Ezaya 17 - Amazwi Yakwe Leza 2013

Leza alavunuka aina Alamu na ina Izlaeli

¹ Amazwi asowilwe pamulandu wa musumba wa Damasiko: “Umusumba wa Damasiko utalaya umusumba nupya foo. Lelo ulaya sile umusumba wa vitantala.

² Imisumba yaku Aloeli mutalatala mwikale umuntu nupya. Lelo ilaya sile impanga ya kucemelamo, muno imfwele ni ng'ombe zilaaliila, nupya kutalaya nanti wenga alazizinga.

³ Ku Efulemu kutalaya umusumba wi linga, nu ku Damasiko kutalaya uwene. Aina Alamu alasyalapo yalapupana wakwe cimwi, ungati sile avino cali ku ina Izlaeli.” Ivyalanda Yawe Wamaka yonsi.

⁴ “Mu wanda ulya ucindami wakwe Yakobo ulasila, nga ni cuma cakwe cilasanguka ciye upina.

⁵ Izlaeli alakolana wa calo ca ngano cino azombozi yatiyatimpolamo imitwe ya ngano ni minwe yao. Alakolana wa calo camu Cifoloma ca Lefaimu, muno antu yatiyasotolamo ingano.

⁶ Mulasyala sile antu ampendwa yano alapusuka. Impanga ya Izlaeli ilasyala sile wa muti umuolivi, uno yatiyapukunya kweneko iviseekwa vyonsi, nu kusya sile iviseekwa viili nanti vitatu apa ntonje apapela. Nanti iviseekwa vini nanti visano ivisile ku misambo.” Kuu kuli kulanda kwakwe Yawe, Leza wa ina Izlaeli.

⁷ Mu wanda ulya antu yalutukila kuli kaumba wao, nu kucevya amanso kuli Leza Wamuzilo uwa ina Izlaeli.

⁸ Yatalatala yaswilizye ukutaila mu tuvuwa, nanti ukusakamala amaunkolanya yakwe Asyela nga nu tuvuwa twakocelapo ubani, tuno yaikuulila aeneco na makasa yao.

⁹ Mu wanda ulya imisumba yamaka yamu Izlaeli yalaisya ndi vino cali ku misumba ya ina Hivi ni ya ina Amoli, ino antu yasile apa kuutuka aina Izlaeli yalya. Lyene ilaya amatongwa.

¹⁰ Mwe ina Izlaeli, mwatimwilila Leza Katuula winu, mutiwisye Iciliwe cinu ni cele linu ilya kuzina mwenemo. Alino lyene camutwala uku kulimila akaluwi kaleza ka inamasi, icalo ca vilemwa vya luzango.

¹¹ Lelo ivintu vino mungatemwamo ilelo nanti angala vingalemuka, nu kutuuta iluwa umu katondo, awe nce mutange mulole nanti acimwi icakuzombola. Uzombozi wa mwenemo ungamuletela sile ucuzi ni ntazi itangasila foo.

Yawe wacimvya imitundu ya anisi

¹² Owe, antu amu mitundu ivule yakupokota, yakupanga icongo wakwe yemba, wa maimbi akulu yano yatiyimilila yakupumana!

¹³ Imitundu ya antu ino yatiiza yatikatuka wa maimbi akome. Lelo Yawe waikalipila, nga nayo yaswilila mwenemo. Apa kufuma, yene yuluka wakwe cungu. Yuluka wa nsaawa zino zyasendwa kuli nkungulupya.

¹⁴ Apa nsita ya manguzi yonsi pasi pa ntete! Lelo lino kutali kuce, yonsi yasalangana. Endi, avino cilaya ku antu akatusampa ivintu.