Bena Efisesa 1 - KILOMBENO KIHYA KIA NFUMWETU YESU KIDISITU

¹ Paulu mutuinibwa a Yesu Kidisitu mwamukyebel’eshimba di’Efile Mukulu, kwi balamunwe-bakishila be mu Efisesa, na kwi bashimate mu Kidisitu Yesu:

² Bu-muntu b’Efile bwikale n’enu, na kufukama kw’Efile Mukulu Nshyetu, na (kwi) Nfumwetu Yesu Kidisitu.

³ Ahebwe mwabi Efile Mukulu Nshye a Nfumwetu Yesu Kidisitu, betuhele’twe mwabi wa miabi yoso ya Kikudi amwa mwiilu mu Kidisitu.

⁴ Anka mubetusangwidile mwadi e kwibedi kwa kibangilo kia hanohansenga, mwatudia kwikela balamunwe-bakishila na kushi matohe ku mpala kwe mu kifulo.

⁵ Bafunyine kwibedi’shi, tukekale mu buana bwa bana (be) mu Yesu Kidisitu kwadi e na mwinyi, muyile amukyebela eshimba die dibuwa bukalabale,

⁶ mpaa na kutumbisha kwa ntumbo ya bumuntu bwe, mwabetukuminyinyine mu batomibwe kifulo,

⁷ Mwadi e twi na kikūdilo ha mase e, nyi lulekyelo lwa milwisho mulombene buheta bwa bu-muntu bwe;

⁸ mwabetufwiminyine kwatudi mu binangu na kwitonga bioso.

⁹ Hakwitwiukishā’twe kifībwe kia mukyebel’eshimba die, mulombene eshimba die dibuwa bukalabale dibafunyine ntwadi e na mwinyi,

¹⁰ mu kilumbulwilo kia kukumbana kwa bihwa bioso, akabungila bintu bioso bu umune mu Kidisitu, abia bi mwiilu na bi hano hashi (anka) mwadi e.

¹¹ Mwadi e namu nyi mwatubatambula buhyanyi, hakufuna (kala) mulombene eshimba di’awa akitshina bintu bioso muyile binangu bia mukyebela eshimba di’e’shi,

¹² twikale ba kutumbisha ntumbo ye, atwe ababadidile kukuluhila mu Kidisitu.

¹³ Mwadi e namu nyi mwanudi (bakuluhile) hanubahushishe winyi Mwanda wa biabinyibinyi, nyi mukānduwibuwa wa kihandjilo kienu: mwadi e namu hanubakuminyine, nubakayikiiwe na Kikudi-E-Selelee a mulayilo,

¹⁴ e winyi nyi nkyee kia buhyanyi bwetu mpaa na ku kukulwa kwa kiēkiē kiudibwe, mpaa na ku kutumbisha kwa ntumbo ye.

¹⁵ Nyi ha uno mwanda ami namu, hanahushishe mwanda wa lukumino lwenu mu Nfumwetu Yesu, na kifulo kwi balamunwe-be-kishila boso,

¹⁶ nkimulekye’mi kutumbula ha mwanda wenu, na kwinutemuna mu nteko yande;

¹⁷ eshi, Efile Mukulu a Nfumwetu Yesu Kidisitu, winyi Yaiya a ntumbo, enuhe Kikudi kia binangu, na kia kufumbula mu kiukilo kikumbane kiakuukibwakwe,

¹⁸ (eshi,) mesoabinangu bienu abulukye, nwiukye muyile kutengyela kwa lwitamino lwe, na muyile buheta bwa ntumbo bwa buhyanyi bwe mu balamunwe-bakishila,

¹⁹ na muyile bukata bukilekile bwa bukome bwe kwatudi’twe bakumine, mulombene mufubo wa bukome bwa ntshitshiba ye,

²⁰ bwabakitshine mu Kidisitu habamusangwile ku lufu, na kumushadika ku mboko ye yibalume amwa mwiilu,

²¹ kula kwa nundu kwa bumankinda boso, na matalwa na ntshitshiba, na butontshi, na mashina oso akutemunwa temunwa, kushī anka ha yino nsenga, ooo, ñanka nantu na mu yinyi yanakafikye;

²² e namu batudile bintu bioso mushi mwa ngwa ye, bamuhele tadi bu mutwe wa bintu bioso ku kikoñeno ki’Efile.

²³ Akio nyi mbidi ye, takidi kikumbeno kia winyi akumbashā bioso mu bioso.