SAN MATEO 25 - Lengua Sur (Enxet) Nuevo Testamento

Jesús apyetcháseykekxoho diez kelán'a étkók

¹ “Máxa sat katnehek aptémakxa nak Wese' apwányam Dios ma'a ektémakxa axta diez kelán'a étkók elya'áyekmo axta sẽlyamhopma, kelmákxeyk axta chálewaso yetlo égmen'ák, kelanyexágkek axta m'a ektaha axta yakwayam kalyamhápok.

² Cinco axta ekyókxoho kelán'a étkók megkatnaheykha axta awáxók, keñe axta anhan cinco ekpenchesamo axta eláneykekxa ektahakxa.

³ Kelsókek axta chálewaso agkok ma'a kelán'a étkók megkatnaheykha axta awáxók, axta eyke kálsókok égmen'ák yakwayam kalyetmekxak ma'a elyamásexko enxoho égmen'ák chálewaso agkok.

⁴ Keñe axta m'a kelán'a étkók ekpenchesamo axta eláneykekxa ektahakxa, kelsókók axta sokpeysyam elláneykegkoho chálewaso égmenek, kelsókók axta anhan chálewaso agkok.

⁵ Yehémek axta apwokmo m'a yakwayam axta kalyamhápok, keñe axta ennapa teyn xa ekyókxoho nak, sawhéxkók axta anhan eknaktena.

⁶ Chágketwokmek axta axta'a eysekso', kelleg'ak axta ektaha kélpeywa ekyennakte s'e: ‘¡Apxegakmek yakwayam kalyamhápok! ¡Kóllanyexák!’

⁷ Sawhéxkók axta eknakxétekhágko xa kelán'a étkók nak, kelánegkakxeyk axta chálewaso agkok.

⁸ Keñe axta elpakmeta kelán'a étkók megkatnaheykha axta awáxók elpakhetchesa m'a kelán'a étkók ekpenchesamo axta eláneykekxa ektahakxa. Entahak axta eláneya s'e: ‘Hegmés negko'o ketsék chálewaso égmenek, hakte peyk negko'o kalsapónak chálewaso egagkok.’

⁹ Wánxa agkok, entahak axta elátegmowágko kelán'a étkók ekpenchesamo axta eláneykekxa ektahakxa s'e: ‘Ma', mehegwakxók negko'o xa, megkawakxók nahan kéxegkáxa, akke tásek kélmeyákxo enxoho m'a kélchexakhamakxa nak, kóltegye' yakwayam kólmaha kéxegke.’

¹⁰ Apwakteyk axta yakwayam kalyamhápok neyseksa elxega xa cinco kelán'a étkók nak ektegyagwákxo chálewaso égmenek, keñe axta elántaxna kañe' tegma yetlo kaxwé yakwayam kalyamhápok ma'a kelán'a étkók ekpenchesamo axta eláneykekxa ektahakxa. Keñe axta kélapeykxo átog.

¹¹ Kelwákxeyk axta makham xa kelán'a étkók elxega axta. Entahak axta elpeywa s'e: ‘¡Wese', wese', henlekkes negko'o átog!’

¹² Wánxa agkok aptahak axta apchátegmowágko wese' s'e: ‘Nakso' ektemesásak malyekpelcha kéxegke.’

¹³ Keñe axta anhan aptaha apkeláneya Jesús énxet'ák se'e: “Nágkólnakténho aksa kéxegke, hakte megkólya'ásegkok kéxegke ekwánxa ekhem, megkólya'ásegkok nahan ekwánxa hora.

Jesús apyetcháseykekxoho selyakye

¹⁴ “Máxa sat katnehek énxet keto' apmaheykegkaxal'a mók apkelókxa m'a aptémakxa nak Wese' apwányam Dios, cham'a apkelwóneykencha'a axta apkeláneykha, appekkencháseykxek axta appeywa apkeltamho etakmelchesesek selyakye apagkok.

¹⁵ Cinco mil sawo selyakye axta apmeyásak xama xa énxet'ák nak, keñe axta pók apmésa dos mil sawo selyakye, keñe axta anhan pók apmésa mil sawo selyakye, cham'a apkepwagkexa enxoho apkelmeykha selyakye. Keñe axta apxega xa wese' nak.

¹⁶ Apyancháseykxeyk axta selyakye apagkok ma'a énxet apxawé axta cinco mil sawo selyakye, cinco mil axta anhan wokmok apyancháseykekxa selyakye.

