Yelemiya 10 - Amazwi Yakwe Leza 2013

Upefi wampomvu nu upefi wa tuluwi

¹ Mwe ina Izlaeli uvwini vino Yawe akumunena.

² Wene wavwanga wati, “Mutasambilila imisango ya antu amu mitundu yuze. Mutazakaza vimanyililo vya mulwelele, nanti angala imitundu yuze ikavyoopa.

³ Pasi pano intambi zya mitundu yuze, izyasilesile. Yene yakakoma imiti mu mutengo, alino kawaza nawe auwaza ku makasa yakwe ni mpato.

⁴ Alino yaemvya iciwaze kuli siluva na zaabu. Alino yacipampamila ningo ku nondo ni nsunga apakuti vilemane ningo.

⁵ Utuluwi twa musango uu tukoline ni vintu vyakofezyako ivyunyi umu vyalo vya viimbi. Vyene visivwanga nupya ivyakusenda sile, pamulandu wakuti vitangapita. Fwandi mutavyoopa. Vyene vitange vimucitile akantu akaipe nanti kamwi, nupya vitange vimutumbwile icisuma nanti cimwi.”

⁶ We Yawe, ala kutaya uwakolana nawe. Wemo wewe mukulu, nga ni zina lyako ilikulu nupya ilyamaka wakwe cimwi.

⁷ Wewe uli Mwene wa mitundu yonsi. Aweni fwandi atange akoope? Caticikulinga kuti yonsi yakucindika. Pano kusi nanti wenga uwaya wakwe wewe, pa antu yamano yonsi amu mitundu yonsi nanti pakasi kakwe yamwene yao.

⁸ Yonsi pano yapela atumpe nupya imbulisi. Uzye yangasambilila cani ku tuluwi twa mbao?

⁹ Tuluwi twao yatupomela siluva ukufuma ku Tasyisyi na zaabu ukufuma ku Ufazi. Vyonsi vivyo vikapangwa sile kuli yafundi na yamusyanyi. Nupya yavizwika insalu ziyenzulukile ni ziyenzu, zino zyapikulwa ningo kuli yakapikula

¹⁰ Lelo wemo Yawe, wewe uli Leza wacumi. Wewe uli Leza waumi, nupya Mwene wa pee. Lino wasoka, insi ikatenta. Antu amu nko zyuze yatangazizimizya ukali wako.

¹¹ Mwe antu fwandi muyanene ukuti tuleza ututaumvile iyulu nanti insi, tulalowa. Tutalatala tuvwike muno nsi awe.

Ulwimbo lwa kulumbanya Yawe

¹² Yawe aliwe wapanzile insi ku maka yakwe, ku mano yakwe waumvile impanga, nu kwanza iyulu ku kucenjela kwakwe.

¹³ Lino wene wapeela ilamulo, amanzi nayo yacita cilulumo kwiyulu. Wene akasensensya amakumbi ukufuma ku mpela ya nsi. Akamyantula inkuwa mu mvula, nu kutuma umuza ukufuma umu nkoma zyakwe.

¹⁴ Cico cikapezya antu amano, yaposiwa nu kucuvwa. Yayo akapanga utuluwi yakalemwa insonyi. Utuluwi twao utwaufi nupya tutakwata umi.

¹⁵ Twene utwaciwelewele sile nupya twasuulwa. Lino antu yayo yalapingulwa, ali lino twene tulononwa.

¹⁶ Leza wakwe Yakobo atakoline nato. Wene uwaumvile ivintu vyonsi. Nupya aliwe kwene wasolola aina Izlaeli kuti yaye antu yakwe kololo. Izina lyakwe a Yawe Wamaka yonsi.

Kulaya kusendwa mu uzya

¹⁷ Mwe antu amu Yelusalemu mwazanzwa! Nyepini iviya.

¹⁸ Yawe Leza wasya amuvwintile kutali ni mpanga ii.

¹⁹ Antu amu Yelusalemu yapunda yati, Silolini vino twacisika! Ivilonda vitu vitalapola. Swemo twelenginye ukuti tungazizimizya ku ucuzi uu!

²⁰ Amataalu itu yatiyononeka. Imyando ino yailemelile yatiputoka yonsi. Ana itu yonsi yatiyatusya. Pasi nanti wenga asile wakuti asimpe amataalu itu nupya. Pasi nanti wenga uwakukoweka ivisalu kweneko.

²¹ Nani ali pakwasuka inti, “Intunguluzi zitu izitumpe. Zyene zisiuzya Mwene vino angazitungulula. Uli mulandu uno zyene zyaposiwa, nga na antu itu yasalangana.

²² Uvwini kuno! Malamulo asuma yiza! Icongo cikalamba cuvwika ukufuma ku katutu! Ivita vyakweco vilasangula imisumba yaku Yuda iye ulwanga, iye uwikalo wakwe yankusa.”

Ipepo lyakwe Yelemiya

²³ “Yawe Leza wamanya ukuti umuntu atange aisolwele umweneco uyo wakwe. Kusi umuntu uwakwata amaka apa umi wakwe.

²⁴ Tukalipile sile swe antu yako we Yawe, lelo utacizya umu cipimo, nanti kutuvunuka lino wasoka.

²⁵ Twala ukali wako ku antu amu mutundu uno usikupepa, na pa antu yano yakukana. Yene yakoma antu yako. Yene yatonona yatumalilila, nu kusya impanga itu ivitalang'anda.”