Ezaya 59 - Amazwi Yakwe Leza 2013

Kasema Ezaya wakalipila antu pa uyi wao

¹ Ikasa lyakwe Yawe litipimpala cakuti liposiwe ukupususya, nanti amatwi yakwe yatapuulama cakuti yakane ukuuvwa.

² Lelo uyi winu ali uno wiimba polowe pakasi kinu na Leza winu. Amaifyo inu ali yano yaleka ukuti ivinso vinu vifisame kunondi. Ali lovyo kwene.

³ Pano amakasa inu yafitisya pamulandu nu wazi, ni minwe inu nayo yafitisya pamulandu nu ukakasi winu, utunwa twinu tukalanda vyaufi, ni ndimi zinu nazyo zikatotoza vyautalami.

⁴ Mwemo nanti mwaya ku vilye vya milandu, imilandu ino mukalolwela auzo iyalufyengo sile. Mwakomela sile ukusomba ufi apakuti mwemwe icilye camuyela. Mukaya kweneko ala mwatimupanga umwakufyengelekezya auzo.

⁵ Uyi uno mukacitila auzo wakolana nu usungu uwaya mu mayayi ya nzoka yano zikata, nanti wa citeyo icaya mwi sumbo lyakwe pengauyo, wino walya lyonga ala wafwa. Ndi mwatama iyayi lyonga ala mwafuma inzoka!

⁶ Fwandi vino mwemo mukapanga, visi vyakumuombela akantu nanti kamwi foo. Vyene ivyaciwelewele sile. Icili conga sile na vino insalu ino yapikwilwa nu usavu wakwe pengauyo!

⁷ Mwemo insita zyonsi sile mukasimwilila uku kucita iviipe. Mukapamviwa ukuzwisya uwazi wakwe yayo akaele. Imyelenganyizizye inu iya lufyengo sile. Inzila zinu izya kutamola nu kukuululula.

⁸ Mutamanya inzila ya longo, mutaya ulungami umu nzila zinu, izinyongane sile. Na wiyo wensi akapita mwenemo atakwata ulongo foo.

Antu yailongwela amaifyo yao

⁹ Antu nayo lyene ali pakuvwanga yati, “Awe cumi lyene twasininkizya icalenga ukuti Leza akana ukutupususya ku antu akatucuzya. Swemo tukalonda uluswepo lwakuti twapita mwenemo, lelo imfinzi itupu aino ikaya kweneko.

¹⁰ Tukapulupunta sile wa mpafu. Ilanzi umutwe pakasi ala swemo tukupulupunta sile kwati watiwila, ungati tuli mu mpanga ya afwe umwafita fititi.

¹¹ Fwandi pasi pantete mwe! Twatituputuka ni misana. Tukulolela sile Leza kuti aize atukulule kuli yano yatuteka imfine, lelo kusi nanti cimwi cino tungacita.

¹² We Yawe, ala vino twaluvyanya kunuli ivivule. Uyi witu ali uno ukutusinila naswe kwene twatituvisininkizya.

¹³ Swemo twakusangukila we Yawe, twafumya amano kunuli, twakana nu kukulondela wewe we Leza witu. Swemo tukacuzya antu yauze nu kukusangukila. Vino swemo tukaelenganya ivyaufi sile.

¹⁴ Ulungami swemo twautazyela, ni vintu vyaulungi tutacikalafukile kweneko. Tukavundawila sile ivintu vyacumi lino tuli umu ncende zya uculuzi mu miseo. Ucisinka muno tuli musi pali ndakai.

¹⁵ Icumi caticicepesya cakuti umuntu umwi ndi wata ukwifya ala lyene wene wailetelela. Vyonsi vivyo ali vino Leza walola nu kusoka wasoka, pamulandu wakuti kusi nanti umwi akacita vyaololoke.

Leza wasokolola iviliza uku nkolelo

¹⁶ Leza akazunguka pakulola ukuti kusi nanti umwi akatuula yano yakucula. Fwandi lyene Leza umweneco kwene amavwandamuka pakuti ayapususye nu kucimvya amacimvya.

¹⁷ Amazwala uwololoke wa cela cakucinga icisao cakwe. Ufyusi ali cisote ca cela ku mutwe wakwe. Icilanduzi ali mwingila uno amazwala nu kuipombelekezya mwi laya lya ukali.

¹⁸ Amalambula ukali kuli cila muntu apa vintu vino wacita. Alafulula na akutali kwene yano yakamulwisya.

¹⁹ Alino lyene yamaoopa izina lyakwe uku uwondaka nu ucindami wakwe uku ufumondaka. Aliza wa luzi luno lwapongwela, luno umupu wakwe Yawe ukusuunka.

²⁰ Lelo wene alizila aina Yelusalemu wakwe Katuula wao, nu kwiza pususya yonsi yano yazenzuka ku uyi wao. Kuu kuli kulanda kwakwe Yawe

²¹ Alino nupya ne Yawe napangana namwe upangano wakuti nemo napeela amaka yane na masunde yane. Fwandi mwemo mulinzile ukuviyela, nu kuvisambilizya ku yana yinu na izikulu inu, ukutandikila sile apilelo ukufika nu kumpela ya manda. Kuu kuli kulanda kwakwe Yawe.