Habacuc 1 - Qheshwa Biblia DC

¹ Kay willayta, Señorqa sut'incharqa profeta Habacucman. Habacuc quejakun Señorman mana allin kajmanta.

² Señor, mayk'ajkamataj qhaparimusqayki yanapariway nispa, manataj uyarichikuspa? Mayk'ajkamataj qhaparikamusqayki kay millay ruwaykunasmanta, manataj qan jamunkichu kacharichiwaj?

³ Imaraykutaj rikuchiwanki chay chhika ñak'ariyta juchatapis? Millay ruwaykunawan tukuchinakuywantaj muyurisqa kani; tukuynejpi kashan, phiñakuykunas, maqanakuykunapis.

⁴ Mana leyman jinachu imapis ruwakun, nitaj respetopis wajpaj kanchu. Sajra kajqa allin kajta chinkachiyta munan, justiciapis q'ewisqa.

Señorpa kutichisqan

⁵ Qhawariychej muyuyniykichejpi chay nacionesta. Qhawariychej maytataj mancharikuychej junt'achikuychej. Uj imasta ruwanaypaj jina kashani, pi willarisojtiykichejpis mana sina creewajchejchu.

⁶ Caldeosta guerrapi maqanakunankupajpacha, paykuna sajra runas kanku. Kay pachata uj ladomanta uj ladoman correykachasqallankupuni kanku, wajpaj jallp'asninta dueñochakuspa.

⁷ Manchay t'ukuna mancharikunataj kanku mana rejsinkuchu waj leyta paykunajmanta nisqaqa.

⁸ Caballosninkupis tigresmanta aswan usqhayta purinku ch'in pampapi atojkunamantapis aswan manchachikuna, phiña animales kanku. Caballospi correjkunasninkupis ashkhamanta, sinch'itataj correrqanku, karumantapachataj jap'ej phinkiykorqanku imaynatachus águila jap'ej imamampis phinkiykun jinata.

⁹ Pasaj jinataj tukuyta phiriranku; chay risqankupitaj llakiykunasta tarpunku. Preso kayman urmachisqankuri mar qochaj t'iyunmanta aswan ashkha.

¹⁰ Reyesmanta asiykukunku, jinataj chay wiraqochisninkumantapis. Chay sinch'i pakakuna wasisninkumantapis asiykukunku, ñaupaqempitaj jallp'a qollusmanta ñankunasta ruwarikunku, atipaykuytawantaj jap'ikapunku.

¹¹ Jatun muyoj wayra jina pasanku, rejsinkutaj kallpallankuta uj diosninkuta jina.

Habacuc watejmanta quejakullantaj

¹² Señor, manachu qanqa mana jayk'aj wañoj wiñay wiñaypaj kausaj Santo Diosniy kankiri? Waqaychaj Señorníy, qanmin caldeosman kallpata qorqanki justiciaykita ruwanankupaj.

¹³ Qanqa ancha llimphupuni kanki sajra juchata jap'ikunayllaykipajqa, chay sajra ruwaykunatapis kusiywan qhawakunaykipajqa; imaynatataj ari qhawakullanki chay millay ruwajkunatari, ch'inllataj kanki uj sajra runa paymanta allin runa kajta wañuchinankamari?

¹⁴ Imaraykutaj chay runaswan ruwanki mar qocha challwaswan jina animaleswan jinataj mana pi kamachejniyojtari?

¹⁵ Caldeosqa, waj nacionesta jap'iykapunku imaynatachus challwa jap'ej runa challwata jap'iykakapun ajinata. Anzueloswan ch'ipaswantaj jap'ej rinku, chantá tukuyta qollullata challwasta rikuspataj mayta kusirikunku, ajinata caldeospis ruwanku.

¹⁶ Chayraykumin challwa jap'ejkunaqa chay anzuelosninkuta ch'ipasninkutapis munakunku, chayraykutaj rikuchikusta jaywanku, inciensostapis q'osñichinku, agradecekuspa chaykuna ashkhata allintataj mikhuchisqanmanta.

¹⁷ Ajinatachu, caldeosqa ch'ipasninkuwan jap'irallawasqaykupuni? Runastapis mana uj chhikanta khuyarispa wañuchillanqankupunichu?