Ezequiel 41 - Qheshwa Biblia DC

¹ Chantá runaqa Diosta yupaychana wasi ukhuman pusaykuwarqa, sayantasninta miderqa. Iskaynin lado kinsa metrosniyoj karqa. Chay jina ancho karqa tabernáculo nisqa chayqa.

² Punkonqa anchonman phishqa metrosniyoj karqa. Punkoj perqasnintaj purajman iskay metrosniyoj karqa. Chaymantaqa chaupinta midillarqataj, chaytaj iskay chunka metros sayt'unman karqa, anchonmantaj chunka metros.

³ Chantá aswan ukhunejman pusaykuwaspa midillarqataj, punkoj sapa sayantasninta sapa ujnin uj metrosniyoj rakhunman karqa. Yaykuna punkutaj kinsa metrosniyoj anchonman karqa. Sayantasnintaj sapa ujnin kinsa metros khuskanniyoj, jinataj rakhunmampis karqanku.

⁴ Chaymanta aswan ukhu kajtañataj miderqa, chaytaj sayt'unman chunka metrosniyoj, anchonmampis kikillantaj karqa. Diosta yupaychana wasej ñaupaqempi niwarqa: Chaymin Diosta yupaychana cheqeqa, nispa.

Perqaman k'askasqa ruwasqa wasis

⁵ Chaymanta runaqa midillarqataj wasej jawa perqanta, chaytaj kinsa metros phatu karqa. Diosta yupaychana wasej muyuynimpitaj wasiman k'askasqa wasis karqanku, chaykunataj iskay metroskama anchonman karqanku.

⁶ Kay wasistaj patan patampi kinsa alto patasniyoj ruwasqas karqanku, sapa altopi kinsa chunka wasis karqanku. Wasi perqapi muyurisqa, llojsisqasniyoj ruwasqas karqanku. Chaykunapi wasisqa atisqa karqanku, chay jinamanta wasi perqapi ama atiykukunampaj.

⁷ Aswan pata kaj waseqa anchos karqanku. Wasi ukhunejpi kaj patillanejta patakama wicharina karqa. Chay jinamanta waseqa pataman aswan ancho karqa. Urapi kaj wasimanta chaupi altoman wicharina karqa, chaymantataj aswan patapi kaj wasiman.

⁸ Diosta yupaychana waseqa alto cimientasqayoj karqa. Chay pataspiraj wasis ruwasqas karqanku. Chay yupaychana wasej cimientontaj kinsa metros alto karqa.

⁹ Wasispa jawa perqasnenqa iskay metros khuskanniyoj phatus karqanku. Uj wasimanta uj wasiman yaykunasniyoj karqa.

¹⁰ Ujnin wasimanta ujnin wasikamaqa purajman chunka metrosniyoj karqa.

¹¹ Wasi punkusnenqa, ujnin wichaynejman qhawarisqa karqa, ujnintaj uraynejman qhawarisqa. Chay campoyoj qhepakorqa, chaytaj iskay metros khuskanniyoj tukuy muyuyninman karqa.

Inti yaykuynejpi wasi

¹² Inti yaykuynejpi, patioman qhawarisqa karqa. Kay kajqa kinsa chunka phishqayoj metros karqa, anchonman sayt'unmantaj tawa chunka phishqayoj metros, perqataj iskay metros khuskanniyoj phatu karqa.

Diosta yupaychana wasej medidan

¹³ Chantá chay runaqa Diosta yupaychana wasita miderqa, chaytaj sayt'unman phishqa chunka metrosniyoj karqa. Patio ukhoqa wasiwan, tukuynin perqaswampacha phishqa chunka metrosllataj karqa.

¹⁴ Yupaychana wasej uyanqa, patio ukhuman inti llojsimuynejman qhawarisqa karqa, phishqa chunka metrosniyojtaj.

¹⁵ Chaymanta perqa ruwasqata sayt'unman midillarqataj, Diosta yupaychana wasej qhepa ladon kajta, chaytaj ukhu patioj chimpan karqa. Chantá perqatapis sapa ladoman, chaytaj phishqa chunka metros karqa.

Diosta yupaychana wasi karqa

¹⁶ Diosta yupaychana wasej ukhumpi, cuartos, corredorpa punkumpis, chantá kinsa altosniyoj wasispis pampamantapacha ventanakama, maderawan churasqas karqanku. Ventanaspis kikillantaj karqa.

¹⁷ Diosta yupaychana wasi patamanta ukhu kaj wasikama, chay wasej jawanta, tukuynin perqasninta, ukhunta jawantawan miderqa.

¹⁸ Querubineswan, palma sach'a ruwasqaswanqa perqapi ruwasqas karqanku. Uj querubimpa chaupinman uj palma sach'ata, chaymantataj uj querubín, ajina ruwasqas karqanku. Sapa uj querubinestaj iskay uyasniyoj karqanku.

¹⁹ Ujnin uyanqa runa uya, palmanejman qhawarisqa, ujnin uyantaj leompa uyan jina; ujnin ladompi kajtaj palmanejman qhawarisqa. Diosta yupaychana waseqa perqapi chay jina ruwasqawan muyuykusqa karqa.

²⁰ Pampamantapacha punkuspa patankama chay jina querubineswan palmaswan kikin perqasnimpi ruwasqasniyoj karqa tukuy wasi ukhumpi.

²¹ Diosta yupaychana wasej sayantasnenqa tawa esquinasniyoj karqanku. Diospa tiyakunan nisqa cheqan chimpampi uj altarman rijch'asqa karqa.

Maderamanta ruwasqa altar

²² Maderamanta ruwasqa altartaj sapa ladoman iskay metrosniyoj karqa. Uramanta patamantaj uj metro khuskanniyoj karqa. Esquinasniyoj pampaman karqa, jinataj ladosnimpis maderamanta karqa. Runataj niwarqa: Kay mesamin Señorpa ñaupaqempi kashan, nispa.

Punkus

^23-24 Diosta yupaychana wasiwan, Diospa tiyakunan cheqawanqa, iskay punkusniyoj karqa. Chay wisq'anastaj muyurej kanku iskay uj punkupi, iskaytaj uj punkupi.

²⁵ Diosta yupaychana wasej wisq'anampipis querubineswan, palma sach'aswan ruwasqas karqanku, imaynachus Diosta yupaychana wasi perqaspi, chantá patio jawa perqaspipis ajina karqa. Yaykunapitaj maderamanta wisq'anayoj karqa.

²⁶ Corredor punkoj ladompi rejillasniyoj ventanas karqanku, puraj ladosnimpi palma ruwasqasniyoj. Diosta yupaychana wasiman k'askasqa wasispis rejillasniyojllataj karqa.