phishqa aswan sumachaj runasninta, qhawaqamunankupaj jinataj sumajta rejsimunankupaj chay lugaresta. Chay phishqa kachasqa Efraimpa orqosninman rerqanku, chayarqankutaj Micaiajpa wasinman, chaypitaj chay ch'isita qhepakorqanku.

³ Micaiajpa wasinman qayllashaspañaqa, chay wayna levitaj parlasqanta rejsiytawan rerqanku tapurej: Pitaj kaynejman pusamusorqari? Imaraykutaj qan kay lugarpi kashankiri? Imatataj kaypi mask'ashankiri? nispa.

⁴ Chay levitaqa kuticherqa: Micaiawan uj tratota ruwayku, payqa sacerdoten kanaypaj pagamanta mink'akuwan.

⁵ Chaypacha paykunaqa nerqanku: Diosta tapuriy kay viajeykupi allinchus riwasqayku, chayta.

⁶ Levita sacerdotetaj kuticherqa: Rillaychej kusiywan, Señor qankunata waqaychasonqachej mayllamampis rejtiykichej.

⁷ Chaymantataj chay phishqa kachasqa Leisman rerqanku. Chay llajtapi runasqa mana imamanta dakuspa tiyakullaj kanku, imaynatachus chay sidonios kausayta yachasqankuman jina; ni ima ch'ajwawan, kusiyllapi, ni pejpa imanasqan, nitaj ni imapi pisichikuspa. Paykunaqa karupi kasharqanku sidoniosmantaqa manataj piwampis tratoyojchu karqanku.

⁸ Chaypacha phishqa kachasqa kutimporqanku Zoraman jinataj Estaolman, maypichus chay wauqesninku kasharqanku chayman, paykunataj kay jinata tapurerqanku: Imaynataj risorqachejri? Paykunataj kuticherqanku:

⁹ Chay lugaresta purimorqayku, tarerqaykutaj sumachaj jallp'asta. Puririnachej! Jap'ikampusunchej! Ama chaypi qhellas jina t'allarayaychejchu! Rispa jap'ikampunachej chay jallp'ata!

¹⁰ Chayman chayaspataj rikunkichej chay runasta mana imamanta dakojkunata, ashkha jallp'asniyojta, ni imamanta pisichikojkunata. Kay jallp'ata Dios qosonqachej qankunaman.

¹¹ Sojta pachaj runas Dampa ayllunmanta kajkuna llojserqanku Zoramanta Estaolmanta ima, sumaj armasninkuwan wakisqas.

¹² Judaman chayaspataj Quiriat-jearimmanta inti yaykuynejpi jina jarakorqanku, chayrayku chay lugarpata kunankama sutin Dampa jarakunan nisqa.

¹³ Chaymantataj rerqanku Efraimpa orqosninman, chayarqankutaj Micaiajpa wasinman.

¹⁴ Chaypacha chay phishqantin pischus jallp'ata qhawaj ñaupajpi jamorqanku Lais cheqanejman chaykunaqa chay ujkunaman nerqanku: Yachankichejchu uj imata? Kay wasipi tiyan efod p'acha, chantá wasi dioskuna ima, jinataj k'aspi llajllasqamanta uj lanti qolqewan lluch'isqa. Imatataj chaykunawan yuyankichej ruwaytari?

¹⁵ Chaypacha chay kachasqa chay ujkunamanta t'aqakuspa, rerqanku levita waynaj wasinman, Micaiajpa wasimpi, chayaspataj napaykorqanku.

¹⁶ Chaykamataj Dan ayllumanta sojta pachaj kaj soldadosqa armaswan sumaj wakisqas punkupi suyasharqanku.

¹⁷ Chay phishqa kachasqa ñaupajta wasiman yaykorqanku, chaypitaj jap'ikaporqanku k'aspimanta llajllasqa qolqewan lluch'isqa lantita, efod p'achata, wasi ayllu lantistapis, chaykamataj sacerdoteqa chay sojta pachaj runaswan khuska punkupi kasharqa.

