1 Timoteo 1 - Qheshwa Biblia DC

Pabloj napaykuynin

¹ Noqa Pablo, Jesucristoj kamachin kani, Salvajninchej Diospa kamachisqanrayku; jinallataj Señor Jesucristoj kamachisqanrayku. Paytaj suyayninchej.

² Kay cartata escribimuni Timoteoman, creeypi cheqan kaj wawayman: Qanwan kachun yanapay, khuyakuy, sonqo tiyakuy, Dios Tatanchejmanta, Cristo Señorninchejmantawan.

Llulla yachachiykunamanta

³ Macedoniaman rishaspa nerqaykiña Efeso llajtapi qhepakunaykita, kamachinaykipaj wakinkunata ama waj jina yachachiykunata yachachinankupaj.

⁴ Amataj uyarichunkuchu qhasi mana kaj willaykunata, aylluspa mana tukukoj sutisninta ima. Chaykunaqa runasta churanachinku, nitaj fenejta Diospaj sayachinkuchu.

⁵ Kay kamachiypa yachachiynenqa munakuymin; chaytaj llimphu sonqomanta llojsimun, allin concienciamanta, cheqa creeymantataj.

⁶ Chay imasmanta wakenqa pantaspa t'aqakorqanku, qhasi mana kaj parlaykunaman.

⁷ Leymanta yachachej kayta munaspa, mana yachankuchu imatachus parlanankuta, nitaj imatachus yachachisqankutapis.

⁸ Yachanchej leyqa allin kasqanta, sichus kamachisqanta maychus kajta junt'asunman chayqa.

⁹ Kayta yachanchej, leyqa mana cheqan runaspajchu churasqa karqa. Manachayqa churasqa karqa leyta p'akejkunapaj, mana kasukojkunapaj, Diosta mana manchachikojkunapaj, juchasapaspaj, pikunachus tatanta, chayrí, mamanta wañuchejkunapaj, runa wañuchejkunapaj ima.

¹⁰ Millay purejkunapaj, qharipura juchallejkunapaj, runasta suwajkunapaj, llullaspaj, qhasimanta Diospa sutinta oqharejkunapaj, allin yachachiypa contrampi kajkunapaj.

¹¹ Yupaychasqa Diospa k'anchaj evangelionman jina; mayqenchus noqaman qosqa karqa.

Diospa khuyakuyninmanta yuyarikunapuni

¹² Cristo Jesús Señorninchejman graciasta qoni kallpachawasqanmanta, imaraykuchus allimpaj noqata qhawawarqa; evangeliomanta willanaypajtaj churawarqa.

¹³ Ñaupajta Cristoj contranta rimashajtiy, qhatiykachashajtiy, k'amishajtiypis, payqa allimpaj jap'ikapuwarqa khuyakuyninrayku, imaraykuchus mana yachaspa, manataj creespa chayta ruwasharqani.

¹⁴ Señorninchejpa khuyakuynintaj astawan ashkhayarqa fewan, munakuywan ima Cristo Jesuspi.

¹⁵ Kay palabraqa cheqamin, allintaj tukuy jap'inankupaj; Cristo Jesús kay pachaman jamorqa juchasapasta salvanampaj; chay juchasapasmantataj noqa aswan kuraj kani.

¹⁶ Chayrayku payqa khuyakuyninrayku jap'ikapuwarqa, Jesucristo noqapiraj tukuy munakuyninta ñaupajta rikuchinampaj, pillapis chayta rikuspa paypi creenampaj, wiñay kausayniyojtaj kanampaj.

¹⁷ Alabanachej, jatunchanachejtaj reyta wiñaypaj payqa mana tukukoj wañoj, mana rikukoj, uj k'ata Diostaj. Amén.

^18-19 Timoteo wawáy, kayta kamachiyki ruwanaykita, imaynatachus ñaupajtaña hermanos, Espirituman jina yuyaychasqas qanmanta nerqanku, chaykunaman jina maqanakupi, allinta tinkunaykita, feniykita, allin concienciaykitawan jallch'aspa; imaraykuchus wakenqa concienciankuta mana kasuspa, feninkuta chinkacherqanku.

²⁰ Chaykunamanta kanku Himeneo, Alejandro ima. Paykunata Satanasman jaywarqani, ama ujtawampis Diospa contranta rimayta yachanankupaj.