Josué 22 - Qheshwa Biblia DC

Kinsa ayllus jallp'ankuman kutipunku

^1-2 Chaymanta Josueqa wajyarqa Rubén aylluta, Gad aylluta, Manasespa khuskan aylluntawan, nerqataj: Qankunaqa junt'ankichej Señorpa kamachin Moisés imastachus kamachisorqachej chayta, noqa imatachus kamacherqaykichej chaytapis kasuwarqankichej.

³ Kunan p'unchaykama, tukuy kay p'unchaykunapi wauqesniykichejta mana sapankuta saqerparinkichejchu, Señor Diosniykichejpa kamachisqasnintaqa allintapuni junt'ankichej.

⁴ Kunanqa Paypis imatachus qosqaykichej nisqanta junt'an, wauqesniykichejpaj sonqo tiyakuy tiyanña. Chaynejta kunanqa toldosniykichejman kutipuychej, ima jallp'atachus jap'ikusqaykichejman, Jordán mayu chimpapi Señorpa kamachin Moisés qosorqachej chayman.

⁵ Kunanqa kayllata mañakuykichej, kamachiykunata, Señorpa kamachin Moisés ima kamachiytachus qosorqachej chaykunata sumajtapuni junt'aychej. Niyta munani, Señor Diosniykichejta munakuychejpuni, ñankunasnintapuni puriychej, kamachisqasninta kasuychejpuni. Payta qhatiychejpuni, tukuy sonqowan, tukuy almawantaj kamachisusqaykichejta ruwaychej.

⁶ Chaymanta Josueqa allillanta ripuychej, nispa, kacharpayarqa, paykunataj chay toldosninkuman riporqanku.

⁷ Manasespa khuskan ayllunmantaj Moisesqa jallp'ata qosqa Basán nisqa chaynejpi. Manasespa wakin khuskan ayllumantaj Josué jallp'ata qorqa Jordán mayoj inti chinkaykuyninnejpi, israelita wauqesnimpa chaupimpi. Paykunatapis Josueqa, allillanta ripuychej, nispa, toldosninkuman kachapullarqataj.

⁸ Chaypachataj paykunaman nerqa: Kunanqa qankuna jallp'aykichejman kutipuychej ashkha imasniyoj, ashkha uywasniyoj, qoriyoj, qolqeyoj, bronceyoj, fierroyoj, ashkha p'achasniyoj ima. Ajinata enemigosniykichejmanta qhechusqaykichejtaqa wauqesniykichejman qoriychej.

⁹ Ajinata Rubén ayllu, Gad ayllu, Manasespa khuskan ayllun ima t'aqakorqanku wakin israelitasmanta Silopi, Canaán jallp'api, Galaadpi jallp'ankuman kutipunankupaj, mayqen jallp'atachus Señorqa Moisesman kamacherqa paykunaman qonanta, chayman.

Jordán mayu cantopi altar

¹⁰ Chay kinsantin ayllus, Rubén ayllu, Gad ayllu, Manasespa khuskan ayllun ima Jordán mayu cantoman chayaspa, Canaán jallp'allapiraj, uj altarta perqarqanku chay mayu cantopi.

¹¹ Wakin israelitastaj yacharqanku Rubén ayllu, Gad ayllu, Manasespa khuskan ayllun imaqa Canaán jallp'aj mojonnimpi uj altarta ruwasqankuta, Jordán mayu cantopi israelitaspa jallp'ampi.

¹² Israelitastaj chayta yachaytawan Silopi tantakorqankupacha, paykunawan maqanakoj kachaykukunankupaj.

¹³ Amaraj imapis kashajtintaj, Rubén aylluman, Gad aylluman, Manasespa khuskan ayllunman ima, sacerdote Eleazarpa wawan Fineesta kacharqanku.

¹⁴ Paywantaj rerqanku chunka israelitaspa kurajkunasninku sapa uj ayllumanta ujkama.

¹⁵ Tukuyninku rerqanku Galaadman, maypichus kasharqanku Rubén ayllu, Gad ayllu, Manasespa khuskan ayllun ima chayman, chayaspataj nerqanku:

¹⁶ Noqaykoqa Señorpa tukuy llajtampa sutimpi nishayku. Imatataj kayta israelitaspa Diosnimpa contranta ruwankichejrí? Imajtintaj Diosta saqenkichejri, uj altartataj ruwankichej Señorpa contrampi oqharikuspa?

¹⁷ Manachu Peorpa juchanta rikuspapis wanankichej, pinejtachus kunankama mana allimpaj qhawasqa kasqanchejta, chaynejtataj ashkha Señorpa llajtan wañusqanta?

¹⁸ Manachu chaywanqa wanankichej, imapajtaj kunan qankunapis Señormanta t'aqakunkichejrí? Kunanqa qankuna Señorpa contranta juchallikusqaykichejrayku, q'aya Señorqa israelitaspa contranta phiñarikonqa.

¹⁹ Sichus kay jap'ikusqaykichej jallp'a mana allinchu rijch'asunkichej chayqa, Señorpa jallp'anman jampuychej ari, maypichus Señorpa ajllakusqan jallp'a kashan chayman. Noqaykoj chaupiykupi tiyakuychej. Señorpa contrantataj ama juchallikuychejchu, amataj noqaykoj contraykumampis tukuychejchu, Señorninchejpa altarnin jawa waj altarta ruwaspa.

