Nyimbo zya ndosya 4 - Amazwi Yakwe Leza 2013

Ivyali Yelusalemu pacisila ca kuwa kwakwe

¹ Zaabu witu uwampiti umuyengese watafutalila! Amawe amu Ng'anda ikulu yakwe Leza yatiyasansantikila mu masansa yonsi amiseo.

² Ance amu Zioni acindime wakwe zaabu, lyene yangakolana sile ni nyungu ziivu zyakwe nakamata.

³ Na yankusa kwene yakaonsya ana yao, lelo antu yane yakoline ni mbuni mu lwanga, azauke ku ana yao.

⁴ Yene yakaleka ana yao yafwa ni nzala nu lusala. Utwana tukulenga vyakulya vyakuti tungalya, lelo pasi uwakutupeela nanti cimwi.

⁵ Yao alyanga ivisuma lyene yakwalangana umu miseo. Yao akulile umu nsalu izyamutengo, lyene ali yano yakufulukuta umu vitumba.

⁶ Antu yane yatiyavunukwa ukuluta navino cali ku ina Sodoma, yayo aononyilwe mu kupumikiziwa nupya kutali uwakuyazwa.

⁷ Yacilumendo amu Zioni ayengesanga mpee ukuluta na pali kungwi, ali ayenzulukile imili ukuluta na pa tumawe twamutengo utwakwe kolo, nanti utumawe tukankala twakwe safilo.

⁸ Lyene impini zyao zyafita fititi wa makala. Nu mu miseo yasimanyikwa foo. Inkowa zyao zyalematila uku mafupa yao, zyumilila na ndi wa vimiti

⁹ Yayo akomilwe ku lupanga yasyusile wakwe cimwi ukuluta yano yafwile pacisila, yayo yongokanga panono panono, apa kuulilwa ivyakulya kuti yaye nu umi.

¹⁰ Anaci nanti angala yakweti uluse uli, yasusile yeleka ana yao nu kuyalya pamulandu nu uzanzo uwaponile antu yane.

¹¹ Umwene watafusya ukali wakwe. Wene wakozizye umoto umu Zioni uno wosile Zioni nu mu mifula kwene.

¹² Yakateeka ya panonsi kumwi na ikalansi kwene yatazumile ukuti icipondo nu mwanisi yalingila pa mpongolo zyakwe Yelusalemu.

¹³ Lelo cacitike pamulandu wakuti yakasema yakwe yifizye na yasimapepo yakwe yali nu mulandu. Wakukoma antu akaele.

¹⁴ Yene yapulupuntanga wa mpafu umu miseo, ala yatiyakandana uwazi cakuti wensi ala akoopa ukuyalemamo.

¹⁵ Antu yalaizyanga ala yakuti, “Senkini! Mwemwe yakowele! Funtukini! Funtukini! Mutatukumya!” Acino nayo ali vino yafumile nu kuutukila ku inamasi, nga kusi umwi uwayazengile.

¹⁶ Umwene atayasakamile foo, ali pakuyasalanganya. Wene atacindamike yasimapepo ni ntunguluzi.

¹⁷ Ukulunda pali cico, amanso itu yasusile yatonta. Twatwalilile ukulolela ukwazwiliziwa ukufuma ku luko luno lutange lututuule.

¹⁸ Anisi itu yatucevyanga, cakuti twaposiwe nu kutampula intampulo mu miseo. Amanda itu yalanga yasila ni mpela yitu yatiyiza.

¹⁹ Yayo atuzinganyanga yali nu lwilo ukuluta yacipungu atiyavuka umu lwelele. Yatuzinganyanga umu myamba nu kututeyamila umu lwanga.

²⁰ Yalemile intulo ya umi witu, wiyo wino Yawe wasolola, wino twataile mwenemo ukutucingilila ku muzanzi ali wensi.

²¹ Sansamukini, zangini mwe antu amu Edomu mwe ikazi yamu Uzi, ponsi pano mutemilwe. Lelo namwe kwene uzanzo ulamuponela nga yalamupisya tupu, ni nsonyi zilamulema.

²² Zioni watalipila api iifyo lyakwe. Yawe atalatwalilila ukututa tuye mu uzya. Lelo we Edomu, Yawe alakuvunuka. Wene alasokolola apaswe ni vyaukakasi wako.