MARKUS 6 - PERJANJIAN BARU NALCA YUBA

Yesus Ak Lek Hyek Yuba

¹ Anyek anyeb dara, Yesus ab alja yuba doro diriga ban nang eb dara, balamekaʾ ara, al beiyiboka nemok heikek byik.

² Wera Sabat mem sum era, Yesus ara Yahudi nim edya yuba don ek wekoka yuba lel eleklesuk. Dara, nimi nauba longol yeilimek dara, Imik Neyung yuba lel eleklesukaʾ anyek keboka, sik moumen, ”Ban nidyaʾ ara, hanyagarab dobok do? Hek geremseng ek alak elegok do? Dara, alda lok so migib ununaʾ ara, hekaʾ huru unulamla do?

³ Ban benera alda Maria gedya me e sonaʾanya gom de? Alja weisab era, Yakobus beb, Yoses beb, Yudas beb, Simon benya arob nang unggulumak de? Yo anasa, al hmal gelewa eneba, anyagan neikaʾ unggulumab de?” Wenyaboka, sikda Yesus ak soloma daboka lek senemek.

⁴ Anasa Yesus adya sikenek lebsukaʾ ara, ”Nim ununumnaʾ lelenanya bera nidyaʾ yok heikek ara, gigilemak bok, alda alja heik yokaʾ ak ab hnon, alja nimi yilaʾ edya hnon, alja ek nim edya danyek hnonok, alak giginggulumak,” hyok.

⁵ Wera ban heik enyek anara, Yesus ara, yokaʾ senenggomaʾ lok soʾ migib ununaʾ ara hnon unuwanggubuk bok, alda neiknaʾ nimi wene nim ok, alja soruka sikenek salawoka hwebsuk.

⁶ Sikda dib senenaʾ orok anasa, Yesus ara angoo salyek mok nim senewok. Dara Yesus ara, mek-mek heik pik dongoro Imik Neyung yuba lero yabalamok.

Obadya Nang Boksuk Yuba

⁷ Wera Yesus adya alja yuba doro diriga ban nang obadya nang ek yoululum hyookanya, nimi penya-penya darawoka boksuk. Dara, bisaʾ yaknaʾ amba migibaʾ hnon sikenek elegosuk.

⁸ Wera obadya nang ek lebokaʾ ara, ”Ugunda gamaʾ dungunaʾ ak danyek hnonok, or bobnelum bok, yokaʾ-yokaʾ pika yabanaʾ amba, denaʾ ab, denaʾ lin akleng eb, rupiah gol bonaʾ lomok anaba bobnenggunulum, mem.

⁹ Yan ongonaʾ ak dara, or ongowoka binilum bok, ongon akleng ek dara, penya bonaʾ ara mem,” hyok.

¹⁰ Anya hnon lebokaʾ ara, ”Ugunda yok mok bumun dara, wera al hnonok ek ok ulumunaʾ ara, yokok binilum sum ok, ulumun ek ab lo yibinelum.

¹¹ Bok ugunda yok mok binilumaʾ anyek, bumun mok enyegan nim edya, ugunuk perobaʾ leboka dosinaʾ loboka, ugunja lebnelum yub eneba kebnenggunusak dara, heik enyek ara, lo yabamunukanya, sikda ella danokaʾ aboka, ugunja yan sembejaʾ habonggoka yibinilum!” wenhyok.

¹² Wera an wenyaboka boksuk dara, sikda biniboka malya unaʾ ak ab ganya dangawolulum aboka yuba lero yabalamek.

¹³ Dara, bisaʾ nauba yakoka, neiklenanya ngiknaʾ mek adya ngikoka, nim era merelilisik.

Yohanes Pembaptis Obek Yuba

¹⁴ Yesus adya unulamla an yub eb, alja si neb dara, mok soko me nidyaʾ oboka lelemokaʾ adya, Herodes beneba anaso unulamla an yuba kebok. Dara hnon nim edya anaba, ”Yohanes Pembaptis bera seleb embengaʾ suboka bukokaʾ adya, anadya alda hyak senenggomaʾ lok soʾ ara unura yabalamla,” alamek.

¹⁵ Bok yok hnon nang edya dara, ”Alda Elia benyaʾ,” alamek. Dara onoʾ hnon nang edya dara, ”Alda ununumnaʾ lenya, youmaʾ ununumnaʾ lelemek nang eneso ak ulumla,” alamek.

¹⁶ Wera danyek, Herodes bera Yesus ara anaso unulamla an yuba kebok dara, ”Wera aldib anara Yohanes Pembaptis, youmaʾ nadya ya nganga daklulum hesenya bek, wera seleb embengaʾ suboka bukoknya benyaʾ!” hyok.

^17-18 Men dara, Herodes bedya, aljaʾ hem Pilipus bedya gel Herodias genyek, domok. Anasa leboka, Yohanes bedya, Herodes bek, anja hem bedya gel gek doblum dara, mouna gweblum aboka lelemok. Dara, Herodes bedya Yohanes bek henga geregoka gasa ek beiblulum aboka orugomok.

