Fakamulun 13 - Fanawbuid tagsibaliwas Fakayabian

At Masine fag Falad Nasugu Bernabe ay Saulu

¹ Sis furuan Antiukya e ngay taglong ay e ngay takamoyung. At ngay ngayan: Bernabe, Simyun (at ngayan yangay te, At Malayung fag Taw), ay Lusyu fag taw Sirene, ay Manaen fun Erudes at fagsud, ay Saulu.

² Sik menit, gina kafag ngay tagafanud gseg Dius ay wa gfangon laman gdarangin, at Masine fag Falad nalong sa anya fagayu te, “Fasamani Bernabe ay Saulu, aroro kanya ku nafili laman namakamulun ku nafalganan sa anya fag ngay fakamulun.”

³ Ay kanya fagayu nu ntabu nu yud gfangon laman gdarangin, nafatayuk at ngay daluap sas duama, laman gfalag te, sik nafili, ay sanya ginan, nafalao wan.

Saulu ay Bernabe Kamoyung sas Furu Sipre

⁴ Ay at Masine fag Falad nasugu Bernabe ay Saulu sas furuan Seleusia. Ay sanya ginan duama nasakay sa sik sakayan lino tagsas furu Sipre.

⁵ Ay duama nu ndasug sas Salamina fag furuan daul, nafoyung Dius at longan si sangay taw Udyu at bale fakafulan. Ay ginanya, Uan, at ngayan yangay te, Markus, ggubuk duama.

⁶ Ay kafag tulu anfagdaul furu Sipre yakmay andasug sas furuan Pafus. Ay kafag tulu nafablang sik taw Udyu at makatu gfasure at ngay madulo, ay kanya kamuagan te, sik taglong; kanya at ngayan Bar-Isus.

⁷ Bar-Isus, fun Sergiu Paulu at fagadgalangan. Kafag fun, sik mamatanganan ay tagfangguna sanya fag afud talun, ay ginanya kanya nafauro Bernabe ay Saulu aroro kaylat gyadungugun Dius at longan.

⁸ Kafag taw at makatu gfasure at ngay madulo at ngayan sas Griegu, Elimas. Kanya nasalag Bernabe ay Saulu, laman kafag fun wa gafanud sas Isus.

⁹ Ay Saulu, at ngayan yangay te, Pablu, anke Masine fag Falad, ay kanya nadama Elimas ay nalong sa anya te,

¹⁰ “Satanas o at sisian ay kabavn gsalag o gugat at matuyan. Fagayu am fakamulun gfandaya o ay kamuag. Ay kabavn gsalag o tam Fun at ngay balyawvtan nusnga setaw at matuyan.

¹¹ Tam Fun ro gfaurianan emu. Siginan ro katsi anggan ban nu seyu kmenit wo glag ya at mayamag.” Ay arodi vtv Elimas gyakapan laman nanrvbvy tagtaban anya.

¹² Ay fun Sergiu Paulu nu nalag at kinfasludan, kanya anke fagafanudun, aroro andulo at nadungug fag foyungan sabaliwa tam Fun.

Pablu Kamoyung Sis Antiukya sis Talun Pisidya

¹³ Ay siginans furuan Pafus, Pablu ay at ngay ufud nasakay sas sakayan lino laman nangadasug sas Perga sas talun Panfilia. Ay kafag tulu nu ndasug sanya fag furuan, Uan at ngayan yangay te, Markus, naubun at duama ay kanya anfoli sas Erusalem.

¹⁴ Ay sanya ginan, Pablu ay Bernabe nataglayun sas furuan Antiukya tagsis talun Pisidya. Ay nu ndasug Famiangalay fag Menit, duama nasakbo sas taw Udyu at bale fakafulan ay namalunggung.

¹⁵ Ay nu ntabu gtap sik afud Muisis at Faugali ay siginan Dius at ngay taglong at rirukan, bale fakafulan at ngay fagtainan nasugu at fagsuguan laman nanlong sas duama te, “Em ngay faduksay, nu e fagyalongun yayam laman famaksvn ste fag ngay tagafanud, foyungi emi.”

