TITUS 1 - PERJANJIAN BARU NALCA YUBA

Men Gibuk Yuba

¹ Najabo Titus o! Nara Paulus bedya, Imik Neyung adya wa wenya uboka, onoʾ Yesus Kristus adya yuba lenaʾ gaknya uboka, ban ara anak momnya doboka beibgen. Imik Neyung adya alja weboka dolosil nim enyek, sikja Imik Neyung ak dib senelemakaʾ ara, migib dosululaʾ aboka, nak Imik Neyung adya men weboka doboka bokol yeilinyok. Nunja dolomabaʾ ak sam neklesil yub enyek, sikba ella dangoka pe ulunokaʾ aboka, neksulul senewoka donyok.

² Ban nunja dolomab yuba damok enyek sunuwoka, dib embengaʾ ulmoubnaʾ ara or dobnemab senewoka ella ulumab. Imik Neyung ara hyak sondaʾ lenggululanya bek adya, men youmaʾ enyek moruwoka, embeng unaʾ damoka nuk eleganesin, wenyasuk.

³ Dara wera, perob sum en unuwanamna senemok sum enyek, yuba lelelulaʾ aboka orugomokaʾ adya, laga dangiyimok. Anadya wera, alja yub era, nak an anja lelelom aboka lobongganyok. Dara, nara nunja Imik Neyung bleblesilnya bedya orugonyok yub ek, sunuwoka lero yabalamna.

⁴ Titus o, anab nab dara, neik Kristus ek dib senenumaʾ anasa, wera anda nadya me yokaʾ nong ululam. Nadya dara, anak nunja bleblesilnya Yesus Kristus adya hnon, nunjaʾ neyung Imik Neyung bedya hnon, wanaʾ uboka eleksinaʾ ab, ganya angawoka unaʾ ab, elegogulul e.

Titus Bera Kreta Sokok Welemok Yuba

⁵ Nadya anak Kreta sokok sam lo yeilinggesaʾ ara, webnamen ulumla wa nenyek meewoka welelomaʾ aboka sene lo yeilinggesa. Hnonda, heik elaʾ gigiro Imik Neyung e dam nang sikillililomaʾ aboka lo yeilinggesa. Dara onoʾ ban nadya anaso unuwanalam aboka nekgenaʾ banara pe beklom.

⁶ Nimi yuba dolomakaʾ gaka bo usinnya bera, si gegena ponaʾ oroknya bek ululul. Alda gela hnonok domlyekanya, alja mab era Kristus ak dib senewoka, onoʾ nauba blekoka, salyaʾ yiri-yoro al giriknaʾ orok mabo yaknya bek ululul.

⁷ Yuba don nimi bo usinnya bera, Imik Neyung bedya wa nek welemlaʾ anasa, alda si gegena ponaʾ ara hyak mem. Alda dengdang ganya boboka yu ganya bonaʾ loboka, yu meka deregoka ganya uu anaʾ oroknya bek, oldanaʾ hwam ganya unggululanya bek, rupiah nauba dorowonun senenggululanya bek ululul.

⁸ Dara onoʾ, alja ek sam nimi yalamak dara, perobaʾ leboka doro diyiwoka, alda perob unaʾ anyek perob senelelanya benyek, ganya siklewoka diri ubdangoka, pelelanya benyek, geisa ganya boboka, yamal longgululanya bek ululul.

⁹ Alda nimi yok nim ek wenelesil dara, dib nong yub enyek sunuwoka ganya heksululaʾ aboka hnon, nimi dib yub ak lolomak nim ek, nera meilinya nera an aboka, pe leboka aawosululaʾ aboka hnon, alda alja dib senewoka domok yub ek, nekemek sok, pe salabmoubuka ululul.

¹⁰ Yuba blekoka eʾ dem yuba leboka, nimi gliboka yokaʾ amba bo balasak nim era nauba ulumak. Okoka dara, Yahudi yuba domek nimi nong enyek, anaso nauba ulumak.

¹¹ Ban wenyhen nim era, neknenggunuseng yub edya, nimi nauba nim e gebman malya nenelesakaʾ anasa, sikja sibamaʾ hyak lebnok. Sikda ban unulumaknya nera, anadya deknaʾ salyaʾ malya uboka dobnobaʾ aboka ulumak.

¹² Sik moumen al Kreta sokok ab ununumnaʾ lelemoknya bedya seleb lebokaʾ ara, ”Kreta nim era, yu hwam ok bei gam anaso uboka, gwanenga orok nenewoka deregoka onoʾ sulmalyaʾ ulumaakanya, sobaʾ sondaʾ hwam ok lelemak nim ulumak,” hyok.

¹³ Ban ununumnaʾ lelemoknya benedya lemoknya nera hyak aldib nong. Anasa, sikda dib yuba dolomakaʾ nong anyek, pe salalmoublenokaʾ aboka, anda hyak pe oma leboka wenelesilom.

¹⁴ Anya hnonda Yahudi nim edyaʾ youmaʾ neknaʾ gom, dib nong yub ek lek aboka ulumak nim edya yub ek an dib salabmoubijek anasa, anja pe neklesilom.

¹⁵ Nimi ganya geisa ulumak nim ek dara, yokaʾ-yokaʾ nidyaʾ ara geisa deng ok ulumla. Bok nimi yuba okoka ganya goluwoka donaʾ loboka, ganya sembejaʾ adya ok goluwoka ulumak nim era, sikja sobaʾ seininaʾ ab, sikja mek ganya seininaʾ ak ara, seleb sembejaʾ ok dokaʾ anasa, geisa unaʾ ara mekaʾ me anaba unggulusil!

¹⁶ Sikda sondaʾ anasa nunda Imik Neyung ak ella ulumab alamak bok, sikja unulumakaʾ adya, ella ulumab anaʾ ak sonda nenelemak. Sikda omoma dablesil nim ulumak. Sikda yub ak ganya dib oloknaʾ ara lek senelemak nim ulumak. Sikda perobnya nemba dara, pe ununaʾ ara unuwanggunuseng nim ek anara ulumak.