¹⁸ Sacerdotetaj rikuspa chay phishqa kachas Micaiajpa wasinman yaykusqankuta, chay lantita jap'isqankuta jinataj efod p'achata, chantá wasi lantista ima, nerqa: Imatataj ruwashankichej?, nispa.

¹⁹ Paykunataj kuticherqanku: Ch'inlla kakuy, jampuy noqaykuwan. Munayku sacerdoteyku kanaykita, jinataj uj tatayku jina kanaykita. Manachu walej rijch'asunki Israel ujnin kaj aylluntinmanta sacerdote kanayki uj runaj wasillanmanta nisqaqa?

²⁰ Chay nisqankuwan sacerdoteqa kusikorqa, chay lantita, efod p'achata, wasi ayllu lantistapis jap'iytawan Dampa ayllunwan riporqa.

²¹ Paykunataj watejmanta puririllarqankutaj, wawasninkuwan, uywasninkuwan jinataj tukuy kapuykunasninkuta ñaupajman churaspa.

²² Micaiajpa wasinmanta karuta risqankumantaña, Micaiawan kausaqesninwan ima tantaykukuspa paykunata qhatiykoj llojserqanku.

²³ Chay qhatiykojkunaspa qhaparkachasqasninkuta uyarispataj Danmanta kajkunaqa qhepaman qhawarispa Micaiata taporqanku: Imataj pasasunki, imaraykutaj chay jinatapuni qhaparimuwayku?, nispa.

²⁴ Micaiataj kuticherqa: Qankuna apakapushankichej ruwakorqani chay lantisniyta, sacerdoteytapis apakapushallankichejtaj, mana imayojtataj saqerparishawankichej, chantá tapuwashankichejrajtaj. Ima pasasunki?, nispa.

²⁵ Danmanta kajkunataj kuticherqanku: Ama qhapariykamuwaykuchu, pajtataj wakin runasniyku paciencianku tukukojtin maqaj jamusunkuman, wañuchisunkumantaj qantawan aylluykitawan.

²⁶ Ashkhas contrampi kasqankuta reparaspa Micaiaqa wasinman kutiriporqa, Danmanta kaj runastaj ñanninkuta riporqanku.

²⁷ Paykunaqa Micaiajpa ruwasqasninta apariykukuspa jinataj sacerdotentawan pusariykukuspa Laiskama chayarqanku. Chaypi runasqa mana imamanta dakuspa paykunallapi atienikuspataj kausakusharqanku, Danmanta kaj runastaj wañuracherqanku espadawan t'ojsiraspa, chay llajtatataj ruphaykucherqanku.

²⁸ Chay llajtaqa Sidonmanta karupiraj kasqanrayku, manataj waj llajtaswampis ni ima tratoyoj kasqanraykutaj, mana pipis jark'akoj karqachu. Chay llajtaqa Bet-rehob vallenejpi kasharqa. Chaymantataj Dan ayllumanta kajkunaqa chay llajtata watejmanta jataricherqanku, chaypitaj tiyakapoj qhepakaporqanku.

²⁹ Ñaupajta sutin karqa Lais nisqa, paykunataj suticharqanku Dan nispa, yuyarikuspa Israelpa wawan ñaupa tatanku Dan chay sutiyoj kasqanrayku.

³⁰ Chaypi Danmanta kaj runasqa llajllasqa lantinkuta yupaychanankupaj sayaykucherqanku, sacerdotenkutaj Jonatán karqa, paytaj Moisespa allchhin Gersompa wawan karqa. Chay qhepamantaj Jonatampa mirayninmanta kajkuna Dampi sacerdotes karqanku, chay waj nacionman wijch'usqas kanankukama.

³¹ Chaypi karqa Micaiajpa ruwasqan lanteqa paykunawan khuska, Señorpa yupaychana wasin Silopi kanankama.