Biblia Todo Logo
線上聖經

- 廣告 -

Nyimbo zya ndosya 1 - Amazwi Yakwe Leza 2013


Ulanda mu musumba wa Yelusalemu

1 Iye mwe vino umusumba wa Yelusalemu wazuuka cele. Mumo umwazile antu tupu! Umusumba uno umuntu ali wensi wazungukisyanga, lyene ali uno watiusyala wakwe mukamfwilwa. Umusumba uno wacindamisye pali yonsi, ali uno watiusanguka uwa antu yano yakuomba umulaaza.

2 Yano yasiile mwenemo yakulosya uwaca nu wila. Aminsozi yakulukuta sile umu vipa nu kutemukila pa matama yao. Apa antu yonsi yano ayatemilwe, pasi nanti wenga wiyo wakuyamyalalika. Yacuza yao yatiyayasangukila yonsi pyu. Lyene ayayo iyaya anisi yao.

3 Yuda watawa. Wene watasendwa umu uzya uku mpanga ya inamasi. Lyene wataikala umu inamasi, nga atakweti na pakufutila. Wene yatiyamuzinguluka ku anisi, nga atakweti nakuno angutukila.

4 Kusi nanti wenga wino akuya nupya ku Ng'anda ikulu yakwe Leza ku kupepa umu manda amuzilo. Akazyana yano iimbilanga inyimbo pasi pakucula. Yasimapepo nao yakuteta. Impongolo zya musumba zili pwanku. Icumi kwene Zioni ali umu ucuzi.

5 Anisi yano yapokolola umusumba lyene asangwike aeneco ya musumba. Umwene uwatamuletela ucuzi uwo pamulandu wa maifyo yakwe avule. Ana yakwe yalemwa nu kusendwa uku uzya.

6 Ukuyemba kwakwe Yelusalemu lyene kutacilipo. Intunguluzi izyaya mwenemo lyene zili wa nswela zino yakalunga yakuzinganya, izitakweti iteko apa kuliila umulemvwe. Zyasuka zyaulwa amaka uku nzala.

7 Yano yali umu Yelusalemu mpiti yakwiusya vino umusumba wao wacindime mpiti. Lino kwali ukucimba ku anisi, kutali nanti wenga uwakuyatuula foo. Anisi yao yayasowekanga nu kuyawela apakulola kuno yaciimba.

8 Yelusalemu waifya apakalamba, nga acino wataikowezya asyala tupu! Yonsi amucindikanga mpiti yatiyamusuula. Ali cino lyene akufuteka nu kuvimba apa manso pamulandu ni nsonyi.

9 Ukukowela kwakwe kwalolekanga apaswe. Lelo wene atatailanga ukuti alasyama wakwe vino cili. Ukuwa kwakwe kwali ukwakuzunguka. Kutali nu wakumumyalalika foo. Wene wapapatanga sile kuli Yawe ala akuti, “Sungala ulole ulanda wane, pano anisi yane yatiyancimvya.”

10 Anisi yatiyamupoka ivyuma vyonsi. Wene watailolela nakuno ainamasi yakwingila umu Ng'anda ikulu yakwe Leza, yao yano we Yawe wainda ukwingila muno antu yako yakakongana.

11 Aina Yelusalemu yakuteta lilyo lino yakulondelezya vyakuti yangalya. Yene yakukaula ivyuma vyao ni vyakulya pakuti yatwalilile kuya nu umi. Yakulosya yati, “Mwene sungala undole sile luseluse. Lola vino yakunsaalula.”

12 Yakunena ali wensi uwapita pano yatenzi yati, “Silolesyini mwe! Uzye kwatala ikuya antu acula wakwe sweswe? Ukwene uli ucuzi uno Yawe watandetela uku cipyu cakwe cikalipisye.

13 “Wene watamponyezya umoto ukufuma umupela, nga nao wiza umansolokota umu mafupa. Wene wanteya ulukose nga nalo lwamvwampwila ukunzi. Nga lyene wansya vivyo kwene, nasyala nkucula uwaca nu wila.

14 “Amaifyo yitu wayamanya yonsi pyu nupya wene wayanyepa pamwi. Wene wayanyinyinzya mu nsingo yane, nga nane nanyomelwa. Ala Yawe wansumba mu makasa ya anisi yane yano ntange indwe nayo, awe.

15 “Asilika itu yonsi aakama, Yawe wayasuuzile wakwe cimwi. Wene ali pakutuma ivita vyakwiza komola alumendo itu. Antu itu yonsi ampomvu wayavungola pyu wa matingi mu cifenelo cakwe.

16 “Vii, vili vintu vino vilenzile kuti nalosya, nga nu mu minso yane muzile aminsozi. Kusi umwi wakuntekezya, nu wakunkomelezya kwene asipo. Ana yane nayo intete zyatiziyalema pano umwanisi watancimvya.

17 “Swe ina Zioni akula twanza amakasa itu, awe kusi nanti wenga uwakututekezya. Yawe wataama anisi ukufuma monsi monsi akwizalwisya Yakobo. Yene yasausya Yelusalemu wa cintu cimwi cikowele.

18 “Lelo Yawe walungika, pasi pano natalamile amasunde yakwe. Munguvwwe mwe antu mwensi. Lolini vino nkuwaikwa. Alumendo na akazyana yane yasendwa umu uzya.

19 “Nalaizye kuli yacuza yane, lelo yene yakanyile ukungazwa. Yasimapepo yane ni ntunguluzi yafwilile mu miseo ya musumba, muno yalondelezyanga vyakulya pakuti yatwalilile ukuya nu umi.

20 “We Yawe, silola ulanda wane! Munda mwane mukuzakaza! Umwenzo wane ukukulukunta pano nene mutalami. Umu miseo muli utazi wa katwe, nu mu mang'anda muli imfwa.

21 “Si ungala uvwe kuteta kwane, kusi uwakuntekezya. Anisi yane yonsi yakuzangila umu ucuzi uno wamponyezya. Ungala ufikilizye zuwa uwanda uwa uno walavile uleke nayo yace yaye vinondi.

22 “Si yapeele umulandu apa nkota zyao zyonsi. Uyavunuke ndi vino wamvunwike apa maifyo yane. Nemo nkunyunguluka umu ulanda, nu mwenzo wane wationgoka.”

Mambwe-Lungu Bible © The Bible Society of Zambia, 2013

Bible Society of Zambia
跟著我們:



廣告