HEBREOS 6 - Lengua Sur (Enxet) Nuevo Testamento

¹ Anlenxanmohok hana negko'o ekwokmoho nentaha negwányam, agyenyók sekxo' ma'a émha amonye nelxekmowásamáxche ekxeyenma nak Cristo. Kéméxchek cha'a manlenxanmók negko'o nenxeyenma m'a nelxekmowásamáxche ekmanyehe nak agya'asagkohok, cham'a nenxeyenma nak negyakmagkaso egwáxok, tén han ma'a negyamasma nak nentamheykha segya'asamo nak nétsapmakxa, tén han ma'a mólwateseyam nak nenxeyenma magya'áseyam eñama nak Dios,

² tén han manlenxanmók nenxeyenma m'a nelxekmowásamáxche ekxénamaxche nak ektémakxa yakpasameygmen, tén han manlenxanmók nenxeyenma m'a kélnegkenma nak kélmék apkátek énxet aptaha nak melya'áseyam Dios, tén han manlenxanmók nenxeyenma m'a apnakxátekhágwayam nak apkeletsapma axta, tén han manlenxanmók nenxeyenma m'a yakwánxa nak hẽlyekpelkohok megkatnegwayam enéxa.

³ Cháxa eyéméxko nak ólwataksek sekxo' nenxeyenma xa, cham'a apkeltamho enxoho Dios.

⁴ Hakte apkelwátesagkek agkok apteme melya'áseyam ma'a énxet'ák ektaha axta apkelxawéyak elseyexma, cham'a énxet'ák apkelya'áseykegkoho axta ektémakxa m'a negmowána segmésamol'a cha'a Dios, cham'a énxet'ák apkelxaweykegko axta anhan Espíritu Santo,

⁵ cham'a énxet'ák apkelya'áseykegkoho nak han ektémakxa m'a amya'a ektakmela eñama nak Dios, cham'a apkelya'áseykegkoho nak han yakwánxa katnehek apmopwána Dios ma'a egmonye sat,

⁶ apkelwátesagkek agkok apteme melya'áseyam xa énxet'ák nak, megkólwanchek sat kóltemesásekxak makham apteme melya'áseyam Dios, hakte máxa katnehek apyepetcháseykxo enxoho makham aksok ektegyéso Dios Apketche, máxa apkenagko yesmaksek apyókxoho énxet sat etnesásekxak makham.

⁷ Enxet'ák apkelxawéyak nak aksok eltakmela eleñama Dios apteme apkelyetchesamakpoho m'a xóp ekyamol'a mámeye ekpálweykta, cham'a ekmésamol'a ektakmela apnakxo aksok ekyexna m'a énxet'ák ektaha nak apkeltamheykha.

⁸ tekkesesek agkok énxet ma'a aksok ekha nak am'ák tén han ma'a pegke, mékoho agko' katnehek xa xóp nak; sagkok nahan katnehek apxeyenma Dios, kawomhok nahan kélwatneykekxa.

Nelhaxneykha segyennaktéseso nenteme magya'áseyam

⁹ Elyáxeg selásekhayo, nentahak eykhe negko'o neltennáseykha kéxegke xa ektaha nak, nakso' eyke nentemesásak negko'o ekyetna kéxegke aksok eltakmela agko' segya'asamol'a nelwagkásamáxchexa teyp.

¹⁰ Hakte Dios apteme ekpéwomo aptémakxa, megkalwagkámhek sat ma'a ektahakxa axta aksok kéllané kéxegke, megkalwagkámhek sat nahan ma'a ektahakxa axta kélxekmósamo kéxegke kélásekhayo Dios, cham'a kélpasma axta énxet'ák ektaha nak Dios énxet'ák apagkok, ekhawo kéltáhakxa nak makham keso kaxwo' nak.

¹¹ Egmenyék negko'o kóllenxanmohok kéxegke kélxekmósamo ekwokmoho ektemegwánxa néxa m'a ektémakxa nak kélwaskápeykekxoho, yakwayam enxoho kólxawagkok ma'a aksok kélhaxanma nak kólxawa'.

¹² Móltamhok negko'o kóltehek kéxegke megkólmámenyého kóltemeykha, wánxa agkok kólyetlakxa apkeltémakxa m'a énxet'ák apkelxaweykegko nak ma'a aksok kélpagkancheso axta, cham'a apxeyenma axta elmésagkok Dios, eñama m'a apteme nak melya'áseyam Dios, tén han eñama m'a ektémakxa nak apkelenxáneykmoho.

¹³ Xama axta apmésa appeywa Dios Abraham, apteméseso apagko' axta nahan ekmámnaksoho Dios ma'a aptahakxa axta appeywa, hakte méko pók aphawo Dios yakwayam enxoho etnésesek ekmámnaksoho m'a aptahakxa enxoho appeywa Dios;

¹⁴ Aptahak axta appeywa Dios se'e: “Axamáseshok sat selméso exchep aksok eltakmela, axámasásekxak sat nahan aptawan'ák neptámen.”

¹⁵ Apkelháxanmeyk axta aksa Abraham yetlo mepekhéso xa apxeyenma axta egkések Dios, apxakak axta nahan xa.

¹⁶ Aptemésesek agkok cha'a ekmámnaksoho aptahakxa appeywa énxet, yának cha'a étagkohok ma'a énxet'ák ekyawe nak kéláyo. Aptemésesek agkok nahan ekmámnaksoho agko' ma'a aptahakxa enxoho appeywa yakwayam elának aksok, eñama apweteykegkoho m'a énxet ekyawe nak kéláyo, kamaskok elenmexáxko apkelpeywa.

¹⁷ Apmenyék axta exekmóshok ektakmela agko' Dios apmáheyo elának ma'a appekkencháseykekxa axta appeywa énxet'ák, cham'a énxet'ák peya axta elxawagkok ma'a aksok kélpagkancheso apxeyenma axta elmésagkok Dios, meyke apyakmagkaseyam aptahakxa appeywa xama enxoho. Ekeso eñamakxa aptemésesa axta Dios ekmámnaksoho m'a aptahakxa axta appekkeneykekxa appeywa, apteméseso apagko' axta nahan ekmámnaksoho xa.

¹⁸ Nelxawágkek negko'o nelwaskápeykekxoho, negko'o nentaha axta negketamso yakwayam hegmeyók Dios, nentaha nak han magya'áseyam ma'a nelhaxneykha segméso axta Dios, eñama xa ánet aksok megkamowána nak kayakmagkasók ektémakxa, cham'a mehẽlyexancháseykegkohol'a Dios exének.

¹⁹ Cháxa nelhaxneykha sempasmoma nak neyseksók negha xa, ekhawo ektémakxal'a sawo ekhaxé ekmeyák la'a yántakpayhe. Cháxa nelhaxneykha ektaxnegwokmo axta ekweykmoho teyp apáwa kélapma kañe' tegma appagkanamap ma'a néten,

²⁰ cham'a aptaxnegwánxa axta anhan Jesús yakwayam enxoho agkegwának ólántaxnegwók negko'o xa m'a; aptemegwákxeyk axta apkemha apmonye appasmo apkelmaxnéseso Dios énxet'ák apagkok ma'a, megkatnegwayam enéxa, ekhawo ektémakxa axta aptamheykha Melquisedec.