Mpendwa 14 - Amazwi Yakwe Leza 2013

Antu yainong'onya pali Yawe

¹ Mu usiku uwa onsi iumba lyonsi ali pa kulaizya sana iyalila akalanda nu kupooma.

² Aina Izlaeli yonsi pyu yailizyanya kuli Mose na Aloni, yonsi kwene yala yakuti, “Cange cizipe swemo ndi twafwilile sile mu mpanga ya Eguputo nanti mu kwene mu lwanga!

³ Uzye pacani cino Yawe akututwalila mu mpanga ilya? Swemo tulakomwa mu nkondo, alino yalatupoka aci itu na ana itu. Uzye ukuswilila sile ku Eguputo kutange kuzipe?”

⁴ Alino iyalanzyanya yati, “Katule tusolole sile intunguluzi itu nu kuswilila ku Eguputo!”

⁵ Lyene Mose na Aaloni yafukama pansi yafupime pa manso yi umba lyonsi lya ina Izlaeli, ilyakongine.

⁶ Nga Yoswa umwana umonsi wakwe Nuni na Kalebu umwana wakwe Yefune, yao ali pali yano yaile ku kwendezya impanga, iyalepula vyakuzwala vyao pakulanga ulanda,

⁷ iyanena ni umba lyonsi lya ina Izlaeli yati, “Impanga ino twaile twendezya lino wapitanga mwenemo aimwi iziipe cuze.

⁸ Yawe ndi watemwa angatwingizya mu mpanga ilya nu kuipeela kunotuli. Impanga ilya ikulu nupya ivunde cuze.

⁹ Acino mutatalamila Yawe nupya mutoopa antu amu mpanga ilya, pano tulayacinzola sile. Tuleza twao twatitufuntuka kunoyali. Lelo swemo Yawe ali naswe. Caleka mutayoopa foo.”

¹⁰ Lelo iumba lyonsi lyalandanga pa kuyatama na mawe. Alino papo kwene ucindami wakwe Yawe iuloleka ku ina Izlaeli yonsi mwi Taalu lya Ukongano.

Mose wapapatila Antu kuli Yawe

¹¹ Yawe anena Mose ati, “Uzye antu yaa yalansuula kufika lilaci? Uzye yalakana kunzumila kufika lilaci, nanti angala nemo nacita vizungusyo pakasi kao?

¹² Ala ndayaponyezya impungo nu kuyonona, lelo wemo ndakucita cikolwe ca mutundu umwi ukalamba, uwa maka ukuyaluta.”

¹³ Lelo Mose nawe anena Yawe ati, “Wewe wafumizye antu yaa mu Eguputo, ku maka yako. Lino aina Eguputo yaluvwa vino watucitila antu yako,

¹⁴ lyene ali vino yalalandila antu akaikala mu mpanga kwene ii. Antu yaa yamanya ukuti we Yawe uli naswe, nu kuti mukalolana na antu ntontonto pa manso lino ikumbi lyako lyaya pa cifulo cino yakaikala mwenemo. Nu kuti ukayakolelela pa nkolelo musanya mu mvumba yi kumbi, nu usiku namo mu mvumba ya moto.

¹⁵ Ali cino fwandi ndi onona antu yako yonsi pyu iila lyonga, ale lyene inko zino zyuvwile ululumbi lwako zilalanda

¹⁶ ziti, ‘Yawe wakomile antu yakwe mu lwanga pamulandu wakuti waposiwe ukutwala antu yakwe mu mpanga ino wayalavile ukuyapeela.’

¹⁷ Caleka ndakai, we Yawe, napapata, si langizya maka yako nu kucita vino walavile lino wavwanzile uti,

¹⁸ ‘Ne Yawe nsisoka zuwa, nga nakwatisya ukutemwa ni cumi. Nupya nkaelela antu amaifyo na ucisanguka wao. Lelo ntalapanya ana na izikulu pa maifyo yakwe ya isi ukufika nu ku nkulo yakwe citatu na cini.’

¹⁹ Fwandi ndakai, we Yawe, ukulingana nu lukundo kwako ulukulu, napapata elela iifyo lya antu yaa ndi vino wacisile ukutandika sile lino yafumile ku Eguputo kufika na pi lelo kwene.”

²⁰ Yawe aasuka ati, “Namayelela uluse, kulingana nu kupapata kwako.

²¹ Nga lelo nkulaya ukuti vino ndi nu umi nga nu ucindami wane wazula insi yonsi,

²² kusi nanti wenga uwamu antu yaa yonsi alingila mu mpanga ilya. Yene yalola uluswepo ulwa ucindami wane ulwacatanga nga ni vilangililo vino nacisile mu Eguputo nu mu lwanga, lelo yanjezyanga amaila na maila nu kukanayela amazwi yane.

