2 Yamwene 15 - Amazwi Yakwe Leza 2013

Azaliya umwene waku Yuda

¹ Umu mwaka walenga amakumi yaili na cinimbali uwa kuteeka kwakwe Yeloboamu umwene waku Izlaeli, uli mwaka uno Azaliya umwana wakwe Amaziya umwene waku Yuda nawe watandike ukuteeka.

² Wene wali ni myaka yakuvyalwa ikumi na mutanda apa nsita ino watandike ukuteeka, nga wateesile mu Yelusalemu imyaka amakumi yasano na iili. Nyina wali a Yekoliya, nupya wafumile umu Yelusalemu kwene.

³ Azaliya wacitanga ivintu ivisuma pa manso yakwe Yawe, ndi vino isi Amaziya wacitanga.

⁴ Nga lelo incende zino yakapepela mwenemo zyene atazyononyile foo. Antu nayo yatwalilile ukupeelela impolelwa nu kocela ubani ku ncende zizi kwene.

⁵ Yawe nawe alwalika Azaliya tembwe, nu kufwa wizile afwa ala ali nayo. Azaliya watiile ukufumila apanzi nanti akamulimo akali konsi ataombanga. Yotamu umwana wakwe aliwe wangalilanga isano nu kuteeka impanga mu cifulo cakwe.

⁶ Ivintu vyuze vyonsi vino Azaliya wacisile, ni milimo yakwe yonsi, vyalembwa mu lupapulo lwa Milandu yakwe Yamwene aku Yuda.

⁷ Lyene umwene Azaliya afwa, nga yamuzika pipi ni nzisi ya vikolwe vyakwe mu musumba wakwe Davidi. Alino Yotamu umwana wakwe umonsi amupyana pa cilimba ca wene.

Zakaliya umwene waku Izlaeli

⁸ Mu mwaka walenga amakumi yatatu na cinani uwa kuteeka kwakwe Azaliya umwene waku Yuda, Zakaliya umwana umonsi wakwe Yeloboamu wapilwe uwene wakuteeka mu Izlaeli. Nga wateesile mu Samaliya imyezi mutanda.

⁹ Wene wifyanga pa manso yakwe Yawe, ndi vino ivikolwe vyakwe vyacitanga. Lelo Zakaliya atatelelile ukucita iviipe ndi vino Yeloboamu umwana wakwe Nebati wacitanga, vivyo vino walenzile na ina Izlaeli kuti yaifya.

¹⁰ Syalumu umwana wakwe Yabesyi wene wakatukile umwene Zakaliya, asuka amukoma uku Ibeleamu, amupyana na pa wene aliwe kwene.

¹¹ Ivintu vyuze vyonsi vino Zakaliya wacisile vyalembwa mu lupapulo lwa Milandu yakwe Yamwene aku Izlaeli.

¹² Fwandi ali vino ulayo wakwe Yawe wafikiliziwe, uno wanenyile umwene Yeu ati, “Amu mupanda wako, ukwizafika uku mukulo uwalenga cini, ali yano yalalasikwa pa vilimba vya wene umu Izlaeli.”

Syalumu umwene waku Izlaeli

¹³ Mu mwaka uwalenga amakumi yatatu na fundimbali ya utesi wakwe Azaliya umwene waku Yuda, ali lino Syalumu, umwana umonsi wakwe Yabesyi, nawe wateesile mu Samaliya umwezi onga.

¹⁴ Lyene Menaemu umwana umonsi wakwe Gadi afuma ku Tiliza nga aya ku musumba wa Samaliya. Aliwe kwene uwaile azanza nu kukoma Syalumu umwana umonsi wakwe Yabesyi uku Samaliya kwene kuko. Alino amupyana pa cilimba ca wene.

¹⁵ Ivintu vyuze vyonsi vino Syalumu wacisile pamwi na ucisanguka kwene uno wacisile, vyalembwa mu lupapulo lwa Milandu yakwe Yamwene aku Izlaeli.

¹⁶ Lino Menaemu wafumanga uku Tiliza, umu nzila wasile wavundanya umusumba wa Tifisa, aonona yonsi pyu. Asya wakoma na ikazi yonsi amwenemo, aonona ni mpanga yonsi iyali mu mbali, apakuzana ukuti antu ali mwenemo yatalondanga ukucimba kunoli. Asya wapanza yamangu yonsi anyomelile.

Umwene Menaemu waku Izlaeli

¹⁷ Mu mwaka walenga amakumi yatatu na fundimbali wakuteeka kwakwe Azaliya umwene waku Yuda, Menaemu umwana wakwe Gadi watandike ukuteeka mu Izlaeli. Nu kuteeka wateesile mu musumba wa Samaliya imyaka ikumi lyonga.

¹⁸ Wene wifyanga pa manso yakwe Yawe. Wene walondelanga imisango yakwe Yeloboamu umwana wakwe Nebati, nu kucita amaifyo yano walenzile na ina Izlaeli kwene ukwifya.

¹⁹ Lyene Pulu umwene waku Asilya wazanzile mpanga ya Izlaeli. Alino Menaemu apeela umwene Pulu siluva amakilogalamu 34,000 apakuti amwazwilizye ukuteeka uwene wakwe.

