Génesis 21 - Qheshwa Biblia DC

Isaac nacen

¹ Señorqa, Saraman imatachus qosqayki nisqanman jina, palabrasninta junt'arqa.

² Saraqa wijsayoj rikhurerqa. Jinamanta qosan Abrahampaj wawayoj karqa, Dios mayk'ajchus kananta nerqa chayman jina. Chaypacha Abrahamqa allin machuña karqa.

³ Abrahamqa warmin Sara nacechipusqan wawata Isaacta suticharqa.

⁴ Pusaj p'unchayninmantaj wawata circuncidarqa Diospa kamachisqanman jina.

⁵ Abrahamqa pachaj watasniyoj karqa wawan Isaac naceshajtin.

⁶ Chaypacha Saraqa unancharqa: Dios asichiwarqa, kunanqa kayta yachajkuna noqawan khuska asikonqanku.

⁷ Pitaj ninman karqa Abrahamman paypaj wawayojraj kanaytarí? Chaywampis payman wawata rejsichiniraj chay jina machuyaynimpi.

Agar Ismael wawanwan qharqosqas kanku

⁸ Isaacqa jatunña karqa, ñuñumantapis p'itisqaña. Chay p'itisqanku p'unchaypi Abrahamqa jatun mikhuykunasta wayk'ucherqa.

⁹ Saraqa rikorqa Abrahampa wawan Ismael, egipcia Agar kamachimpi karqa chay, Isaacta asipayashajta.

¹⁰ Chaymanta llojsiytawan Abrahamman nerqa: Kay kamachi warmita wawantinta qharqoy! Isaac wawallay tukuy chayaqeta jap'ikaponqa, kay kamachi warmej wawanrí mana imatapis paywan khuska jap'enqachu.

¹¹ Abrahamqa chayta uyarispa mayta llakikorqa, imaraykuchus wawallantaj Ismael kasqanrayku.

¹² Diostaj nerqa Abrahamman: Ama llakikuychu chay wawaykimanta, nitaj kamachiykimantapis. Kasuy warmiyki Sara imatachá nisunki chayta, qampa mirayniykeqa jatunyasqa Isaac wawaykinejta.

¹³ Kamachiykej wawanmantapis uj jatun nacionta wiñachisaj, qampa wawayki kasqanrayku.

¹⁴ Q'ayantin tutamanta Abrahamqa Agarpaj wakichiporqa, jaywarqataj t'antata, uj qara botaspi yakutawan. Jinaspataj Agarman wawan Ismaelta q'epiriykucherqa, kacharpayarqataj iskayninkuta. Chaymanta Agarqa riporqa mana yachaspa maymanchus rinanta, Beerseba ch'in pampaman chayanankama.

^15-16 Apakusqanku yakupis tukukapojtin, wawanta uj juch'uy sach'a uraman siriykucherqa, jinaspataj Agarqa karunejman rerqa, ama waway wañojta rikusajchu, nispa. Chaypi tiyaykukuspataj sinch'ita sonqo nanayta waqarikorqa.

¹⁷ Diostaj wawaj waqasqanta uyarimorqa, kachamorqataj janaj pachamanta uj angelta, Agarmantaj nerqa: Imanasunkitaj Agar? Ama phutikuychu, Dios uyarin wawaj waqasqanta maypichus kashan chaypi.

¹⁸ Sayariy, wawaykita makinmanta aysarimuy, noqa paymanta ruwasaj uj jatun nacionta.

¹⁹ Chaymanta Diosqa rikucherqa Agarman uj yaku pujyuta. Paytaj riytawan qara botasninman junt'aykucherqa, apamuspataj Ismaelman ujyacherqa.

²⁰ Ajinata Dios yanaparqa Ismaelta, paytaj wiñarqa, tiyakorqataj ch'in pampapi; chantaqa sumajtataj flechayta yacharqa.

²¹ Pay tiyakorqa Parán ch'in pampapi, mamantaj casaracherqa uj egipcia warmiwan.

Abrahamwan Abimelecwan uj tratota ruwanku

²² Chay tiempollapitaj Abimelecqa soldadosninta kamachejnin Ficolwan rerqanku Abrahamwan parlaj. Chayaspataj nerqanku: Rikuyku qanta Dios tukuy ima ruwasqasniykipi yanapasusqanta.

²³ Chayrayku qan niy ari Diospa sutinta oqharispa, ama ima sajratapis ruwanawaykita, ni wawasniypaj, nitaj mirayniypajpis. Nillaytaj ari allinta ruwanawaykita noqa imaynatachus ruwarqayki ajinata, jinallataj allinta ruwanaykita kay runaspajpis, mayqenkunaj llajtampichus tiyakushanki chaypi.

²⁴ Abrahamtaj kuticherqa: Arí, ajinata ruwasaj Diospa ñaupaqempi, nispa.

²⁵ Chanta Abrahamqa yuyaricherqa Abimelecpa kamachisnin uj yaku pujyunta qhechusqankuta.

²⁶ Abimelectaj nerqa: Kunankama mana yacharqanichu chayta, qampis chaymantaqa mana ima niwankichu, mana yachanichu pichus chayta ruwasqanta.

²⁷ Abrahamqa Abimelecman waqerqa ovejasta, wakasta; iskayninkutaj uj tratota ruwarqanku.

²⁸ Chanta Abrahamqa qanchis ovejasta wajnejman t'aqarqa.

²⁹ Abimelectaj nerqa: Imapajtaj chay qanchis ovejasta t'aqashankiri?, nispa.

³⁰ Abrahamtaj kuticherqa: Kay qanchis ovejasta qoshayki chayqa, kanqa yachakunampaj noqa kay yaku pujyuta ruwasqayta.

³¹ Chayrayku chay cheqata suticharqanku Beersebata. Imaraykuchus chaypi allin parlayman yaykorqanku iskayninku.

³² Chay tratota Beersebapi ruwaytawan Abimelecwan, general Ficolwan kutiporanku filesteospa llajtanman.

³³ Abrahamtaj uj tamarisco sach'ata chaypi tarporqa. Beersebapi Abrahamqa wiñay kausayniyoj Señor Diosmanta mañakorqa.

³⁴ Jinamanta Abrahamqa unayta tiyakorqa filesteospa jallp'ampi.