Fangatulun 21 - Fanawbuid tagsibaliwas Fakayabian

¹ Sik funan at amatanganan kata sik liskung Yawi at fagfafamiluganun nusnga nday at fakaylatun.

² Ngay taw nu gamatangan, fagayu at fakamulun matuyan wan, dewa katanya, Yawi saful way tam ngay algan.

³ At matuyan fag fakamulun sik mauseganan sas Yawi gtungud yay sik ngay fanggalangun.

⁴ Fakamatungudunun ay fakamaboun, asalanan way. Katanya at mauri fag ngay taw at ngay amatanganan.

⁵ Sik taw nu gfalganan tua at ngay fakamulun, masine tua ban at fungfung, dewa katanya, nu nabanganan way, at fungfung sik yud way ban e kwa.

⁶ Sik ramraman nu siginan way sfandayan masakit way nu kamin, ay tibaginan kafag taw wa ngaduge nu gleleg.

⁷ At mauri fag ngay taw at fakamawayanun gfadasug anya fagayu sas faurianan, aroro kafag ngay taw wa kaylat gfakamulun at matuyan.

⁸ At ke asalanan at ngay famanwanun mauri way, ay dewa katanya, fagayu tagsisad matuyan at ngay famanwanun matuyan tua.

⁹ Amasine yap tagbanwan gsadilian si sik suluk, nu gamut ro magamut gbanwan si sik mangena takamawayan.

¹⁰ At mauri fag taw at ngay fakamulun mauri way, ay we fakafanyun at iba.

¹¹ Takamalingun fag ngay taw nu nfaurianan, at yud e fagsafulun kae fagsafulun. Nu e nafoyung sa sik taw at ke fagsafulun, kafamut yay at fagsafulun.

¹² Dius saful way taw mauri ay fagdaul at fagyafunan at ngay fakamulun, nu katanya, kanya ban namaurianan anya fagayu.

¹³ Sik taw at yud ggubuk tagidapan, gina ban kanya anke fagidapun, wa yangay ban e ggubuk ya anya.

¹⁴ Am iba nu ndotama emu, namon o sa anya sik famonun yud e nasaful, laman am famalukmeanan anya.

¹⁵ Nu fagmatuyanun tua at faugali, at matuyan fag ngay taw guseganan, dewa katanya, at mauri fag ngay taw maksvn nu kalimu.

¹⁶ At yud kaylat fagsafulun, takadasug ban sa anya fakabulun.

¹⁷ Sik taw at kinnanad ginum fanlangu ay taguseganan lang gugat, takatanya wa kae ramraman, abat ngate, gidapan way.

¹⁸ Fagayu at mauri ay at ke asalanan fag ngay taw umfaurianan, laman gfalangfe at yud e asalanan.

¹⁹ Amasine yap at namanwan sa sik talun at yud e taw, nu gamut gbanwan si sik bale gasfuan sik mangena takamawayan ay at mafangadotina.

²⁰ At ke fagsafulun fag taw gfungsu at mayayum fag fakonun laman sa ban at fagunan, dewa katanya at yud mamatanganan fag taw gfamin wan fagayu tagsi anya.

²¹ Sik taw nu gbanwan tua gugat sat matuyan ay sat masine fag ngay ugali, ngaduge tua ban nu gleleg ay umke fagmanabayanun ay ngay taw gsuyu tua anya.

²² At ke fagsafulun fag fun manangagbilug way dewa sik furuan mabalyanan, ay marasras way dewa at fagsarigan fag alad.

²³ Sik taw nu ddi glong at mauri, gsaruy fakalimuun.

²⁴ Sik taw takamatungudun ay takamabo umtoglag te, sik takamalingun, ay nu katanya, maksvn wan at fakamatungudunun.

²⁵ At momuy fag taw at fagalabianun gfadasug anya sas fakabulun, aroro wa kaylat namakamulun.

²⁶ At momuy fag taw ngayu at fagalabianun, dewa katanya, at matuyan fag taw kamon tua.

²⁷ Yawi kauri way taw mauri at fanggalangun, kaugat wan at algan nu mauri way.

²⁸ Kalyam waban takamuagan fag tagfatuyan at longan, dewa katanya, at matuyan fag tagfatuyan at longan matuyan tua ban gugat.

²⁹ At mauri fag taw wa gamatangan ya nusnga setaw at fagnamakamulunun, dewa katanya, at matuyan fag taw gamatangan tua.

³⁰ We mafasud Yawi at fagsafulun ay at fagmamatanganun.

³¹ Ngay kabayu dewa mafalganan laman sas awayan, Yawi tua tagfababo.