1 CORINTIOS 16 - Lengua Sur (Enxet) Nuevo Testamento

Aksok kélanchesáseykekxa ẽlyáxeg'a

¹ Emenyék ko'o altennásekxohok kéxegke m'a aksok peya axta kólánchesásekxak ẽlyáxeg'a apteme nak Dios énxet'ák apagkok apkelpagkanamap. Tásek kóltehek ma'a sektahakxa axta seláneya ko'o énxet'ák apchakneykekxexa nak ma'a yókxexma Galacia.

² Ekyókxoho domingo cha'a kéméxchek kéxegke kólyetnakhaksek aksok kélyókxoho nak, akke entemék ma'a ekwánxa enxoho kélweté selyakye. Kóltakmelches nahan yakwayam enxoho megkólanchásekxék ma'a sekwákxo enxoho ko'o.

³ Ekwakteyk sat agkok xa, aláphaksek sat tegma apwányam Jerusalén ma'a énxet'ák ektaha axta kélyéseykha kéxegke, agkéshok sat nahan weykcha'áhak yakwayam esókasek ẽlyáxeg'a apheykha m'a tegma apwányam Jerusalén, yetlo m'a aksok kélancháseykekxa axta kéxegke.

⁴ Payhawók agkok axog ko'o xa, selxegexma'a sat atnehek xa énxet'ák nak.

Pablo apkeláneykekxa aptahakxa yakwayam exog

⁵ Ekxegkek sat agkok ko'o, sat apewhok ma'a yókxexma Macedonia, ekyeyk'ak sat agkok Macedonia, keñe sat awatak xa Corinto.

⁶ Yakwatakxoho sat kexaha axek kélnepyeseksa kéxegke, kammohok esenhan sekha m'a néxa apkepsamágexal'a; keñe sat helpasmok kéxegke neyseksa sekxega, cham'a yakwánxa enxoho amhagkok.

⁷ Momenyék alwetekxak kéxegke yakwatakxoho, wánxa agkok, emenyék eyke ko'o yáma kawegkohok sekha kélnepyeseksa kéxegke, cham'a apkeltamho enxoho Wese' egegkok;

⁸ tegma apwányam Efeso sat eyke axnakxak ekweykmoho m'a ekhem mólwagkayam Pentecostés la'a,

⁹ hakte peyk ko'o alyentamaxkohok alának sektamheykha eñama nak Wese' egegkok, yakwayam enxoho katakmelhok ekteyapma sektamheykha, ñekhe apxáma m'a énxet senmexeykha nak ko'o.

¹⁰ Apwa'ak sat agkok Timoteo, kólpeykesásekxa sat apwáxok neyseksa apha kélnepyeseksa kéxegke, hakte apkeláneyak nahan ma'a nentamheykha eñama nak Wese' egegkok ekhawo ektémakxa nak ko'o sektamheykha.

¹¹ Nágkólwanyoho aksa kélxama kéxegke; wánxa agkok, kólpásem aksa yakwayam enxoho elenxanmohok apxega yetlo meyke ektahakxa apwáxok, yakwayam enxoho nahan hetyánegwatámhok ko'o, hakte elhaxneyk ko'o ewatak se'e, yetlo selxegexma'a m'a nápakha ẽlyáxeg'a nak.

¹² Emenyék ko'o axének egyáxeg Apolos, awanhek axta eykhe ko'o seltémo etnehek meyk'a kéxegke yetlo nahan apkelxegexma'a m'a ẽlyáxeg'a nentémo xamo' nak magya'áseyam, akke emokók makham exog kaxwo' nak, exog sat eyke m'a ektepa enxoho yakwayam exog.

Pablo ekxeyenma apwáxok

¹³ Kólleyxmakha cha'a, kólyennaktes kélteme megkólya'áseyam; nágkólé, kólwaskápekxoho.

¹⁴ Ekyókxoho aksok kéllanakxa enxoho, kóllána yetlo kélásekhayo.

¹⁵ Elyáxeg, kélya'ásegkok kéxegke Estéfanas tén han ma'a ekheykha nak apxagkok ektaha axta amonye'e megkalya'áseyam Cristo yókxexma Acaya, pasmeyk nahan cha'a m'a ẽlyáxeg'a aptamheyak nak melya'áseyam Cristo.

¹⁶ Emenyék ko'o kólyahakxohok kéxegke aptahakxa enxoho apkeláneya énxet'ák ekhawo nak apkeltamheykha xa énxet'ák nak, kólyahakxoho nahan cha'a m'a énxet'ák ektaha nak appasmeykha apnámokkok aptamheykha, apkeláneykegkek nahan se'e ektémakxa nak negko'o nentamheykha.

^17-18 Payhekxeyk nahan ko'o ewáxok apkelwa'a Estéfanas, Fortunato, tén han Acaico, egkések axta ekpayheykekxa ewáxok, ekhawo aptemésesamakxa axta kéxegkáxa, cham'a megkólheyncha'a axta kéxegke. Kaxénmakha cha'a kélwáxok énxet apteme nak xa ektaha nak.

¹⁹ Apcháphásesek nahan ekxeyenma apwáxók kéxegke énxet'ák apchakneykekxexa nak yókxexma Asia. Apcháphásesek nahan ekxeyenma apwáxók kéxegke yetlo apxeyenma Wese' egegkok apwesey Aquila, tén han Prisca, tén han ma'a énxet'ák apchakneykekxohol'a apxagkok.

²⁰ Kólma kéxegke m'a apkeláphaso nak ekxeyenma apwáxók apyókxoho ẽlyáxeg'a. Kólpeykes kéxegkáxa kélnámokkok yetlo ekpayheykekxa kélwáxok.

²¹ Ko'o Pablo, ektáxésesek kéxegke s'e ekxeyenma ewáxok nak. Ko'o ahagko' nahan sektáxéseso kéxegke.

²² Agkok agásekha'awok enxama Wese' egegkok Jesucristo, payhawók henlegásesagkohok Wese' egegkok. ¡Exyem Wese' egegkok!

²³ Jesucristo Wese' egegkok sat etnehek apméso naksa kéxegke m'a ektémakxa nak segemleykekxoho.

²⁴ Eyáphásesek ko'o seyásekhayo kélyókxoho kéxegke eñama nak Cristo Jesús.