Hechos 9 - Qheshwa Biblia DC

Saulo Señor Jesuspi creen

¹ Chaykamataj Sauloqa, munashallarqapuni Señor Jesuspi creejkunata ñak'arichiyta, wañuchiyta ima. Chayrayku rerqa jatun sacerdotewan parlaj.

² Paymantataj mañarqa ordenta, Damascopi kaj sinagogaspi rikuchimunampaj. Señorpa ñanninta qhatejkunata, qharista warmista ima, tarispataj jap'iytawan watasqasta Jerusalenman apanampaj.

³ Ñanta rishaspa Damasco llajtaman qayllashajtinña, cielomanta ujllata uj k'anchay Saulota muyuykorqa.

⁴ Paytaj pampaman urmaspa parlamojta uyarerqa: Saulo, Saulo, imaraykutaj qhatiykachashawankiri?

⁵ Saulotaj nerqa: Pitaj kanki, wiraqochi?, nispa. Parlamojtaj kuticherqa: Noqa kani Jesús, pitachus qan qhatiykachashanki chay. [Manamin allinchu qampajqa yunta jina aguijompa puntanta jayt'anaykeqa.

⁶ Saulotaj mancharisqa kharkatitispa nerqa: Señor, imatataj munanki ruwanayta? Jesustaj payman kuticherqa:] Jatarispa llajtaman yaykuy, chaypitaj nisonqanku imatachus ruwanaykita.

⁷ Saulowan rejkunataj, manchariywan mana parlariyllatapis aterqankuchu, parlamojllata uyarerqanku cheqamanta, nitaj ni pita rikuspa.

⁸ Saulotaj pampamanta sayarispa, ñawisninta kicharerqa, manataj imatapis rikuyta aterqachu. Makinmanta pusaspataj Damasco llajtaman yaykorqanku.

⁹ Chaypitaj karqa kinsa diata mana rikuspa, mana mikhuspa, nitaj ujyaspa.

¹⁰ Damasco llajtapitaj Ananías sutiyoj yachachisqa karqa. Señor Jesustaj mosqoypi jina rikhurispa payman nerqa: Ananías, nispa. Paytaj kuticherqa: Kaypi kashani Señor.

^11-12 Señortaj payman nerqa: Jatariy, riytaj Cheqan sutiyoj calleman. Judaspa wasimpitaj tapukuy Tarso llajtayoj Saulomanta, imaraykuchus payqa Diosmanta mañakuspa kashan; chantá mosqoypi jina rikorqa Ananías sutiyoj qharita, yaykumuspa payman makisninta churaykojta, watejmanta ñawisninwan qhawarinampaj.

¹³ Ananiastaj kutichispa nerqa: Señor, ashkha runasña willawanku imaynatachus chay Sauloqa Jerusalempi, qampi creejkunata anchata ñak'arichisqanta.

¹⁴ Kay llajtamampis jamun, kuraj sacerdotespa ordenninwan qampi creejkunata jap'ichinampaj.

¹⁵ Señortaj nerqa: Riy payman. Noqa ajllani payta kamachiy kanampaj, noqamantataj willanampaj waj llajtayoj runasman, reykunaman, ajinallatataj israelitasmampis.

¹⁶ Noqa payman rikuchisaj may chhikatachus sutiyrayku ñak'arinanta.

¹⁷ Chantá Ananiasqa wasiman yaykuspa, Sauloman makisninta churaykorqa, nerqataj: Hermano Saulo, Señor Jesús, pichus kayman jamushajtiyki ñampi rikhurisorqa, pay kikin kachamuwan watejmanta qhawarinaykipaj, Santo Espirituwantaj junt'asqa kanaykipaj.

¹⁸ Chay kikimpachataj, Sauloj ñawisninmanta qherpas jina t'akakorqa, watejmantataj rikorqa. Jatarispataj bautizachikorqa.

¹⁹ Chaymantataj Sauloqa, mikhuspa ujtawan kallpachakorqa. Chaypitaj qhepakorqa pisi p'unchaykunata, Damascopi kaj yachachisqaswan.

Saulo willan Jesusmanta Damascopi

²⁰ Saulotaj chay kikimpacha willayta qallarerqa sinagogaspi, Jesusqa Diospa Churin kasqanta.

²¹ Saulota uyarejkunataj, t'ukuspa tapunakusharqanku: Manachu kay runaqa Jerusalempi, Jesuspa sutimpi creejkunata qhatiykachasharqa chinkachinampaj? Manachu kaymampis jamun, paykunata watasqasta apanampaj jatun sacerdotesman?