¹⁶ Nu katanya, Pablu anlindug ay gyafe sanya fag ngay taw te, lag garingang. Ay kanya nalong te, “Ku kaiban fag ngay taw Israel, ay at yud Udyu fag ngay taw tagseg Dius, dungugani angku.

¹⁷ Taw Israel at Dius nafili tam ngay mangaguyang. Ay kaduge sis talun Igiptu, Dius nafayu ngay taw Israel ay siginan yangay at fagmabalyananun nafalfas anya fagayu.

¹⁸ Ay kaduge ufatk safuluk banwa, Dius nagwanta nalaga anya fagayu sis talun at yud e taw.

¹⁹ Ay Dius nafabul sis Kanaan fituk talun at ngay taw. Ay kafag fituk talun, nafagbilug sa tam ngay mangaguyang.

²⁰ At kadugean nu kafasludan takatanya fagayu, ufatk sandan ay limak safuluk banwa. “Ay sanya ginan, Dius nafili sik ngay tagwabilug laman sa tam ngay mangaguyang sitsigon Samwel nu nsik taglong.

²¹ Ay sanya ginan kanya fagayu naet sik fun, nu katanya, Dius nafili Saul, Kis at baguama, siginans Benamin at kasugfunanan laman kafag ngay taw at fun. Ay Saul nafunan kaduge ufatk safuluk banwa.

²² Ay tam Dius gina nafalin Saul at fagmafunanun, kanya nafili Dabid laman at nanfunan ban kafag ngay taw. Ay Dius nalong te, ‘Naylat au Dabid, Ese at baguama. Kanya mafalganan tua laman namaning ku ngay suguan.’ ”

²³ Ay Pablu gfataglayun gfoyung te, “Kata Dius at fatuyanan sa sangay taw Israel, kanya nafili Isus siginans Dabid at kasugfunanan laman ban Tagfalangfe.

²⁴ Ay kaduge Isus yud andasug, Uan gfoyung sa sangay taw Israel te, ‘Ubuni ay ngay asalanan ay asurungi.’

²⁵ Ay nu ntabu wan Uan at fakamulun, kanya nalong te, ‘O gamatangan am te, au wan ay fagfanyaun? Bunwa au. Ay baliwan e gakadasugun wan, ay kwa masine nusdi at fagsuguan laman at nanluas at fansalod at lapak.’

²⁶ “Em ngay faduksay, Abrayam at ngay kasugfunanan ay am at yud Udyu fag ngay taw tagfaning Dius, sa antam at fagfonan kanya fag barita sabaliwas fakalangfean.

²⁷ Dewa katanya, ngay taw Udyu tagbanwan sis Erusalem ay anggan at ngay tagfangguna wa natoglag te, Isus wan Tagfalangfe. Ay kanya fagayu dewa gtap ngay taglong at foyungan galay Famiangalay fag Menit, wa nyamag. Ay kanya yangay fagayu at nafafasludan kafag ngay foyungan gina nafaurianan Isus sas fakabulun.

²⁸ Ay kanya fagayu dewa yud e nalag Isus at asalanan sak gfabul anya, kanya fagayu get sas Pilatu te, ‘Fabuli wan Isus.’

²⁹ Ay nu nfasludan wan fagayu at kinriruk sabaliwas Isus, kanya fagayu nanamul Isus at bilug siginans fasulungan kayu ay nanamoli sas fagfolian.

³⁰ Dewa katanya, Dius nafadog yay nafaleleg anya siginan at fagmabulanan.

³¹ Ay ngayu yayk menit Isus nu gfalag anya sa sangay taw at naalo anya ebi gina glao sas Erusalem siginans talun Galilea. Ay katsi kanya fagayu gfatuyan yangay sa sangay taw Israel sabaliwa anya.

³² “Ay katsi ste ami laman namoyung sa ayu at Masine fag Barita, Dius at nafatuyanan sa tam ngay mangaguyang.

³³ Dius nafafasludan at fatuyanan sa antam fag kasugfunanan sabaliwa nu gfadog gfaleleg Isus. Aroro katatuy at Rirukan sis faduak Alubad te, ‘O wan ku Baguama, ay katsi au wan am Mama.’

