Yelemiya 12 - Amazwi Yakwe Leza 2013

Ukuilizyanya kwakwe Yelemiya

¹ Yawe nemo nga natuula umulandu kunuli, awewe ukalungamika. Lelo nemo indi na cimwi icakuuzya kunuli, pamulandu nu ulungami. Uzye kwene icani cino antu aipe nayo yakalolela ulongo? Uzye pacani cino incenjezi zya antu zikaikalila ku matwi cele?

² Wemo wewe kwene ukayalema wa milemo. Nayo ali pakutamba wa misisi, iyakula yasuka yaseeka ni viseekwa. Kuvwanga kwene, awe cumi yakavwanga usaka usaka. Lelo ukuti yakusumbeko amano, awe kwene foo.

³ Lelo wemo Yawe wamanya, nupya ukalola vino nkacita na vino nakutemwa. Antu yaa aipe, wemo uyatintanye wa mfwele zino yakutwala ku kukomwa. Yawakilile mpaka uwanda wa kukomwa uce usuke ufike.

⁴ Uzye ukuumalala kwa mpanga itu kulasila lilaci? Ukuuma kwi sote mu vyalo vitu nako kulasila lilaci? Inyama zikufwa, ivyunyi navyo vikufwila sile pamulandu nu uyi wa antu aikala muno mpanga. Pano yene yakalola kwati wemo usyalola vino yakacita.

⁵ Yawe nawe ali pakuvwanga ati, “We Yelemiya ndi cakuti wemo watonta ukucimvyanya na antu, ale lelo fwandi mungazingana uli ni mfwalasi? Ndi cakuti waposiwa kusimula mu mpanga itambalale, uzye lyene ungaca usimule uli umu misitu yamu Yodani?

⁶ Ala na anyonko kwene amu lupwa lwako nayo yalakutazyela. Yene yaluminkana ni umba ililiza ku kukulwisya. Acino fwandi utayalondelezya nanti angala yakuvwanga amazwi yakwe ucuza.”

Yawe uvwila antu yakwe ulanda

⁷ Yawe walanda wati, “Natintazyela antu yane. Ninkana umutundu wane usololwe. Nasumba antu yane akundwe mu makasa ya anisi yao.

⁸ Antu yane asololwe yatiyamfutatila, kwati a yacisama mu mutengo vino yakung'anzila. Ali cino nani ninjapata.

⁹ Antu yane asololwe yakoline wa cunyi cino yatiyazanza konsikonsi uku makozi. Lyene yakwama ni nyama zyonsi izya mpanga kuti zize ziilyokezye.

¹⁰ Yakateeka aingi amu mpanga zyuze yatiyonona icalo cane ca matingi. Impanga yane ino itaizipila yatiyaisangula wa lwanga.

¹¹ Yatiyaisangula wa lwanga, lino nani nkuilolela. Impanga yonsi yatisanguka wa lwanga nu wakuti aisakamale kusi.

¹² Antu yali yacilinganya imilundu yonsi yamu lwanga nu kwiza mu kuzanza impanga ii. Nemo ninjakatusizya inkondo ya konona impanga yonsi. Kusi nanti wenga wino amasyala aikalile umweneco ku matwi cele.

¹³ Antu yane yatovya ingano, lelo yamazombola sile ivikona. Yaombesya apa maka, lelo yaicuzya sile. Apa mulandu ni cipyu cane ivyakulya vyakana.”

Ulayo wa Mwene ku inipamba yakwe Izlaeli

¹⁴ Nupya Yawe avwanga ati, “Nemo indi penepo na vimwi vyakulanda pa lwa antu aipe ainipamba yakwe Izlaeli. Ala antu yayo yonona impanga ino ne mweneco napiile ku antu yane aina Izlaeli. Antu yayo nemo ndayafumya umu mpanga zyao. Yalaya wa muti uno yatukula, alino ndapususya aina Yuda.

¹⁵ Lelo alala lino nayafumyamo, ndayakwatila uluse, ndawezya na cila muntu uku mpanga yakumwao nu mu vifoloma vyao.

¹⁶ Antu yayo ndi cakuti yaca yapokelela upefi wa antu yane, nu kulapa yalapa umulapo yati, ‘Leza andye, yata nu kupepa Baali ndi vino yasambilizye antu yane ukulapa mwi zina lyakwe Baali, ale lyene nayo kwene yalaya pamwi na antu yane.

¹⁷ Lelo ndi cakuti uluko lumwi lwa antu yamwi lwakana ukuyela, lyene ale ndalutukulula nu kulonona mpaka lulowelele. Endi, anene ne Yawe navwanga.’ ”