²⁰ Menaemu wakwatile impiya zizyo ukufuma mu musonko uno wasonkesyanga aina Izlaeli. Antu yonsi akama wayalipilisyanga amasyekeli yakwe siluva amakumi yasano. Acino umwene waku Asilya lino wizile, atatenzi umu mpanga ilya.

²¹ Ivintu vyuze vyonsi vino Menaemu wacisile, ni milimo yakwe yonsi, vyalembwa mu lupapulo lwa Milandu yakwe Yamwene aku Izlaeli.

²² Alino Menaemu afwa nga yamuzika ku nzisi ya vikolwe vyakwe. Nga Pekaya umwana wakwe umonsi amupyana pa cilimba ca wene.

Pekaya umwene waku Izlaeli.

²³ Umu mwaka uwalenga amakumi yasano, uwa kuteeka kwakwe Azaliya umwene waku Yuda, Pekaya umwana umonsi wakwe Menaemu yamulasike apa wene waku Izlaeli ku Samaliya, nga wateesile imyaka iili.

²⁴ Pekaya wacitanga iviipe pa manso yakwe Yawe. Wene watwalilile kucita iviipe vino Yeloboamu umwana wakwe Nebati wacitanga, vivi kwene vino walenzile kuti aina Izlaeli yacita.

²⁵ Umuomvi umwi wakwe Pekaya uwi zina lyakwe Peka umwana wakwe Lemaliya, apali ponga na ina Gileadi amakumi yasano, yakatukile Pekaya iyamukoma pamwi na Aligobu na Aliyeli umu muputule wa papela mukasi na nkasi ki sano mu Samaliya. Avili vino Peka wakomile Pekaya nga apyana apa wene.

²⁶ Ivintu vyuze vyonsi vino Pekaya wacisile, ni milimo yakwe yonsi, vyalembwa mu Lupapulo lwa Milandu yakwe Yamwene aku Izlaeli.

Peka umwene waku Izlaeli

²⁷ Mu mwaka walenga amakumi yasano na iili uwa kuteeka kwakwe Azaliya umwene waku Yuda, Peka umwana umonsi wakwe Lemaliya walasikwe apa wene mu Samaliya. Nga wateesile umu musumba wa Samaliya imyaka amakumi yaili.

²⁸ Peka wifyanga pa manso yakwe Yawe. Wene atatelelile ukucita iviipe vino Yeloboamu umwana wakwe Nebati wacitanga, vivi kwene vino walenzile kuti aina Izlaeli yacita.

²⁹ Mu manda yakwe Peka umwene waku Izlaeli, Tigilati Pilesa umwene wa ina Asilya, wizile apoka imisumba ya Iyoni, Abeli Beti Maaka, Yanowa, Kedesyi, na Hazoli. Apoka na Gileadi na Galile, ukwika penepo ni mpanga yonsi ya Nafutali. Nga azingila aikazi ya mwenemo ku mpanga ya Asilya.

³⁰ Umu mwaka walenga amakumi yaili, pano Yotamu umwana wakwe Azaliya wateekanga umu mpanga ya Yuda, Hosyea umwana wakwe Elaa akatuka nu kupingila Peka umwana umonsi wakwe Lemaliya. Asuka amukoma amupyana na pa wene.

³¹ Ivintu vyuze vyonsi vino Peka wacisile, ni milimo yakwe yonsi, vyalembwa mu lupapulo lwa Milandu yakwe Yamwene aku Izlaeli.

Umwene Yotamu waku Yuda

³² Mu mwaka wakwe ciili uwa kuteeka kwakwe Peka umwana umonsi wakwe Lemaliya umwene waku Izlaeli, Yotamu umwana umonsi wakwe Azaliya, umwene waku Yuda watandike ukuteeka.

³³ Wene wali ni myaka yakuvyalwa amakumi yaili na isano apa nsita ino watandike ukuteeka, nga wateesile mu Yelusalemu imyaka ikumi na mutanda. Nyina wali a Yelusya umwana wakwe Zadoki.

³⁴ Yotamu wacitanga ivintu ivisuma pa manso yakwe Yawe, ndi vino isi Uziya wacitanga.

³⁵ Lelo incende zino yakapepela mwenemo utuluwi yatazyononyile foo. Nupya antu yatwalilile ukupeelela impolelwa nu kocela ubani ku ncende zizi kwene. Yotamu akuululula impongolo yakupeela ya Ng'anda ikulu yakwe Yawe.

³⁶ Ivintu vyuze vyonsi vino Yotamu wacisile, ni milimo yakwe yonsi, vyalembwa mu lupapulo lwa Milandu yakwe Yamwene aku Yuda.

³⁷ Cali apa nsita ya uteko wakwe Yotamu, alino Yawe watumile apakutandika umwene Lezini uwaku Asilya, alino lyakwe ciili umwene Peka waku Izlaeli uku kuzanza Ayuda.

³⁸ Yotamu asuka afwa, nga yamuzika mu musumba wakwe Davidi ku nzisi zya vikolwe vyakwe. Nga Aazi umwana wakwe umonsi amupyana pa cilimba ca wene.