Biblia Todo Logo
線上聖經

- 廣告 -

1 Kolinto 15 - Amazwi Yakwe Leza 2013


Kuzyukuka kwakwe Klistu

1 Inane, nkansi kumwiusya pamulandu wi Landwe Lisuma lino nakosozile kunomuli. Mwemo mwalipokelile, nga nu utailo winu iukomeleka.

2 Mulatuulwa ni Landwe Lisuma kwene lii ndi mukuyela mazwi yakwe Leza yano nakosozile kunomuli, ndi cisi vivyo ale mwazumila pa silesile.

3 Namupiile mazwi akulu kuluta yano napokelile. Mazwi yaa, akuti Klistu watufwilile pamulandu wa maifyo itu, ndi vino calembwa mu malembelo.

4 Alino wene wazisilwe nga pacisila ca manda yatatu aca azyukuka kufuma ku mfwa, ndi vino calembwa mu malembelo. Mat 12:40; Mil 2:24

5 Nupya aloleka kuli Petulo nga nu ku atumwa yonsi ikumi na yaili.

6 Alino nupya aloleka ku alondezi yakwe yonsi pamwi kuluta impendwa kulingana myanda isano. Aingi pali yaa yacili aumi, nanti angala yamwi munoyali yafwa.

7 Alino aloleka kuli Yakobo, nga pacisila aloleka ku atumwa onsi.

8 Lyene mukusyalikizya aloleka kuno ndi nemuno nkoline wa mwana uwavilwe kapopo.

9 Nene munono kuluta pa atumwa yonsi nupya citandinzile kwamwa mutumwa pano nazunyizye iuvi lyakwe Leza.

10 Lelo ku cikuku cakwe, Leza wancita kuya vino ndi, ni cikuku cakwe citali caula milimo kunondi kuluta atumwa yauze, nanti angala asi anene naombanga, lelo maka yakwe Leza akankomelezya.

11 Lelo cisi cimwi ndi cakuti kukosola kuu kwafumile kunondi nanti kunoyali. Mwensi kwene mwataile ilandwe mu musango uli onga kwene.


Kufuma ku afwe

12 Ndi cakuti tukukosola ukuti Klistu wazyukwike kufuma ku mfwa, uzye lyene yamwi munomuli yangalanda uli ukuti antu yatalazyukuka kufuma ku afwe yaye nu umi?

13 Ndi antu yatalazyukuka kufuma ku afwe yaye nu umi, ale lyene cikusenula vino Klistu atazyukwike kufuma ku afwe.

14 Nupya ndi Klistu atazyukwike kufuma ku afwe, ale lyene cikusenula vino kukosola kwitu ukwasilesile nupya nu utailo witu kwene uwasilesile.

15 Ndi avino cili ale twaya yakambone yaufi pa kuvwangila Leza vya ntumpu pakuti wene wazyukwile Klistu, ndi mucumi afwe yasyazyukuka.

16 Ndi afwe yasyazyukuka, ale lyene na Klistu kwene atazyukwike.

17 Ndi Klistu atazyukwike kufuma ku afwe, ale lyene utailo winu uwasilesile nupya ale mucili mu umi uwa kwifya.

18 Nupya ale yao afwa ataile muli Klistu, yalowa.

19 Ndi upaalilo witu muli Klistu watuzipila sile mu umi uu, ale lyene sweswe ya ulanda kuluta antu yonsi muno nsi.

20 Lelo cumi Klistu wazyukuka kufuma ku afwe! Nupya akusininkizya kunotuli ukuti yauze nayo kwene yalazyukuka kufuma ku afwe.

21 Pano ndi vino imfwa iizile kupitila mu muntu wenga, vivyo kwene kuzyukuka kufuma ku afwe kuliza kupitila mu muntu wenga.

22 Ndi vino Adamu walesile imfwa kunotuli swensi, avino Klistu nawe waleta umi kunotuli swensi.

23 Lelo cila muntu alazyukuka pa nsita yakwe. Klistu uwali uwankolelo kuzyukuka, nga antu yakwe nao yalazyukuka lino alawela.

24 Alino mpelelekezyo iliiza nga Klistu ale watacimvya mawene yonsi, mauteko yonsi na maka yonsi, nga pacisila apeele Uwene kuli Leza Tata.

25 Pano Klistu alinzile kuteeka kufika lino alacimvya anisi yakwe onsi.

26 Nu mwanisi uwa kusyalikizya kucimviwa alaya imfwa.

27 Pano calembwa mu malembelo cati, “Watu wika vintu vyonsi pisika lya ngazo zyakwe.” Camanyika ningo ukuti mazwi yakuti “Vintu vyonsi” yatalemenkinyeko Leza umwisikulu uwalenzile kuti Klistu acimvye vintu vyonsi.

28 Lelo lino vintu vyonsi vyatekwa na Klistu, lyene Mwana umwisikulu alaleka kuti Isi amuteeka, wino uwamucita kuya kateeka wakwe vyonsi.

29 Uzye lyene tumati uli pali yano akawatiziwilwa afwe? Uzye yene yakupaalila kucita cani? Ndi cakuti cili icacumi, wakwe vino yamwi yakalanda ukuti afwe yasizyukuka, uzye pacani cino antu yaya yakawatiziwilwa afwe?

