FILIPENSES 1 - Lengua Sur (Enxet) Nuevo Testamento

Ekxeyenma egwáxok

¹ Negko'o nenteme Jesucristo apkeláneykha, ko'o Pablo, tén han Timoteo. Enxet'ák apheykha tegma apwányam Filipos negko'o nentáxesásak se'e weykcha'áhak nak, cham'a apkelánamákpoho nak Dios énxet'ák apagkok, cham'a aptéma nak han apkelyepetcheyo Cristo Jesús, yetlo m'a apkelámha apmonye nak kélakneykekxexa, tén han ma'a appasmeykha nak kéltamheykha kélakneykekxexa.

² Dios Egyap tén han Jesucristo Wese' egegkok sat etnehek apméso naksa kéxegke m'a ektémakxa nak segemleykekxoho, tén han meyke ektahakxa kélwáxok.

Pablo apkelmaxnéseso énxet'ák apteme nak melya'áseyam

³ Ekmések cha'a ko'o ekxeyenma ewáxok Dios ahagkok, cham'a ekxeyenwákxoho enxoho cha'a ewáxok kéxegke.

⁴ Elmaxnakkek agkok cha'a, almaxnéseshok cha'a kélxámokxoho kéxegke yetlo ekpayheykekxa ewáxok;

⁵ hakte nelpasmomáxkók axta nenláneya nentamheykha eñama nak tásek amya'a, eyénamo m'a sekxo' axta, ekwokmoho keso negwánxa nak.

⁶ Nakso' ektemesásak ko'o peya esawhohok aptamheykha Dios, cham'a apchénawo axta apkelana aptamheykha ektakmela kélnepyeseksa kéxegke, ekwokmoho m'a ekhem apkexyekmo sat makham Jesucristo.

⁷ Payhawók agko' ko'o katnehek ekxeyenma ewáxok kélyókxoho kéxegke xa ektaha nak, hakte awanhok agko' ko'o selásekhayo kéxegke, hakte wákxók nahan kéxegkáxa kélxawé naksa m'a ektémakxa nak segemleykekxoho Dios, cham'a segkésa axta aksa ko'o, megkeyxek ma'a sekha enxoho sẽlpextétamakxa, esenhan selyentama enxoho nápakta'awo' ma'a kelwese'e ekha nak kélyaheykekxoho, yakwayam amyók tén han axének ektaha nakso' ma'a amya'a nelmeyamáxche nak.

⁸ Hakte apya'ásegkok Dios ekwánxa nak ko'o sekmámenyého alwetekxak kélyókxoho kéxegke, eñama aptekkeso ewáxok seyásekhayo m'a Jesucristo.

⁹ Ektemék cha'a ko'o nempeywa nelmaxnagko seltamho kayágwomhok kélásekhamaxkoho kéxegke, tén han keytek ekyawe agko' kélya'ásegwayam tén han kélyekpelchágwayam ekxámokxoho aksok,

¹⁰ yakwayam enxoho kólewának kólyésha kéxegke m'a aksok ektakmela nak. Keñe sat kólewának kóltehek eyáxñeyo kéltémakxa, méko sat xama kélxéncháseykekxoho kéltémakxa, cham'a apkexyekmo sat Cristo.

¹¹ Kalánhok sat kélwáxok kéxegke kéltémakxa ektakmela eñama apméso m'a Jesucristo, yakwayam enxoho kóltehek kéláyo Dios, tén han kóltemésesek apcheymákpoho.

Mowanchek ko'o axek meyke Cristo

¹² Elyáxeg, emenyék kólya'ásegwomhok kéxegke m'a setnahakxa axta ko'o, etnék axta ko'o xa yakwayam enxoho kapasmok ma'a ektémakxa nak kéltenneykha tásek amya'a.

¹³ Apyókxoho énxet'ák apheykha nak wese' apwányam apxagkok apkelya'ásegkok sekha ko'o sẽlpextétamakxa, eñama sekyetlo Cristo, apkelya'ásegkok nahan ma'a apyókxoho énxet'ák nak.

¹⁴ Apxámokxoho ẽlyáxeg nentémo xamo' magya'áseyam nahan apmayhágkohok eltennaha amya'a eñama nak Dios meyke apkeye, yetlo ekyágweykmoho agko' apteme melya'áseyam Wese' egegkok, ko'o axta ñokxa set'a selhésakmo sẽlpextétamakxa.

¹⁵ Nakso' nahan apkeltenneyncha'a nápakha énxet'ák amya'a eñama nak Cristo, eñama m'a apnathé nak pók, tén han eñama m'a apkelenmexamap nak, wánxa agkok, nápakha énxet akke apkeltennáha yetlo ektakmela elchetamso apwáxok.

