Jueces 16 - Qheshwa Biblia DC

Sansón Gaza llajtapi

¹ Uj p'unchay Sansonqa Gaza llajtaman rerqa. Chaypitaj rikorqa uj qhenchachakoj warmita, wasinman yaykuspataj paywan chay ch'isi puñorqa.

² Maypachachus Gazamanta kajkuna yacharqanku Sansón chay llajtapi kasqanta, chaypacha soldadoswan muyuykucherqanku tukuy llajtata, punkusnintataj qhawarqanku tukuynin ch'isita. Chay ch'isintaj ch'inlla qhepakorqanku q'ayantin sut'iyayta wañuchiyta yuyaspa.

³ Sansonqa chaupi tutakamalla chaypi puñorqa. Chay horasta jatarispataj llajtaj punkusninta sik'iparerqa pilaresnintinta trancanasnintinta ima, chantá lijrariykukuspa apakaporqa Hebrompa chimpampi kashan chay pata orqoman.

Sansonwan Dalilawan

⁴ Chaymanta qhepata Sansonqa sonqonta suwachikorqa Sorec vallemanta Dalila nisqa warmiwan.

⁵ Filisteosmanta kurajkuna rerqanku Dalilawan tinkoj, nerqankutaj: Sansonta wasanchay, tapuriy maymantachus chay jina t'ukuna kallpan jamusqanta, imaynatachus atipayta atiykuman; jinamanta wataykuspa sujetayta atinaykupaj, sapa ujniykutaj waranqa pachajniyoj qolqestakama qosqayku.

⁶ Chaypacha Dalilaqa Sansonman nerqa: Mañakuyki willanawaykita maymantataj chay chhika t'ukuna kallpayki jamusqanta. Imaynata wataspataj qanta sujetayta atiykumanri?

⁷ Sansontaj kuticherqa: Sichus wataykuwankuman mimbre sach'amanta qanchis watanaswan chayqa, kallpayta chinkachisaj mayqen runa jinallaman tukusaj.

⁸ Filisteospa kurajkunasnin aparqanku Dalilaman mimbre sach'amanta ruwasqa mosoj watanasta, chaykunawantaj Dalilaqa Sansonta wataykorqa.

⁹ Ñaupajmantaña Dalila chay wasimpi runasta pakaykorqa, qhaparerqataj: Sansón! Filisteos jap'ej jamushasunku! Chaypacha Sansonqa chay watanasta t'ipirparerqa uj mullphasqa ch'ankullaspis kankuman karqa jinata. Filisteostaj mana yachayta aterqankuchu maymantachus kallpan jamusqanta.

¹⁰ Dalilaqa Sansonman nerqa: Ch'aukiyawanki! Llullakushawarqanki! Kunanqa ari mañariyki willanawaykita imaynatachus watasqa kayta atiwaj chayta.

¹¹ Sansontaj kuticherqa: Sichus wataykuwankichejman simp'asqa mosoj watanaswan, manaraj pejpa watasqanwan chayqa, kallpayta chinkachisaj qankunamanta mayqen runa jinallataj kasaj.

¹² Chaypacha Dalilaqa simp'asqa mosoj watanasta oqharispa chaykunawan Sansonta wataykorqa, qhaparerqataj: Sansón! Filisteos jap'ej jamushasunku! nispa. Chaypacha Dalilaqa wasimpi runasta pakaykullasqataj. Sansontaj chay watanasta t'ipirparerqa uj ñañu q'aytusta jina.

¹³ Dalilaqa Sansonman nerqa: Ch'auki yashallawankipuni! Llullakushallawankipunitaj! Nillawayña, imaynatachus watasqa kayta atiwaj chayta! Sansontaj kuticherqa: Sichus qan chujchasniymanta awana k'aytuwan qanchis simp'asta ruwawankiman chayqa, sumajtataj uj estacawan clavaykuwaj pampaman chayqa, kallpay chinkanman qankunamanta mayqen runa jinallaman tukuyman. Chaypacha Dalilaqa Sansonta puñucherqa, chay qanchis simp'asninmanta jap'ispataj awasqa telatawan khuska simp'aykorqa.

¹⁴ Chaymantataj chay simp'asqasninmanta uj estacata pampaman jap'iykucherqa, chantá qhaparerqa: Sansón, filisteos jap'ej jamushasunku! nispa. Sansontaj sayariytawan, sik'irparerqa chay estacasta pampamanta, awana telatawan khuska.

¹⁵ Dalilataj nerqa: Llulla runa! Imaraykutaj niwanki munakuwasqaykitari? Kaypiwanqa kinsa kutistaña llullakuwanki, manarajtaj sut'inchawankichu maymantachus jamusqanta chay kallpayki.

¹⁶ Dalilataj kutin kutinta chayllatapuni mañakusqanraykutaj Sansonqa maytaña umanta nanachikorqa wañupuytaña munasharqa.