²² Saulotajrí astawan kallpachakuspa sut'ita willarqa Jesusqa Cristopuni kasqanta, Damascopi tiyakoj israelitastaj mana ima niyta aterqankuchu.

Saulo ayqen israelitasmanta

²³ Unayninmantaj, judíos tantakuspa yachachinakorqanku Saulota wañuchinankupaj.

²⁴ Saulotaj yacharqa chay wakichikusqankuta. Tuta p'unchaytaj llajta llojsina punkuspi suyasharqanku payta wañuchinankupaj.

²⁵ Uj ch'isitaj yachachisqas, Saulota uj jatun canastaman churaykuspa perqannejta uraykucherqanku.

Saulo Jerusalempi

²⁶ Jerusalenman chayaspataj, Sauloqa creejkunawan tantakuyta munarqa. Tukuyninkutaj paymanta manchachikorqanku. Paykunaqa mana creerqankuchu Saulo creejña kasqanta.

²⁷ Chaymantataj Bernabé sutiyoj, Saulota pusarqa apostolesman rejsichinampaj. Paykunamantaj willarqa Sauloqa Señor Jesusta ñampi rikusqanta, imaynatachus payman Jesús parlasqanta, Damascopipis mana manchachikuspa Jesuspa sutimpi willasqanta.

²⁸ Ajinamanta Sauloqa creejkunawan Jerusalempi qhepakorqa. Paykunawan khuskataj llojserqa yaykorqataj, tukuy sonqotaj Jesusmanta willarqa.

²⁹ Ajinallatataj parlarqa, churanakuspa griego parlajkuna israelitaswan. Paykunataj Saulotaqa wañuchiytapuni munasharqanku.

³⁰ Chayta yachaspataj hermanosqa Saulota pusarqanku Cesarea llajtaman. Chaymantataj Tarsoman kachaporqanku.

³¹ Ajinamanta iglesiaqa sonqo tiyasqalla kasharqa tukuy Judeapi, Galileapi, Samariapi ima. Creejkunataj kallpachakuspa yapakusharqanku, Señorta kasuspataj purisharqanku. Santo Espiritutaj paykunata yanaparqa sonqochaspa.

Eneas thañikapun

³² Pedrotaj tukuynejta purerqa. Uj kutitaj, Lida sutiyoj llajtaman chayaspa, creejkunata watukorqa.

³³ Chaypitaj tinkukorqa Eneas sutiyoj runawan. Payqa suchuyaspa pusaj watataña puñunanmanta mana sayarisqachu.

³⁴ Pedrotaj payman nerqa: Eneas, Jesucristo thañichisunki, sayariy puñunaykitataj mast'ay. Eneastaj sayarerqapacha.

³⁵ Lidapi, Sarón llajtapi tiyakojkuna ima, Eneasta rikuspa, Señorman kutirikorqanku.

Dorcas wañusqamanta kausarimpun

³⁶ Chaypacha Jopepi tiyakorqa uj creej warmi, Tabita sutiyoj. Griegopi niyta munan Dorcas. Paytaj sumaj ruwanasta ruwaspapuni kaj, wajchastapis yanapaspa.

³⁷ Chaypachataj Dorcas onqoykuspa wañuporqa. Ayanta mayllaspataj altopata wasiman churarqanku.

³⁸ Jope llajtaqa mana karupichu karqa Lidamanta. Lidapi Pedro kasqanta yachaspataj, creejkuna kacharqanku iskay qharista, kayta nichispa: Ama jinachu kay, kunampacha jamuriwayku.

³⁹ Pedrotaj paykunaman rerqa. Jopeman chayajtinkutaj viudas altopataman wicharicherqanku, viudastaj waqaspa rikucherqanku p'achasta, almillasta ima Dorcaspa ruwasqasninta paykunawan kashaspa.

⁴⁰ Pedrotaj tukuyninkuta jawaman llojsicherqa, qonqoriykukuspataj Dios Tatamanta mañakorqa. Wañusqata qhawarispataj nerqa: Tabita, jatariy, nispa. Paytaj ñawisninta kicharispa Pedrota rikorqa, tiyaykamorqataj.

⁴¹ Pedrotaj makinmanta aysarispa sayaricherqa. Chaymantataj creejkunata, viudastawan wajyaspa, Dorcasta kausashajta paykunaman rikucherqa.

⁴² Chay kausarichisqantaj tukuy Jope llajtapi yachakorqa, ashkha runastaj Señor Jesucristopi creerqanku.

⁴³ Pedrotaj Jopepi unayta qhepakorqa, curtidor Simompa wasimpi.