¹⁶ Nápakha énxet'ák nahan apkeltennáha amya'a eñama nak Cristo eñama apchásekhayo, hakte apya'ásegkok ektaha Dios sexnéso ko'o s'e, yakwayam enxoho axének ektaha ekmámnaksoho agko' ma'a amya'a eñama nak Dios;

¹⁷ wánxa agkok, nápakha énxet nahan apkeltennáha apwesey Cristo yakwayam katnehek ekpasmo m'a apkelmopmenyého apancha'awo nak, háwe eyke ekmámnaksoho m'a ektémakxa nak elchetamso apwáxok, wánxa agkok, apmenyék eyke heyánchesesagkohok ekyentaxnamo ewáxok xa énxet'ák nak, keso sekha nak kaxwo' ko'o sẽlpextétamakxa.

¹⁸ Megkeyxek eyke ko'o hegkések ekpayheykekxa ewáxok apkeltenneyncha'a enxoho apwesey Cristo, appósamo ektémakxa elchetamso apwáxok eykhe katnehek, esenhan ma'a mekpósamo nak. Ayánchesagkohok sat eyke ko'o ekpayheykekxa ewáxok eñama nak ma'a Dios,

¹⁹ hakte ekya'ásegkok ko'o peya hewagkasek teyp ekyókxoho xa setnamakxa nak ko'o, eñama m'a selmaxnéseso nak cha'a kéxegke, tén han eñama sepasmo m'a Espíritu apkeñama nak Jesucristo.

²⁰ Awanhek ko'o sekmámenyého megyohok Dios amok sekmegkakto wánxa agkok, ewanchek sat eyke ko'o altennaha apwesey yetlo meyke ektamheykha ewáxok nápakta'awo' ma'a apxámokxoho énxet'ák nak. Ko'o sat makham kañék ekwetamaxche cha'a m'a ektémakxa nak ekyawe apmopwána Cristo, ekhawo m'a sektémakxa axta cha'a, megkeyxek ma'a sétsapa enxoho, esenhan ma'a magwatsapa enxoho.

²¹ Cristo ko'o yakwayam altemésesek apcheymákpoho s'e sekha nak makham, keñe sat katyapok aksok eltakmela m'a sétsapa enxoho.

²² Ewanchek alenxanmohok ko'o sektamheykha yakwayam apasmok nentamheykha eñama nak Wese' egegkok, keso sekyenná nak makham, may'ásegkok ko'o selyéságkaxa xa ánet nak.

²³ Eyapagkánexchek ko'o alyésha xa ánet nak. Mók ekxeyenma ewáxok nahan, emenyék watsapok yakwayam axhok xamo' Cristo, hakte xénchek ko'o ewáxok ektakmela agko' hetnehek ko'o xa ektaha nak.

²⁴ Wánxa agkok, mók ekxénakxa ewáxok akke nahan entahak, kéxegke keñamak eyéméxko kawegkohok sekha ko'o kélnepyeseksa kéxegke.

²⁵ Ekya'ásegkok ko'o peya axek makham kélnepyeseksa kéxegke yakwayam apasmok alenxánegkeshok kéltamheykha, yakwayam enxoho nahan kayágwomhok ekpayheykekxa kélwáxok eñama megkólya'áseyam, hakte ekya'ásegkok ko'o ekpayhawo atnehek xa ektaha nak,

²⁶ yakwayam enxoho kayágwomhok ekpayheykekxa kélwáxok neyseksa kélyepetcheyo Cristo Jesús, eñama sekha makham ko'o kélnepyeseksa kéxegke.

²⁷ Kóllenxánem aksa kóltehek kéltémakxa m'a ektémakxa nak ekpeywa tásek amya'a eñama nak Cristo. Emenyék ko'o axkágwatak amya'a ektémakxa kéllenxáneykmoho kéxegke kélwaskapma tén han meyke kélexpanchásamáxche. Emenyék nahan axkágwatak amya'a ektémakxa kélpasmomáxkoho kéxegke kéllenxáneykmoho kélyancháseykekxa m'a ektémakxa nak magya'áseyam eñama nak tásek amya'a, megkeyxek ma'a sekteyánegwákxoho enxoho kéxegke esenhan ma'a matyánegwákxoho enxoho.

²⁸ Nágkólho aksa elyegwakkasek kéxegke m'a kélenmexma nak. Kéltemék agkok xa, elyekpelchágwók sat ektakmela agko' peya elmahagkok kélmaséseykenxa xa énxet'ák nak, keñe kéxegke peya kólwagkasaxchek teyp. Dios keñamak xa.

²⁹ Cristo keñamak kélxawáya kéxegke yakwayam kóltehek megkólya'áseyam, tén han kóllegagkohok xamo' ma'a Cristo.

³⁰ Hawók ektémakxa kélwaskápeykekxoho kéxegke ektémakxa nak ko'o sekwaskápeykekxoho. Kélwet'awók axta kéxegke ektahakxa axta ko'o sekwaskápeykekxoho nano' axta. Kaxwo' eyke, kéllegagweykxeyk kéxegke amya'a ektémakxa selenxáneykmoho sekwaskápeykekxoho ko'o.