30 Uzye naswe, ndi avino cili, tungaikala uli mu uzanzo nsita zyonsi?

31 Inane cila wanda nemo nkalolenkana ni mfwa. Kuitakizya kuno nkweti munomuli pamulandu wakwe vino Klistu wacita ukwalenga kuti ndande vii.

32 Uzye mukwelenganya nemo nalonka cani pa kulwisyanya ni vilyanyi muno mu Efeso? Ndi afwe yatalazyukuka, lyene lekini twacita ndi vino calandwa, “Lekini twamwa nu kulya, pano mutondo tulafwa.”

33 Mutaisomba mweisikulu. Yacuza aipe yakaonona miyele isuma.

34 Zinzimukini mu mano nupya tini kwifya. Nkumunena vino ica nsonyi kunomuli pa kuzana ukuti yamwi munomuli yatamanya Leza ningo.


Kuzyukuka kwa mwili

35 Umwi anguzya ati, “Uzye afwe yangazyukuka uli? Uzye yalakwata imili ya musango cii?”

36 Muwelewele we! Lumbezu luno wakomela lutangamela, suka lutale lufwe.

37 Lumbezu luno wakomela icikamela, usi mwili wakwe cino wakomile, ukaiza ukula.

38 Leza aliwe akapeela cila lumbezu musango wa mwili uno akasi kuti lukwate.

39 Antu, inyama, vyunyi, nga ni nswi, vyonsi vyakwata minyefu, lelo kusi nanti conga cino cakolana ni cuze.

40 Kuli vilengwa vya mwiyulu nga ni vilengwa vya pano pansi. Lelo ucindami wa vilengwa vya mwiyulu wapusana nu ucindami wa vilengwa vya pano pansi.

41 Ilanzi lyakwata kuyengesa kwakwelyo, mwezi wakwata kuyengesa kwakweo ni ntanda zyakwata kuyengesa kupusane, nga nu kuyengesa kwa ntanda kwaya ukupusane pakasi kaziko.

42 Vii, avino cilaya lino afwe yalazyukuka. Mwili ukazikwa mu musili wa lumbezu lwakomelwa, ukaola, lelo ulazyukuka mu cisiola.

43 Lino mwili wazikwa wene ukaya mu musango uwiipe nupya utonte. Lelo lino ulazyukuka, wene ulaya mu musango uyembe nupya ukome.

44 Lino mwili wazikwa wene mwili wa untu. Lelo lino ulazyukuka, wene ulaya mwili uwa u mupasi. Kwaya mwili wa untu acino nu mwili uwa u mupasi ulinzile kuyako.

45 Pano calembwa mu malembelo cati, “Muntu wakutandika, Adamu, waumvilwe aya ciumbwa ca umi.” Lelo Yesu wino ali Adamu wakusyalikizya, wene ali Mupasi wino akapeela umi.

46 Twalola ukuti wiyo uwakweti mwili uwa u mupasi atizile nkolelo. Wene wizile pacisila cakwe wiyo uwakweti mwili wa untu

47 Adamu wakutandika, wene waumvilwe kufuma kwi vu. Adamu wakwe cili wene wafumile kwiyulu.

48 Antu yonsi amu nsi yakwata mili ino yakolana wa mwili wakwe Adamu, wino waumvilwe kufuma kwi vu. Lelo onsi amwiyulu yakwata mili ino ikoline wa mwili wakwe wino uwafumile kwiyulu.

49 Wakwe vino twakolana na Adamu, wino uwaumvilwe kufuma kwi vu, vivyo kwene tulakolana na Klistu, wino uwafumile kwiyulu.

50 Inane, nemo nkusenula ukuti mili itu iya minyefu nu wazi ilaola. Cii, cikusenula ukuti yene itangakumako ku Wene wakwe Leza uwa manda pe, nga ni cikaola citangingila mu cisiola.

51 Uvwini nkama ino nati namulondolwela. Asi swensi swe muno tulafwa. Lelo lino ntandala yakusyalikizya ilalila, swemo tulasenulwa.

52 Cii cilacitika zuwazuwa wa kukapaya kwi linso. Lino ntandala yakusyalikizya ilalila swemo tulazyukuka. Swe ya umi tulasenulwa.

53 Mili itu ino ikaola ilinzile kusenulwa pakuti iye mili itangaola. Cikafwa cilinzile kusenulwa pakuti ciye citangafwa.

54 Lino mili itu ino ikaola ilasenulwa iye itangaola, na lino mili itu ino ikafwa ilasenulwa iye itangafwa, alino lyene malembelo yalafikiliziwa yano yakati, “Imfwa yati cimviwa!”

55 “Mfwa we, uzye ucimvyo wako uli kwi? Mfwa we, uzye luoya lwako luli kwi?”

56 Luoya lwa mfwa iifyo, na maka yi iifyo Masunde.

57 Lelo tutaizye Leza, wino uwatupela ucimvyo mu Mwene witu Yesu Klistu.

58 Caleka, mwe inane akundwe, komelikini nupya tekelini mutanenuka. Cincilini lyonsi lino mukutumikila Mwene. Mwamanya ukuti mukuombela Mwene mutaya kucula sile.

Mambwe-Lungu Bible © The Bible Society of Zambia, 2013

Bible Society of Zambia
跟著我們:



廣告