¹⁷ Hawók axta anhan aptahakxa m'a apxawé axta dos mil sawo selyakye. Dos mil sawo selyakye axta anhan apyancháseykxak ma'a.

¹⁸ Keñe m'a apxawé axta mil sawo selyakye, kañe' máxek apmeta axta apposesakmok wese' selyakye apagkok.

¹⁹ “Nano' axta temék apweykto wese' apagkok xa énxet'ák nak, apkelánesakxeyk axta anhan weykcha'áhak xa apkeláneykha nak.

²⁰ Apwokmek axta apmonye m'a ektaha axta apxawé cinco mil sawo selyakye, apmések axta anhan wese' apagkok mók cinco mil sawo selyakye ektaha axta apyancháseykekxa. Aptahak axta apcháneya s'e: ‘Wese', cinco mil sawo selyakye axta exchep egkesók, keso mók cinco mil sawo selyakye sekyancháseykekxa ko'o s'e.’

²¹ Aptahak axta apcháneya wese' apagkok se'e: ‘Takmelakxoho, xép aptaha seláneykha ektakmela aptémakxa apteme nahan meyenseyam aptamheykha; axámaseshok sat kaxwo' selméso exchep selyakye yakwayam heltakmelchesesek, hakte aptakmelchesek axta m'a selyakye étkok sekmésa axta exchep. Etex kañe', kalpayhekxak sat egwáxok.’

²² Keñe axta anhan apwákxo m'a énxet apxawé axta dos mil sawo selyakye, aptahak axta apcháneya s'e: ‘Wese', dos mil sawo selyakye axta exchep egkesók, keso mók dos mil sawo selyakye sekyancháseykekxa ko'o s'e.’

²³ Aptahak axta apcháneya wese' apagkok se'e: ‘Takmelakxoho, xép aptaha seláneykha ektakmela aptémakxa, apteme nahan meyenseyam aptamheykha; axámaseshok sat kaxwo' selméso exchep selyakye yakwayam heltakmelchesesek, hakte aptakmelchesek axta m'a selyakye étkok sekmésa axta exchep. Etex kañe', kalpayhekxak sat egwáxok.’

²⁴ “Keñe axta apwákxo nahan ma'a énxet apxaka axta mil sawo selyakye, aptahak axta apcháneya wese' apagkok se'e: ‘Wese', ekya'ásegkok ko'o aptaha exchep wese' aplo, apnakxegweykmohol'a ekyexna megkatnahakxa nak apkeneykekxa, yanchásekxak nahan cha'a m'a aksok megkatnaha nak apkeneykekxa exchep.

²⁵ Ekeso eñamakxa seyeka axta ko'o exchep, ekxegkek axta sekpósakmo selyakye apagkok kañe' xóp. Keso selyakye apagkok se'e.’

²⁶ Aptahak axta apchátegmowágko wese' s'e: ‘Xép seláneykha ekmaso aptémakxa, metnaheykha, apya'ásegkok agkok xép seknakxama cha'a ko'o ekyexna m'a makneykekxexa nak cha'a aksok, tén han seyancháseykekxoho cha'a m'a aksok megkatnaha nak seneykekxa,

²⁷ tásek axta eykhe eswok selyakye ahagkok ma'a kélnegkenweykenxal'a selyakye, keñe axta ko'o axkekxak selyakye ahagkok sekwakto enxoho, yetlo sekxaweykekxoho néten ekyakmageykekxa selyakye ahagkok kélmeykha.’

²⁸ Aptahak axta wese' apkeláneya apheykha axta m'a: ‘Kólyementemekxa xa mil sawo selyakye nak, kólmeyásekxa m'a ekyetna nak diez mil sawo selyakye.

²⁹ Hakte kéxegke ekyetnakxa enxoho aksok, kólmeyásekxohok sat makham mók, kayeykhágwomhok sat nahan; keñe kéxegke meyke nak aksok, kóltápexcháseshok sat kólyementemekxak ma'a ekyetnakxa enxoho, antawók eykhe katnehek.

³⁰ Kóltekkes yókxexma xa seláneykha mékoho nak, cham'a ekyaktésakxa nak exma, cham'a yakwánxa sat elekxagwaha m'a, eltakxek sat nahan apma'ák eñama aplegeykegkoho ekmáske.’,

Yakwánxa sat kólyekpelkohok apyókxoho énxet

³¹ “Apkexyekmek sat agkok aptaha nak Apketche énxet yetlo apcheymákpoho, ewakhak sat apkelásenneykha étlantámhok, keñe sat exek néten aptaháno eyeymáxkoho.

