Zakaliya 9 - Amazwi Yakwe Leza 2013

Anisi ya ina Izlaeli yapingulwa

¹ Ii ili mbila ya mazwi yakwe Yawe akuti wene watapingula ukuvunuka impanga ya Hadalaki nga nu musumba wa Damasiko. Pano imusumba yonsi ya ina Alamu iyakwe Yawe, pamwi ndi vino waya ali mweneco wa mitundu yonsi ya ina Izlaeli.

² Na Hamati kwene wino yapakana nawe, kumwi na Tuli na Sidoni, nanti angala umwavulisya intukusi.

³ Umusumba wa Tuli wakwata ilinga lyamaka. Mumu kwene amuno mwatulumana siluva na zaabu, kwati imitumba yi ivu nanti wa vitumba.

⁴ Lelo Yawe wene alafumya sile vyonsi ivyaya mu musumba wa Tuli. Ivyuma vyonsi ivyayamo alavisumbila pali yemba, nu musumba ulya kwene ulatumuka umoto.

⁵ Aikazi amu Asyikeloni yalailolela na manso yao kuno cii cilacitika, ni ntete zilayalema. Aikazi amu Gaza nayo yalacula wakwe cimwi. Avino cilaya ku amu musumba wa Ekiloni, pano vino yataila yatalavilola foo. Umwene uwamu Gaza alalowa, na Asyikeloni alasanguka itongwa.

⁶ Lelo mu Asyidodi mulikala antu amitundu ipusanepusane. Ndonona icilumba ca mwina Filisti.

⁷ Antu yakwe yatalalya nupya inyama ino icikweti uwazi, nanti ukulya vyuze ivyaindwa. Yayo yonsi alasyalapo yalaya cili conga na antu yauze, yalaya wa luko longa lwa mutundu wa Ayuda. Aina Ekiloni yalaya cili conga na antu yauze, ndi vino aina Yebusi yali.

⁸ Ndikala mu pipi ni ng'anda yane nga kalinda, wiyo wino akalesya ntalanganyi. Umwene mukakate atalatala azunye antu yane, pano nemo ndayawaka.

Umwene wa cituku alayako ku nkolelo

⁹ Sansamukini sile mwe ikazi amu Zioni! Umilini tupundu mwe ina Izlaeli! Lolini umwene winu awilya akwiza kuno muli! Wiza yakumucinila isoonga, pano watacimvya, lelo kwene wataicefya akuipitila pali punda, nawe indama mwana punda.

¹⁰ Yawe wavwanga wati, “Mu mpanga ya Izlaeli ndafumyamo amaceleta ya nkondo, nu mu musumba wa Yelusalemu ndafumyamo imfwalasi zyakulwilapo inkondo, na malapwa akulwilako umu nkondo nayo yalakontolwa. Umwene winu alateeka nu longo antu amu mitundu yonsi. Uteko wakwe ulatandikila kuli yemba wenga mpaka ukuyafika na kuli yemba muze, ukufuma uku Luzi lwa Yufulate ukuyafika nu kwapelela insi yonsi.”

Ukututuululwa kwa antu yakwe Leza

¹¹ Yawe wavwanga wati, “Pamulandu nu upangano uno napangine namwe uwamalilike ku wazi wa mpolelwa, nemo lyene namapususya antu inu mu uzya, namayafumya mu ciwina ca uzya, umutaya amanzi akumwa.

¹² Swililinimo mwe azya mwemuno mukalolela ukukululwa, swililini ku mwinu kwa kwikalilila umutende. Ilelo kwene namunena ukuti ndamulambula amaila yaili, pali vyonsi sile vino mwaculile.

¹³ Pasi pano nemo namuteyanya mwe Ayuda wa ulapwa wane. Nimwika wa luceto mwe ina Izlaeli. Aonsi amu Zioni ali yano namaomvya wa lupanga, pa kulwisya aonsi amu Gilisi.”

¹⁴ Lyene Yawe alalolekela lwa papela pa antu yakwe, alaafika inceto ale zikumyantula sile wa nkuwa. Yawe Simwandalali alalizya intandala, nupya alatunkila uku katutu, aliza akupita mu cipunga ukufuma ku kayeya.

¹⁵ Yawe Wamaka yonsi alacingilila antu yakwe, nayo yalakomola anisi yao. Mu nkondo antu yakwe yalapunda wa antu ati yakoleka uwengwa, yalazwisya uwazi wa anisi yao, uno ulaazwa kwati uwazi wa mpolelwa uno yitulwila mu lweso pa kavuwa ka mpolelwa.

¹⁶ Lino uwanda uo ulafikila, Yawe alapususya antu yakwe, ndi vino kacema akapususya imfwele zyakwe. Nayo yalaengesa mu mpanga yakwe, wa tumawe twamutengo utukayengesa mu ngala ya wene.

¹⁷ Iye mwe vino mpanga ilya ilaloleka kuyemba! Ingano zilaleka alumendo yakula na amaka, na waini wa matingi umupya alaleka akazyana yakula ayembe