²⁰ Yuyarikullaychejtaj Zaraj wawan Acán, Señorpaj rikuchiku jina ruphachisqa kanan kajta, chinkachisqataj kanan karqa chayta, pakaykusqanmanta Señorqa phiñarikorqa tukuy israelitaspa contranta. Jinamanta chaypacha mana Acanllachu juchasninrayku wañorqa.

²¹ Chaymanta Rubén ayllu, Gad ayllu, Manasespa khuskan ayllun ima, israelitaspa kurajkunasninman kuticherqanku:

²² Tukuy dioskunaj Diosnin Señor yachan, mana Señorpa contrampichu, nitaj paymanta t'aqakunaykuraykuchu kay altarta ruwasqaykuta. Pay yachan imaynachus kasqaykuta, qankunamampis yachachisunkichej. Sichus Señorpa contranta, paymanta t'aqakunaykurayku chay imasta ruwayku chayqa, kunampacha wañurachiwayku.

²³ Sichus kay altarta ruwayku Señorta wasanchaspa, paymantataj t'aqakunaykurayku chayqa, chayri ruphachinata chaypi jaywanaykurayku, ch'aki mikhuymanta rikuchikuta, chayrí allinyakuy rikuchikuta chayqa, kikin Señorpuni cuentata mañawachuyku.

²⁴ Noqaykoqa cheqamanta kayta ruwayku, yuyaspa, mayk'ajpis wawasniykichej wawasniykuman ama kay jinata ninankupaj: Ima ruwanaykichej tiyan qankuna Señorwan, israelitaspa Diosninwan?

²⁵ Señorqa Jordán mayumanta jaqayman churasunkichej Rubén aylluta, Gad aylluta, ima. Chayrayku qankunaqa mana imatapis ruwanaykichejchu tiyan Señorwanqa. Ajinamanta wawasniykichejqa wawasniykuta Señorman k'umuykuyta saqechinkuman.

²⁶ Chayrayku ninakorqayku: Ruwanachej uj altarta, mana q'apaj imasta chaypi jaywanaypajchu, nitaj rikuchikusta chaypi jaywanaykupajchu.

²⁷ Manachayqa, chay kanampaj uj señal, qankunawan noqaykuwanqa ujlla kasqanchejta, mirayniykichejwan, noqaykuwan khuska Señorninchejpa kamachisqanta ruwanaykupaj, qayllanaykupajtaj sumaj imasta oqharisqas, juchasniykumanta rikuchikusniykutapis payman jaywanaykupaj, jinallataj allinyakuy rikuchikutapis. Ajinamanta qankunaj mirayniykichejqa, mirayniykuman ama ninankupaj: Qankunaqa mana ima ruwanaykichejchu tiyan Señorwanqa, nispa.

²⁸ Noqaykoqa yuyayku, sichus pipis niwasqayku, chayri qhepaman mirayniykuman, chaypacha noqaykoqa nisqayku: Qhawariy, ñaupa tatasniyku kay waj altarta Señorpaj ruwasqanku, mana sumaj q'apashajkunata ruphachinankupajchu, nitaj rikuchikusta chaypi ruphachinankupajchu, manachayqa uj señal jina kanampaj qankunapajwan noqaykupajwan.

²⁹ Ama jayk'ajpis jinaqa kachunchu Señorpa contran kanaykoqa, chayri ama jayk'ajpis Señormantaqa t'aqakusqaykuchu, ajinata altarta ruwaspa chaypi q'apaj imasta ruphachinaykupaj, ofrendata apanaykupaj, chayri rikuchikuta chaypi ruphachinaykupaj. Chaypaj tiyanña Señor Diosniykoj altarnin Dioswan tinkukuna toldoj ñaupaqempi, nispa.

³⁰ Chayta uyarispataj sacerdote Fineeswan, israelitaspa kurajkunasninwan, chay chhika israelitaspa miraykunasninmanta kurajkunaspiwan rejkuna ima, Rubén aylloj parlasqanta, Gad aylloj parlasqanta, Manasespa khuskan ayllumpa nisqantawan repararqanku allin kasqanta.

³¹ Sacerdote Eleazarpa wawan Fineestaj paykunaman nerqa: Kunanqa allinta yachayku Señorqa noqaykuwan kashasqanta, imaraykuchus qankunaqa mana Señorpa contrantachu ruwayta munarqankichej, ajinamanta kunanqa Señor mana jasut'iwasqaykuchu.

^32-33 Sacerdote Eleazarpa wawan Finees, paywan rejkuna ima tinkunakama kachun nispa riporqanku, kutiporqankutaj Galaadpi kashan chay Canaanman, maypichus israelitas kasharqanku chayman. Israelitastaj chay kinsa aylluspa parlasqanta uyarispa chay kachasnejta, nerqanku chay ruwasqankoqa sumajpacha kasqanta, Diostataj yupaycharqanku. Chaymantapacha manaña wichariyta yuyarqankuchu, maqaspa chinkachimuyta Rubén aylluta jinataj Gad ayllutapis.

³⁴ Rubén aylluwan, Gad aylluwantaj altarta señal nispa suticharqanku, nispa: Kay altarqa uj señal kanqa, noqanchej ukhupi Señorqa Dios kasqanta.