³⁴ At matuyan, Dius nafadog wan nafaleleg Isus, ay Isus at bilug di ban dumalan sas fakadanun. Ay katatuy at longan te, ‘Namon kban sa ayu at masine ay at matuyan kata ku fatuyanan sas Dabid.’

³⁵ Katatuy yangay at longan sa tibak Alubad te, ‘ay di o naylat am Nafili nu kadasug sas fakadanun.’

³⁶ Kafag rirukan bunwa sabaliwas Dabid, aroro kanya nu nafafasludan wan Dius at fakaylatun sa anya kaduge kanya gleleg, kanya nbul ay e nanamoli anya sat mangaguyang at day fagfolian, ay kanya andan.

³⁷ Dewa katanya, Isus, Dius at nafadog nafaleleg siginan at fagmabulanan, kanya di ndan.

³⁸ “Nu katanya, ku ngay faduksay asafuli te, Isus mafafalyam ay asalanan.

³⁹ Ay nusnga sinu tagafanud sas Isus, Dius gtap anya te, sik matuyan fag taw. Ay wam manangatap kata nu yud e asalanan siginan nu gfaning am Muisis at Faugali.

⁴⁰ Nu katanya, dirii laman ban di mfasludan sa ayu kata Dius at ngay taglong at rirukan te,

⁴¹ ‘Am fag ngay taw takamalingun, umdulo ban am sa ku fagnamakamulunun ay umbul ban am, aroro e fagnamakamulunun kban gina si ay buknga, dewa katanya, wa ban am gafanud dewa e nanfamoyung sa ayu.’ ”

⁴² Ay Pablu ay Bernabe nu galoun wan siginans taw Udyu at bale fakafulan, ngay taw at maful sanya nalong sas duama te, “Dogi yap ban foyungi sa emi takatanya fag ngay foyungan sat fadogan fag Famiangalay fag Menit.”

⁴³ Ay nu ntabu wan at fagmafulun, ngayuk taw Udyu ay at yud Udyu at kinsadi sas Pablu ay Bernabe. Ay duama maksvn nu gfoyung sa anya fagayu te, “Fataglayuni nu gugali am at matuyan gfaning Dius at fakafanyun.”

⁴⁴ Ay nu ndasug at fadogan fag Famiangalay fag Menit, fagayu taw sis furuan daul maful laman nandungugan Dius at longan.

⁴⁵ Ay ngay taw Udyu nu nalag te, ngayuk taw at kinful, kanya fagayu galabian. Ay kanya wa gfadiuganan Pablu, ay sarokta nalong ya sik ngay mauri.

⁴⁶ Dewa katanya, Pablu ay Bernabe mabitsug nu gbalus te, “Sa way nangus ayu fag ngay taw Udyu taguna nu gfoyung Dius at longan. Dewa katanya, wam naylat, nu katanya, kanya wan tagfatuyan te, wam masine kae afud sas leleg at yud e fakatabuan, nu katanya, katsi glo wami sas yud Udyu fag ngay taw laman nanfamoyung.

⁴⁷ Aroro tam Fun nasugu emi te, ‘Nawat au emu kata sik salung sas yud Udyu fag ngay taw, laman namoyung fakalangfean sas fagdaul daga.’ ”

⁴⁸ Ay at yud Udyu fag ngay taw nu nadungug Dius at longan, kanya fagayu guseganan ay gseg Dius. Ay Dius at nafalganan fag ngay taw laman sas leleg at yud e fakatabuan, gafanud tua.

⁴⁹ Ay tam Fun at longan anrapyag sas fagdaul talun.

⁵⁰ Ay ngay taw Udyu ankuri duama ay nasugu sa takadungug fag ngay mangena tagseg Dius, ay anggan sa sangay mangama ke fanambagun sit furuan laman namabadbaboan duama ay nangaiyan siginan at talun.

⁵¹ Nu katanya, duama nafafagfag lukbu siginan at ngay darafa famasaful sanya fag ngay taw te, kanya fagayu wa gfaning. Sanya ginan, duama nalao wan sas furuan Ikunyu.

⁵² Ay ngay tagafanud sis furuan Antiukya anke Masine fag Falad ay maksvn nu guseganan.