²³ Kusi nanti wenga alingila mu mpanga ino nalavile ukupeela ivikolwe vyao. Kusi nanti wenga muli yonsi ali ni misuli kunondi alingila mwenemo.

²⁴ Lelo pamulandu wakuti muomvi wane Kalebu wakwata umwata uze nupya acili akunjela ukufikapo, ali wino ndingizya mu mpanga ino waile aendezya, nga ilaya iyakwe yao amu mupanda wakwe.

²⁵ Pasi pano aina Amaleke na ina Kenani yakwikala mwenemo mu vifoloma, mutondo muce mutenuke nu kulungama ku lwanga lwaku nzila iyaya kuli Yemba Muyenzu.”

Yawe wavunuka antu pa kuilizyanya kwao

²⁶ Yawe anena Mose na Aaloni ati,

²⁷ “Uzye iumba lii ilipe, lilata lilaci ukuilizyanya pali nene? Natinuvwa ukuilizyanya kwa ina Izlaeli pali nene.

²⁸ Ali cino uyanene uti, ‘Ivyalanda ne Yawe ukuti vino ndi nu umi, nalapa ukuti namamucitilanga kulingana na mazwi yano nkuvwa mukulanda.

²⁹ Mulafwa nga ni vyala vinu vilalambalala monsi muno kwene mu lwanga. Mwensi pyu ukutandikila pa myaka amakumi yaili ukuya papela, mwe muno yapenzile pa nsita ya kupenda, mwensi mwe muno mwailizyanyanga mutalingila mu mpanga ilya.

³⁰ Kusi nanti wenga alingila mu mpanga ino nalafile ukumupeela kuti mwaikalamo, suka sile Kalebu umwana wakwe umonsi Yefune nga na Yoswa umwana umonsi wakwe Nuni.

³¹ Ana inu yano mwavwanzile imuti yalayasenda uzya, ali yano ndingizya mu mpanga ino mwemo mwaikanyile, nga yalailyokezya ukwikala mwenemo.

³² Lelo mwemo mulafwila mukwene mu lwanga. Ivyala vinu vilalambalala monsi mu lwanga.

³³ Ana inu nayo yalazeuluka mu lwanga pa myaka amakumi yani, nu kucula pa kutalama kwinu suka ukufika lino umuntu wensi uwa munomuli akafwe.

³⁴ Mulacula pamulandu wi iifyo linu amanda amakumi yani, nu wanda onga mu manda yalya yano mwaile mwendezya impanga, ukwimilila umwaka onga. Ali pakuti mukacilole, mukasambilile vino kuvunukwa na Yawe kwaya!

³⁵ Nalapa ukuti indi nu kucita cii kunomuli mwe antu yaukakasi, mwe muno mwakongine pa kumpangila. Mukwene mu lwanga amuno mulafwila mwensi pyu. Ne Yawe natimvwanga.’ ”

³⁶ Antu yonsi yano Mose watumile ku kwendezya impanga, yano awezile nu kwiza tunka iumba lyonsi lya ina Izlaeli pakuti yailizyanye kuli Yawe mukusalanganya impwelo yaufi iyakwifya impanga,

³⁷ yaya kwene asalanginye impwelo yaufi iyakwifya impanga, impungo yayaponile iyafwila papo kwene pa manso yakwe Yawe.

³⁸ Pa antu yano yaile ku kwendezya impanga pasile sile antu yaili, Yoswa umwana umonsi wakwe Nuni na Kalebu umwana umonsi wakwe Yefune.

Yaposiwa kwingila mu Kenani

³⁹ Lino Mose waya wanena aina Izlaeli amazwi yano Yawe wavwanzile, antu nayo pasi pa kupomola impoma.

⁴⁰ Alino uwanda uwalondelilepo katondotondo iyakatuka, iyatumbela impanga ya myamba ala yakuti, “Lolini, ndakai tuiteinye ukuya ku ncende ino Yawe watulaya. Nga tukuzumila ukuti twatitwifya.”

⁴¹ Lelo Mose avwanga ati, “Uzye pacani cino mukaniile ukuyela isunde lya mwene? Cico cene cisikuomba, mumaposiwa.

⁴² Mutezya mulemele kweneko pano Yawe asi namwe, nupya mumacimviwa na anisi inu.

⁴³ Lino mumalungatana na ina Amaleke na ina Kenani mu nkondo, mwemo mumafwa. Yawe atamaya namwe pamulandu wakuti mwatimumutalamila.”

⁴⁴ Lelo mukuitumpoka kwao yene iyatandika ukutumbela impanga ilya ya myamba, nanti angala Mose pamwi ni Mbokosi ya Upangano atafumile pa nsakwe.

⁴⁵ Aina Amaleke na ina Kenani aikalanga mu mpanga ilya, mu myamba, ali pa kutentemuka nu kuyazanza. Iyacimvya aina Izlaeli nzila yonsi kufika nu ku Holima.