¹⁷ Chantaqa Dalilaman sut'incharqapuni chay pakasharqa chay imata: Mana ni pi jayk'ajpis chujchasniyta k'utuwanchu, imaraykuchus manaraj nacekusqaymantapacha Diospaj t'aqasqa kani nazareo nisqa runa jina. Sichus chujchasniyta k'utuwankuman chayqa, kallpayta chinkachiyman, uj mayqen runa jinalla mana kallpayojman tukuyman.

¹⁸ Kay kutipi Sansompa sonqonta yachaytawankama Dalilaqa filisteospa kurajkunasninman willacherqa kay jinata: Kunanqa jamuychej ari, Sansonqa sut'inchawanña sonqompi pakasharqa chayta! Chaypacha paykunaqa Dalilawan tinkoj rerqanku qolqeta apaspa.

¹⁹ Dalilaqa Sansonta puñucherqa umanta siriykuchispa arphisnin pataman, chaypachataj wajyarqa uj filisteo runata, chay qanchis simp'asninta k'utunampaj. Chaymantataj Dalilaqa ñak'arichiyta qallarerqa.

²⁰ Chaymantataj qhaparerqa: Sansón! Filisteos jap'ej jamushasunku! nispa. Sansontaj rijch'arerqa, yuyaspa ñaupaj kutispi jina kacharichikuspa ayqerikapunanta, jinapis mana yacharqachu Señorqa payta saqerparisqanta.

²¹ Chaypacha filisteosqa Sansonta jap'iytawankama ñawisninta orqhorparerqanku, Gaza llajtamantaj aparqanku, chaypitaj broncemanta cadena watanaswan jap'iykucherqanku, carcelpitaj jak'uchina rumita muyuchispa llank'acherqanku.

²² Chaywampis k'utuchikusqanmanta qhepaman Sansompa chujchasnenqa watejmanta wiñaykushallarqataj.

Sansompa wañuynin

²³ Filisteospa kurajkunasnin tantakorqanku kusikunankupaj atipasqankumanta jinataj Dagón diosninkuman uywa ñak'asqasta jaywanankupajwan. Takerqankutaj: “Diosninchej jaywawarqanchej enemigonchej Sansonta”.

²⁴ Rikuspataj chay llajtayoj runasqa takillarqankutaj, diosninkuta yupaychaspa kay jinata: “Noqanchejpa diosninchej enemigonchej Sansonta jaywawarqanchej, payqa campospi chajrasninchejta tukucherqa, ashkha llajta masisninchejtataj wañuracherqa”.

²⁵ May kusisqas kasharqanku, chayrayku mañarqanku carcelmanta orqhomunankuta Sansonta paykunata asichinampaj. Jinataj carcelmanta orqhospa payta qhawaspa mayta kusikorqanku, chaymantataj wasej sayantasnin chaupiman sayaykucherqanku.

²⁶ Chaymantataj Sansonqa pichus makinmanta pusarqa chay waynaman nerqa: Sayaykuchiway llujchhiykunaypaj jina kay wasej sayantasninman. Chaykunasman atiykurikuspa samarikuyta munani.

²⁷ Filisteospa tukuy kurajkunasninku chay wasipi kasharqanku, jinataj ashkha qharis, chantá warmispis kashallarqankutaj. Chay jawa kashallarqankutaj uj kinsa waranqa runas jina aswan pata kaj wasipi, paykunaqa qhawakusharqanku asikuspa imastachus Sansonwan ruwasharqanku chaymanta.

²⁸ Chaypacha Sansonqa Señorta qhaparikorqa nerqataj: Mañarikuyki, Señor Diosníy, noqamanta yuyarikunaykita uj kutillatawampis, jinataj kallpata qorinawaykita kay filisteosmanta pagachikapunaypaj iskaynin ñawisniymanta.

²⁹ Chay qhepantaqa makisninwan mask'arqa chay wasej iskay chaupi sayantasninta, chaykunalla tukuy wasitaqa sujetasharqanku, iskaynin sayantasmantaj churarqa makisninta, ujninman pañata ujninmantaj lloq'eta, chanta tukuy kallpanwan sinch'ita ñit'erqa.

³⁰ Sansontaj qhaparerqa: Noqawan khuska wañuychej filisteo runas!, nispa. Chaymantaqa ñit'erqa tukuy kaj kallpanwan, chay jatun wasitaj urmaykorqa filisteospa kurajkunasninkoj patanman, chaypi kasharqanku tukuy chaykunaspa patanmanwan. Sansón kausashaspa wañuchisqanmanta nisqaqa astawanraj chay kutipeqa wañucherqa.

³¹ Chay qhepantataj jamorqanku Sansompa hermanosnin, tukuy ayllusnimpis, ayanta oqharispataj p'ampamorqanku Manoa tatampa sepulturanman, chaytaj kasharqa Zorawan jinataj Estaolwan chay chaupinejpi. Iskay chunka watata Sansonqa israelitasta kamacherqa.