Génesis 33 - Qheshwa Biblia DC

Jacobwan Esauwan allinyanakunku

¹ Jinata rishaspa Jacob qhawarerqa, rikorqataj Esauta tawa pachaj runasninwan jamushajta. Chayrayku wawasninta mamasninkuman pusariracherqa t'aqa-t'aqallata: Leaman, Raquelman, iskaynin kamachisninmanwan.

² Ñaupaj puntamanqa churarqa kamachisnintaraj wawasnintawankama, chaymanta Leata wawasnintawan, qhepa puntamantaj Raquelta wawan Josetawan.

³ Jinaytawantaj Jacobqa ñaupaykuspa, qanchis kutita qonqorikuspa, wauqen Esauman qayllarqa.

⁴ Esautaj corrispa Jacobta kunkanmanta ojllaykuspa much'aykorqa. Jinaytawantaj iskayninku waqarikorqanku.

⁵ Chaymanta Esauqa warmista wawastawan qhawarispa, wauqenta taporqa: Kaykuna pistaj kankurí?, nispa. Jacobtaj nerqa: Kaykunaqa kanku kamachiykej wawasnin, mayqenkunatachus Dios qowarqa.

⁶ Jinata nishajtinkutaj iskaynin kamachis sapa uj wawasninkuwan Esauman qayllaykorqanku qonqoriykukuspa, pampakama umankuta chayachispa.

⁷ Qhepantataj Leañataj wawasninwan qayllaykorqa kikinta ruwaspa. Qhepa puntataj Raquelqa Josewan kikillantataj qonqorikuspa.

⁸ Chantá Esaú taporqa Jacobta: Imatataj yuyanki kay chhika t'aqastawan taripasusqaywanrí? Jacobtaj nerqa: Qampa k'acha kayniykita tariyta munaspa jamushani.

⁹ Esautaj nerqa: Mana wauqéy, noqajtaqa tiyapullawan, qampata kajqa, qampata kakullachun.

¹⁰ Jacobqa nillarqapuni: Sichus noqapaj k'acha kanki chayqa, jap'ikullaway kay qosusqasniyta, qanta rikuspaqa kikin Diostapis rikushayman jina kani, qan may k'acha sonqowan suyawasqaykirayku.

¹¹ Jap'ikullayña kay uywasta, mana imaypis pisipuwanchu. Chay jinatapuni Jacob nejtenqa, ñak'aymanta Esauqa jap'erqa chay tukuy ima qosqanta.

¹² Chaymantataj Jacobman nerqa: Jina kajtenqa jaku ripuna. Noqa ñaupaqeykita risaj.

¹³ Jacobtaj nerqa: Munasqa wauqéy, yachanki jina wawasniy pisisllaraj kanku, chantapis ovejasniy, wakasniy juch'uy uñasniyoj kanku, sayk'uspa uj p'unchayllachari wañurankuman.

¹⁴ Chaypajqa qanllaraj ñaupaykapushay kay kamachiykimanta. Noqaqa pisimanta pisi jamullasaj uywaspa, wawaspa thaskimusqanman jina. Chantá Seirpi tinkullasunchej.

¹⁵ Esautaj nerqa: Jina kajtenqa saqesqayki noqawan jamoj wakin runasta. Jacobtaj nerqa: Ama chaymantaqa llakikuychu; imaraykuchus qampi khuyakuyta tariniña.

¹⁶ Chay kikimpacha Esauqa Seirman kutiporqa.

¹⁷ Jacobtaj chaymanta riporqa Sucotman. Chaypi wasita ruwakorqa, jinallataj ch'ujllasta ruwarakorqa uywasnimpaj. Chayrayku chay cheqata suticharqa Sucot nisqata.

¹⁸ Jacobqa Padan-aranmanta allillanta, walejllataj chayarqa Canaanman. Chayman chayaspataj Siquem llajtaj chimpampi jarakorqa.

¹⁹ Chaypitaj jallp'ata rantikorqa Siquempa tatan Hamorpa wawasninmanta pachaj phisuswan, chaypi jarakorqa.

²⁰ Jinaspataj uj altarta ruwarqa, suticharqataj El-Elohe-Israelta.