I Temote 6 - KILOMBENO KIHYA KIA NFUMWETU YESU KIDISITU

¹ Bahika boso bamunwe bahwandjikishē banfum’abo’bo bana bene balombene kioso kinemo’shi, eshina di’Efile Mukulu, na lulambukisho (lwe) tabikayibwanga.

² N’abo be na banfumu bakumine, tabebasabulanga, mwanda’bo be bu bakwabo; anka bibuwa bakambe kwibafubila, mwanda’bo be kishima na bakuminyibwe kifulo, be bu abatambula ku mufubo (wabo) wibuwa. Yino myanda olambukishe na kulanga elango.

³ Su nanyi su nanyi alambukisha kushī biabia, shyakumina myanda ya binyibinyi, yinyi yia Nfumwetu Yesu Kidisitu yi na mwinyi, na ku lulambukisho lulombane na bwin’Efile;

⁴ (biabia) e na kwitatula, tamwiukye kintu, ank’e mukambe ngihusho na mpaka ya bishima, nyi a mutukā kiutu, mpaka, twihu tubi, na bihwandjikisho bibi bia bangi;

⁵ kwakulākulā-kubi kwa bantu be na binangu binyangye, bashī na biabinyibinyi; abahwandjikisha’shi; Bwin’Efile nyi mwakumwena bintu; (ku be biabia okungulukye).

⁶ Anka bwin’Efile na kufukama kw’eshimba nyi kwi kumwena kukata.

⁷ Mwanda’twe tatwibafwishe kintu hanohansenga, nyi mbinyibinyi namu tatwiuku kukatuka hanka na kintu,

⁸ na hakwikala na biakudia nabifwalwa twikale n’abio na kufukama kwishimba.

⁹ Anka’ba batee mashimba’shi: Twikale bampeta, (biabia) abahono mu kutompibwa na muteu, na mu ngabi ayimweshana, ayishimisha bantu mu kulwishibwa na kushimangishwa.

¹⁰ Mwanda kifulo kia mono nyi mushi wa bubi boso; ayoyinyi, bamo ha kwiyiabila, abōngolwa ku lukumino, abahu kwitaha na kwinyenga kwibungi.

¹¹ Ank’obe muntu Efile Mukulu, suka yino myanda; olonde kululama, bwin’Efile, lukuluhilo, kifulo, lwishinko na kuhohela.

¹² Olwe ngoshi yibuwa ya lukumino, kamina ku muwa wa ikala-ika koboitanyinwe, na kukumina bokuminyine bibuwa ku mpala kwa tumonyi twibungi.

¹³ Nakakayika ku mpala kw’Efile Mukulu abangisha bintu bioso, na Kidisitu Yesu, winyi batemwine kukumina kwibuwa ku mpala kwa Ponteuse Pilato;

¹⁴ ami’shi, olame uno mulangilo kushī ebashi, kushī kutohekwa mpaa na ku kufumbulwa kwa Nfumwetu Yesu Kidisitu.

¹⁵ Akukaleshwa ha kihwa kiako, ank’e buhenka bwe muhebwe mwabi, sha matalwa, Nfumu a banfumu, Mwanana a bamwanana,

¹⁶ Ank’e buhenka bwe shyafwiyā, nyi abombela mu mbadibadi yishyayifikika; shyamwenwe na muntu, sunga ngumune, sunga ngakukamona; kwadi kwikale kinemo na bukome bwa ikala-ika. Amena.

¹⁷ Okayikile baba bampeta ba hanohansenga’shi: Tanwikalanga n’eshimba dia kwinemeka, sunga nkukuluhila mbuheta bushī bwa kukuluhilwa, anka mw’Efile Mukulu atala, etuheya bintu bioso bi bungi bukilekile bia kusehela n’abio’shi,

¹⁸ bakite bibuwa, bekale bampeta mu bikitshino bilumbulukye, bemēne mu kwabila na mu kukwashia (bakwabo).

¹⁹ N’ako kwībikila abo bana bene (buheta) bwa ku kihindji kianakafike, takidi kibangilo kibuwa’shi, bakamine ku muwa wa kwikala-ika.

²⁰ A Temote, lama ki’abakuhitshikile, wehengye ku bwakulakule bwa bisumanga bwa kushula kwa bishila, na biabitemunwa bu kiukilo, anka tankiukilo, ooo,

²¹ bi na bamo bebikumine abibalubisha mwiyile lukumino. Bu-muntu bwikale n’obe. Amena.