Hebreos 11 - Qheshwa Biblia DC

Creey imatataj niyta munanri?

¹ Creeyqa suyakusqasninchejpa sinch'i sayaynin, mana rikusqanchejpata rikuchiynin.

² Ñaupa tatasninchej ferayku allimpaj qhawasqas karqanku.

³ Creespa yachanchej kay pachakuna Diospa palabranrayku wakichisqas kasqankuta. Chayrayku rikusqanchejqa mana rikukojkunamanta ruwasqas karqanku.

⁴ Creespa Abelpis aswan allin uywa wañuchisqata Diosman qorqa Cainmanta nisqaqa. Chaywantaj Dios rejsichej allin kasqanta. Diospis Abel rikuchikusta jaywasqanrayku, allinta paymanta willarqa; feninraykutaj wañusqapis chayta parlashallanrajpuni.

⁵ Creespa Enocqa mana wañuyta rikuspa apasqa karqa; manataj payta tarerqankuchu, Dios payta apakapusqanrayku. Manaraj apasqa kashajtin, yachakorqaña Dios payta munakusqanta.

⁶ Mana creespaqa, mana atinchejchu Diospa sonqonta kusichiyta; imaraykuchus Diosman qayllaykojqa, creenan tiyan Dios kasqanta, payta mask'ajkunamantaj t'inkachej kasqanta.

⁷ Creespa Noeqa Diosmanta yachachisqa karqa, chay manaraj rikukoj imasmanta; manchachikuywantaj arcata wakicherqa, familiampis salvasqa kanampaj; chay feraykutaj mundota juchacharqa, feraykullataj Diosmanta cheqan kajpaj qhawasqa karqa, chayaqeyojtaj rikhurerqa.

⁸ Creesqanrayku Abrahampis wajyasqa kaspa, chayaqepaj jap'inan jallp'aman llojserqa, mana yachaspa maymanchus rishasqanta.

⁹ Creesqanrayku Diospa qonan jallp'aman tiyakoj rerqa, waj runakunaj jallp'anman; toldo wasispi tiyakuspa, Isaacwan, Jacobwan, paykunapis chay kikin qonan kasqallanmantataj, paywan khuska chayaqeyoj karqanku.

¹⁰ Sinch'i sayaj llajtata suyasharqa, mayqentachus kikin Dios wakicherqa, sayacherqataj.

¹¹ Creesqanrayku kikin Sarapis, payaña kaspa mana wachakoj, wijsallikorqa kallpata jap'ispa; imaraykuchus payqa creerqa Dios imatachus qosaj nisqanta junt'ananta.

¹² Chay jinamanta, uj runamanta wañusqa jina kajmantaña, patapi qoyllurkuna jina runa mirarqa, mar qocha cantompi t'iyu jinataj, mana yupay atina.

¹³ Creespa tukuyninku wañuporqanku, chay Diospa qonan kasqanta manaraj jap'ishaspa; astawanqa karullamanta chay imasta qhawaspa, creespa, napaykuspataj; ajinamanta, kay pachapi purej runas jina, mana llajtayoj kasqankuta rejsicherqanku.

¹⁴ Chay jinata nejkuna sut'ita rejsichinku, waj llajtata mask'asqankuta.

¹⁵ Cheqamanta, sichus yuyankuman llojsimorqanku chay llajtamanta chayqa, kutiripuyta atinkuman karqa.

¹⁶ Chaywampis, aswan sumaj llajtata munasharqanku, chay janaj pachapi kajta. Chayrayku Diosqa mana p'enqakunchu paykunaj Diosninku kayta, imaraykuchus paykunapaj uj llajtata wakichiporqa.

¹⁷ Creesqanrayku Abrahamqa tentasqa kaspa, Isaacta k'ata wawanta, rikuchikupi jaywarqa, pichus Diospa qonanta jap'inan kajta.

¹⁸ Dios payman nerqa: Isaacnejta miray kapusonqa, nispa.

¹⁹ Abrahamqa yuyasharqa Dios atiyniyoj kasqanta wañojkunasnintinta kausarichinampaj. Chayrayku nisunman, wañusqas ukhumanta churinta watejmanta jap'ikaporqa.

²⁰ Creesqanrayku Isaacqa Jacobta bendicerqa, Esautawan, yuyaspa chay qhepa jamoj imaspi.