³² Yaknekxak sat apyókxoho pók aptémakxa énxet aphakxa. Yexpánchesek sat énxet aptémol'a apkeláneykha nekkések yexpánchesek nekkések apkelpaxkamap yát'ay.

³³ Apkelya'asamakxa sat elya'aksek ma'a nekkések, keñe sat yát'ay elya'aksek ma'a nepsagkalwa.

³⁴ Sat etnehek yának Wese' énxet'ák apheykha ekpayhókxa apkelya'asamakxa s'e: ‘Kólchexyem kéxegke kéltaha nak ektakmela apkelxeyenma Táta; Kólma m'a aptémakxa nak Wese' apwányam Dios, kéllánesamakxa axta kéxegke amonye apkelané Dios keso náxop.

³⁵ Hakte meyk axta eyakheyk ko'o, elmésegkek axta kéxegke sekto; hem axta eyakheyk, eleykegkek axta kéxegke yegmen; makhawók axta eñameyk ko'o, elmésegkek axta kéxegke yakwánxa atyenek.

³⁶ Meyke apáwa axta etnék, elmésegkek axta kéxegke selnakta; ekháxamáxchék axta ko'o, eltemegkek axta kéxegke meyk'a; elhéseykmek axta sẽlpextétamakxa, elteyánegweykmók axta kéxegke.’

³⁷ Keñe sat etnehek elmaxneyha énxet'ák apkelpéwomo s'e: ‘Wese', ¿yaksak axta ekhem negwetaya exchep eyakhama meyk, tén han negmésama apto? ¿Yaksak axta ekhem negwetaya exchep eyakhama ekhem, tén han negmésama yegmen yakwayam ének?

³⁸ ¿Yaksak axta ekhem negwetaya, apwaya exchep apkenyémeya makhawo', tén han negmésama yakwánxa etyenek? ¿Yaksak axta ekhem negwetaya exchep aptéma meyke apáwa, keñe negmésama negko'o apáwa yakwayam elántaxnekxak?

³⁹ ¿Yaksak axta ekhem negwetaya apháxamákpo exchep? ¿Yaksak axta anhan ekhem negwetaya kélhéseykmo exchep sẽlpextétamakxa, keñe nenteyánegweykmoho negko'o?’

⁴⁰ Keñe sat etnehek yátegmowagkok Wese' apwányam se'e: ‘Eltennásek ko'o kéxegke elyáxeg ahancha'awók meleymákpoho kéltemésesama xa ektaha nak, ko'o nahan eltemesesók xa ektaha nak.’

⁴¹ “Keñe sat etnehek yának Wese' apwányam ma'a apheykha nak ekpayhókxa nepsagkalwa: ‘Kólmohok kéxegke mók nekha cháxa eyéméxko nak kóllegásesagkohok; kólmohok ma'a megkaspóneykxa nak táxa kéllánesamakxa axta kelyekhama' tén han ma'a elásenneykha.

⁴² Hakte meyk axta eyakheyk ko'o, axta eyke helmesók kéxegke sekto; hem axta eyakheyk, axta eyke heleykegkok kéxegke yegmen,

⁴³ makhawók axta eñameyk ko'o, axta eyke helmesók yakwánxa atyenek. Meyke apáwa axta etnék, axta eyke helmesók kéxegke selnakta; ekháxamáxchék axta ko'o, elhéseykmek axta anhan sẽlpextétamakxa, axta eyke heltemék meyk'a kéxegke.’

⁴⁴ Keñe sat etnehek elátegmowagkok énxet'ák se'e: ‘Wese', ¿Yaksak axta ekhem negwetaya exchep eyakhama meyk tén han eyakhama ekhem, tén han negwetaya apkeñémeya makhawo', tén han negwetaya aptéma meyke apáwa, tén han negwetaya apháxamákpo, tén han kélhéseykmo sẽlpextétamakxa, keñe negko'o mampasmoma?’

⁴⁵ Keñe sat etnehek yátegmowagkok Wese' apwányam se'e: ‘Eltennásek ko'o kéxegke kéltemésesama nak cha'a énxet'ák ahagkok meleymákpoho xa ektaha nak, eltemésesegkek nahan ko'o xa mehelpasmoma xa ektaha nak.’

⁴⁶ Cháxa peya nak elmahagkok megkatnegweykenxa nak néxa sẽllegasáseykegkoho xa, keñe m'a énxet apkelpéwomo nak peya elmahagkok ma'a megkatnegweykenxa nak néxa ekyennakte egnenyek.”