Filipenses 4 - Qheshwa Biblia DC

Señorpi kusikuychejpuni

¹ Chayrayku munasqa hermanosníy, qankunata mayta munashani rikuyta; imaraykuchus qankuna kusikuyniy pilluytaj kankichej. Kunanqa munakusqasníy, sinch'ita sayaychej Señorpi.

² Evodiata k'amini, jinallatataj Sintiquetapis, uj sonqolla Señorpi kanankupaj.

³ Jinallatataj qantapis mañakuyki, llank'aj masi, kamachiykitaj yanapanaykita chay hermanasta, imaraykuchus paykunaqa noqawan mayta kallpachakorqanku evangeliota willaspa. Clementepis, chay ujkunapis llank'aysiwarqanku. Paykunaj sutinkoqa kausay libropiña escribisqa.

⁴ Kusikuychejpuni Señorpi. Ujtawan niykichej, kusikuychej.

⁵ Tukuy yachachunku k'acha runas kasqaykichejta. Señorqa qayllapiña kashan.

⁶ Ama imamantapis llakikuychejchu, astawanqa Dios yachachun tukuy ima mañakusqaykichejta, majakuspa, graciasta qospataj.

⁷ Diospa sonqo tiyakuynintaj, tukuy runaspa yuyayninta atipan, waqaychanqataj sonqoykichejta, yuyayniykichejta ima Cristo Jesuspi.

Allin kajta yuyaychej

⁸ Kunanqa hermanos, yuyaychej tukuy cheqa kajpi, tukuy allin kajpi, tukuy cheqan kajpi, tukuy ima llimphu kaypi, tukuy allin munakuypi, tukuy ima allin sutiyojpi. Sichus ima atiyllapis kanman, imapis yupaychanapaj jina kanman chayqa, chaypi yuyaychej.

⁹ Chay yachasqaykichejta, jap'isqaykichejta, uyarisqaykichejta, rikusqaykichejta noqapi, chayta ruwaychej. Sonqo tiyaykuchej Diostaj qankunawan kachun.

Filipenses ofrendata wakichinku Pablopaj

¹⁰ Anchatapuni kusikorqani Señorpi, qankuna ujtawan noqamanta yuyarikuwasqaykichejmanta. Chayta qankuna munasharqankichejpuni, manataj imaynamanta aterqankichejchu yanapawayta.

¹¹ Kaytaqa mana pisiwasqanraykuchu nini, imaraykuchus yachasqa kani, sonqo junt'asqa kayta, tiyapuwasqanwan.

¹² Wajcha jina kausakuyta yachani. Jinallatataj ashkha kapuwajtimpis tukuy imapi yachasqa kani, sajsasqa kanaypaj, chayrí yarqhasqa kanaypajpis. Jinallataj ashkha kapunawampajpis, mana kapuwajtimpis yachasqa kani.

¹³ Tukuy imata atini Cristo kallpachawajniypi.

¹⁴ Chaywampis, allinta ruwarqankichej llakiyniypi sonqochawaspa.

¹⁵ Qankuna Filiposmanta kajkuna yacharqankichej evangelio willakuyta qallarikushajtin, maypachatajchus Macedoniamanta ripushajtiy, mana mayqen iglesiapis karqachu noqata yanapawaj qoypi, nitaj jap'iypipis, astawanqa qankuna sapallaykichej.

¹⁶ Tesalonicapi kashajtiypis apachimuwaj kankichej ofrendata kuti kutinta ima pisiwajniypajpis.

¹⁷ Mana noqaqa t'inkastachu mask'ashani, astawanqa qankuna ashkha poqoyniyoj kanaykichejta.

¹⁸ Noqaqa tukuy imata jap'erqaniña. Ashkhaña kapuwan. Junt'asqa kani. Epafroditomanta jap'erqani apachimuwasqaykichejta, k'acha q'apayniyojta jina, allin rikuchikuta jinataj, Diospajtaj allin qhawasqata.

¹⁹ Diosniytaj churapusonqachej tukuy ima pisisusqaykichejta, qhapaj kaynimpi, janaj pacha k'anchaynimpi Cristo Jesuspi, chayman jina.

²⁰ Dios Tatanchej, wiñaypa wiñaynimpaj yupaychasqa kachun. Amén.

Pablo hermanosta napaykun

²¹ Napaykuychej Cristo Jesuspi ajllasqakunata. Tukuy hermanos noqawan kajkunapis napaykamusunkichej.

²² Diosman t'aqasqas kajkuna napaykamusunkichej, astawanqa jatun kamachej Cesarpa wasimpi kajkuna.

²³ Señorninchej Jesucristoj khuyakuynin tukuy qankunawan kachun.