²¹ Jacobpis creesqanrayku, wañupushaspaña Josejpa sapa uj wawasninta bendicerqa, Diostataj yupaycharqa tojnunman atiykukuspa.

²² Creesqanrayku Joseqa wañuy patapi kashaspa, Israelpa wawasnin Egiptomanta llojsinanku kasqanta willarqa, kamacherqataj imatachus tullusninwan ruwanankuta.

²³ Creesqanrayku Moisés nacikojtinkama, kinsa killa junt'ata tatasnin pakaykorqanku, k'acha wawita kasqanrayku, reypa kamachisqanta mana manchachikuspa.

²⁴ Creesqanrayku Moisesqa jatunña kaspa, mana munarqachu faraompa ususimpata wawan nisqa kayta.

²⁵ Astawanqa, Diospa llajtanwan llakisqa kayta ajllakorqa; manataj munarqachu pisi p'unchaykunapaj kusikuspa jucha kausaypi puriyta.

²⁶ Aswan jatun kapuypaj qhawarqa Cristoj k'umuykachakuyninkunasta, Egipto llajtayojkunaj qhapaj kapuyninkumanta nisqaqa. Payqa jamoj t'inkataña qhawasharqa.

²⁷ Creesqanrayku Egiptomanta riporqa, reypa phiñakuyninta mana manchachikuspa; kallpachakuspataj sayarqa, mana rikukoj Diostapis rikushanman jina.

²⁸ Creesqanrayku Pascuata ruwarqa, yawarwantaj ch'ajchorqa, kuraj kaj qhari wawasta wañuchej ángel ama imananampaj.

²⁹ Creesqankurayku israelitasqa puka mar qochaj chaupinta, ch'aki jallp'ata chimparqanku; Egipto llajtayojkunataj, jinallatataj ruwayta munaspa yakuwan p'ampachikorqanku.

³⁰ Creesqankurayku Jericó llajtaj perqasnin urmarqanku, qanchis diata israelitas muyuykojtinku.

³¹ Creesqanrayku Rahab, khuchi purej warmi, mana wañorqachu Diosta mana kasojkunawan khuska, wateqajkunata tukuy sonqo wasinman wajyaykusqanrayku.

³² Imatawanraj nisajri? Mana atinichu pisi tiempopi willayta Gedeonmanta, Barajmanta, Sansonmanta, Jeptemanta, Davidmanta, Samuelmanta, profetasmanta ima.

³³ Paykunaqa creesqankurayku suyu kamachejkunata atiparqanku, cheqan kajta ruwarqanku, Diospa qonan kasqanta jap'erqanku, leonespa simisnintapis wisq'arqanku.

³⁴ Paykuna ninaj kallpanta thasnorqanku, cuchilloj filonmanta ayqerqanku, onqoykunamanta walejyakaporqanku, maqanakuspi sinch'ita sayaykorqanku, waj llajtayojkunaj yupa soldadosninta t'usterqanku, ayqecherqankutaj.

³⁵ Wakin warmispis wañusqasninkuta kausarimuynejta jap'ikaporqanku. Wakin runastaj aysasqas ñak'arerqanku, kacharisqas kaytataj mana munarqankuchu; imaraykuchus yacharqanku aswan allin kausarimpuyta jap'inankuta.

³⁶ Wakinkuna asipayachikorqanku jasut'ichikorqan kutaj; astawanqa carcelespi watasqas wisq'achikorqanku.

³⁷ Wakintaj rumiswan ch'anqasqas, serruchowan khuchusqas, tentasqas, espadawan wañuchisqas ima karqanku. Kaymanta jaqayman purerqanku oveja qaraswan, cabra qaraswan p'achallisqas, mana imayoj, llakisqas, maqasqas ima.

³⁸ Mundoqa mana paykunapaj jinachu karqa. Ch'in pampaspi, orqospi, qaqa jusk'uspi, jallp'a toqospi ima chinkasqas purerqanku.

³⁹ Tukuy kaykunataj, creesqankurayku allimpaj rejsisqas karqanku; chaywampis Diospa qonan kasqanta mana jap'erqankuchu.

⁴⁰ Diosqa aswan allin imasta noqanchejpaj wakichisharqa; mana noqanchejwan khuskarí, paykunapis mana allinchasqa kayta aterqankuchu.