Naum 1 - Fanawbuid tagsibaliwas Fakayabian

¹ Tuy fag fansulitan sabaliwas furuan Ninibe Yawi at nafoyung sas Naum fag taw Elkus.

Yawi Kauri Ninibe

² Yawi tam Dius wa kaylat ngay taw nu gseg tibak fagsegan. Ay kanya kauri at ngay fawayan ay namasud anya fagayu.

³ Yawi di vtv gfangadotama, dewa katanya, mabalyanan tua, ay gfaurianan fagayu tagfakamulun mauri. Ay nu nadalan, kata sik tagridribudan fag tagmara ay at maksvn fag fulug. Ay linyabu kata lukbu nu kanus sit darafa.

⁴ Ay nu naringang, dagat ay ngay liskung katat, ay kagong ngay tanum sa sangay gamasun sis Basan ay sis buksul Karmel ay Lebanun.

⁵ Fungsu, buksul ay fagdaul daga guigan sit salubangan, ay fagayu taw gtadtaruyan kalimu.

⁶ Sinu at magwanta Yawi nu nkuri? Aroro kanya nu nkuri, kata nu gfaduksun afuy siginan at bibig, ay gang kabaltak sit salubangan.

⁷ Yawi matuyan, ay at mogat fag fagsarigan gina e fagidapun, ay galaga fagayu tagafanud sa anya.

⁸ Ay kanya kata sik lugwak masakit kadasug laman namamin at ngay fawayan, ay gfafalo yakmay kanya fagayu anbul.

⁹ Ngay taw Asirya, nusnga setaw ay ngay algan at mauri sas Yawi at ngay taw, Yawi gfaragang wan ay algan takatanya, ay wa ban am gdog ya.

¹⁰ Kata am sik tagalangu at mafasafungan madugi fag wat. Namamin au ayu kata nu e nairug ngay nagbiluganan fare.

¹¹ At sadi ay tagfangguna anke algan mauri sas Yawi at ngay taw, ay kanya nu gfangatulun, mauri.

¹² Katatuy Yawi at longan sa sangay taw Uda: Ay ngay fawayan Asirya dewa ngayu ay mabitsug, namamin kban anya fagayu. Ay kwa ban gdog ya gfaurianan ayu.

¹³ Aroro katsi, gfalfas kwan ayu siginans Asirya at fagmabalyananun.

¹⁴ Yawi nalong yay fia sa sangay taw Asirya te, “Ay ngay kasugfunanan ban umkamin wan, ay nanrufa kban ay ngay fagsegan at mawatan kayu say fagnangafulan fag bale. Ay namalganan kwan fagfolian ayu, aroro kwa kaylat ya nu gleleg am.”

¹⁵ Ngay taw Uda, banawani sa sangay buksul! Kadasug wan sik tagfoyung at masine fag barita tagfae fagmanabayanun ayu. Nu katanya, afuli useganani, ay fafasludani ay ngay fatuyanan sas Yawi, aroro at mauri fag ngay taw wa ban namawayan ya ayu, abat ngate, umkamin wan.