1 Corintios 4 - Qheshwa Biblia DC

Apostolespa ruwayninku

¹ Ajina ari, Cristoj kamachisninta jina runas qhawawachuyku; imaraykuchus mayordomos kayku, Diospa pakasqa imasninta sut'inchanaykupaj.

² Kunanqa sapa uj mayordomo junt'achun ruwananta.

³ Noqaqa pisipaj yuyani, qankuna juzganawaykichejmanta, nitaj runakunaj juntanmantapis; nillataj noqa kikiytapis juzgakunichu.

⁴ Sonqoyqa mana imamantapis juchachawanchu. Chaywampis, mana cheqan runa kani nisajchu; Señorlla noqataqa juzgawanqa.

⁵ Chaywampis, amaraj imatapis juzgaychejchu, Señor jamunankama. Paytaj sut'inchanqa laqhapi pakasqa kajta, rikuchenqataj imatachus sonqosninkupi yuyasqankuta; chaypachataj sapa ujta Dios alabanqa.

⁶ Hermanos, qankunata munakusqayrayku kay imasta willaykichej, noqamantawan Apolosmantawan yachakunaykichejpaj. Escribisqamanta astawanqa ama yuyaychejchu; pajtataj uj runarayku qankunapura qhesachanakuspa may wapus kawajchej.

⁷ Pitaj qanta allimpi rikuchisunki, wajkunamanta astawan? Chayrí imataj tiyapusunki mana Diospa qosusqan? Pay qosunki chayri, imaraykutaj wapuykachanki manapis Diosmanta jap'iwajchu karqa jina?

⁸ Qankunaqa sajsasqaña kankichej, qhapajñataj kankichej, reyes jina mana noqallaykuwan kamachishankichej. Jina kanman chayqa, walej kanman cheqamanta kamachinaykichej, noqaykupis qankunawan khuska chay reinopi kanaykupaj!

⁹ Noqaj yuyayniymantaqa, apostolesta Dios ch'ulipi churawarqayku. Wañunapaj jina churasqa kayku. Chayrayku mundoj qhawanan kayku, apostolespata, runaspata ima.

¹⁰ Noqaykoqa Cristoj munakuyninrayku mana yuyayniyoj jina kayku; qankunataj may yachayniyoj Cristopi kankichej. Noqayku pisi kallpas kayku, qankunataj sinch'is kankichej. Runaspajpis may allimpaj qhawasqas kankichej, noqaykutaj qhesachasqas.

¹¹ Kunan p'unchaykama sufriyku yarqhayta, ch'akiyta, thanta p'achayojtaj kayku; maqasqas, manataj wasiykupis uj cheqapi kanchu.

¹² Kikin makisniykuwan llank'aspa mayta sayk'uyku; runakunataj maldiciwayku, noqaykutaj allin palabraswan kutichiyku. Qhatiykachasqas kaspapis ñak'ariyku k'umuykukuspa.

¹³ Runakunaqa noqaykuta mana kajmanta tumpawayku; paykunapajtaj Diosmanta mañapuyku; kunankamataj kay mundoj q'opanta jina qhawawayku, runakunaj wijch'usqanta jina.

¹⁴ Kayta escribimuykichej mana qankunata p'enqachinaypajchu, astawanqa k'amimuykichej munasqa wawasniyta jina.

¹⁵ Chayrayku, chunka waranqa yachachejkunasniyojpis kawajchej Cristopi chayqa; mana ashkha tatasniyojchu kankichej; imaraykuchus noqa Cristo Jesuspi evangelionejta yumarqaykichej.

¹⁶ Chayrayku, mañakuykichej noqa jina kanaykichejta.

¹⁷ Chaypajtaj kachamorqaykichej munasqa waway Timoteota, sinch'ita Señorpi sayasajta. Payqa yuyarichisonqachej imaynachus Cristopi kausayniy kasqanta, imaynatachus tukuynejpi yachachisqayta, tukuy iglesiaspi ima.

¹⁸ Qankunamanta wakin mayta wapuykachashanku, yuyaspa noqa manaña mayk'aj watukoj jamunayta.

¹⁹ Señor munanqa chayqa, usqhayta watukoj jamusqaykichej. Chaypitaj rejsisaj chay wapusta; mana palabrasninkutachu, astawanqa atiyninkuta, wapuykachaspa purejkunata.

²⁰ Diospa reinonqa mana palabraspichu kashan, astawanqa atiypi.

²¹ Imatataj munankichej? Chicotewanchu jasut'inaypaj, chayri munakuywanchu, llamp'u sonqowanchu jamunayta munankichej?