¹⁹ Ban wenyan yub enesa, Herodias gedya dara, Yohanes bek obnamna senewoka yu ganya bomok bok, Herodes bedya unuwalyek senewoka bo ulumokaʾ adya, unu seinimoknya nera gigiwanggumok.

²⁰ Herodes bera Yohanes bek ara, senenggomnya benyaʾ senelemokaʾ ara, Yohanes bera dib nongnyakanya, Geisinya benyaʾ senewoka ella ulumokaʾ anasa, alda lok ganya boboka bo diri ulumok. Bok Yohanes bek kelemna dara, alja ganya bol nenelemokaʾ anaba, alda eiya ganya boboka alak kelemok.

²¹ Wera yok sum enyek Herodias gedya seinilimoknya nera gigiwok. Ban sum era, Herodes be beiyimek sum dangamokaʾ anasa, masa senenggomaʾ youmookanya, senenggom dub nang eb, yinaʾ bonaʾ dub nang eb, Galilea sokok dub nang eb, del yanalum aboka lebok.

²² Sum enera, masa deregoka bera seblemekaʾ ak ara, Herodias gedya gelma hnon wekoka seblemoknya nenesa, Herodes beb, alja yanalum amok nim eneba, hyak ganya heklesuk. Anasa, Herodes bedya gelma enyek an, ”Bera pe seblelamaʾ anasa, anyek elegonulul senemenaʾ ara eleganenggen,” hyok.

²³ Anasa, laga poboka lebokaʾ ara, ”Anjaʾ hekaʾ ak molowanalamaʾ ara, nidyaʾ gigiwoka eleganenggen. Nadya welemna mok soko darasam molowanasomaʾ anaba, anak darasam bokoka lebnenggisinya, anera hyak dib lebna,” hyok.

²⁴ Dara Herodias gedya gelma era, aljaʾ genong gek biniboka, ”Genong o, nara hekaʾ ak molowanamna do?” aboka heibuk. Danyek, alja genong gedya, ”Yohanes Pembaptis bedya huk enyek, henelam,” hyok.

²⁵ Wera gelma era Herodes bek yeiri yeiniboka, ”Nara Yohanes Pembaptis bedya huk enyek, wenebabya gwaneng yanganaʾ ak beiyiboka eleganenelem!” hyok.

²⁶ Dara, alda dubnya bedya ganya era, hyak angoo senewok. Bok, alja nimi hnoum ab hekaʾ ok nidyaʾ molowanalamaʾ ara, eleganenggenaʾ ok amokaʾ adya, alda nenegom henggubuk.

²⁷ Anasa Herodes bera yin bonaʾanya alak diri bo ulumoknya bek, Yohanes bedya huk enyek bo yalom aboka orugok dara, gasa ek biniboka ya nganga dakoka bo yok.

²⁸ Dara alda, Yohanes bedya huk era, gwaneng yangawoka beilinaʾ ak beiyiboka, bera seblemok gelma ek an elegok dara, onoʾ gelma enedya doboka aljaʾ genong gek elegok.

²⁹ Wera Yohanes bedya yuba doro diriga ban nang edya, Yohanes bera dib obak an yuba kebek dara, sikda biniboka, Yohanes bedya beʾ doboka, bo dilil byik.

Nimi Denga Yubaʾ Lambadya Gwaneng Elegosuk Yuba

³⁰ Dara Yesus alja yuba doro diriga ban nanga bokosukaʾ ara, onoʾ saaboka mamagel yek dara, nidyaʾ sikja yuba leboka, unulumeknya nera, Yesus ak unuwouwa aboka nekek.

³¹ Nimi mandebnaʾ nauba bini yeini ulumekaʾ adya, Yesus ab alja yuba doro diriga ban nang eb dara, denaʾ den salek era orok. Anasa, Yesus adya sikenek lebokaʾ ara, ”Numba yok uboka, pe dek-deka sobnemeibyaʾ ak gakdenaʾ ak sam don binimab,” hyok.

³² Dara, sikda lanawoka mek ekla bunaʾ buka balamekaʾ ara, nim orok ok gakdenaʾ ak sam byik.

³³ Wera sik byik salek era, nimi yok nim edyaʾ anaba sikda anyagan balamak senewoka ella ubsik bok adya, wera mok enyek an nimi gong era mek ge pik uboka, Yesus ab alja mab eb dara, anam balamek bok, sikenek men yeiri biniboka diri ulumek.

³⁴ Wera Yesus ara mek ekla bunaʾ ak ab yingginiboka kemelemok enyek, nimi nauba ara seleb longomekaʾ ak eibok. Sikda domba pam yakoka bo usinya orokaʾ anasoʾ ak ulumekaʾ eibok dara, alja ganya era sikenek angoo hyak yadyek senewok. Dara, Yesus ara sikenek yokaʾ-yokaʾ nauba neklesuk.

³⁵ Seleb sin dangoka inil yabok dara, Yesus adya yuba doro diriga ban nang edya Yesus ak yeiniboka, ”Mok enera gakdenaʾ uboka, seleb iniwal.

³⁶ Anasa sikda ok heik pik an, denaʾ eboka dekdowanokaʾ aboka sikinek bululum, helom,” hyek.

³⁷ Bok Yesus adya sikenek, ”Ugunja danyek, sikenek denaʾ eleganelum!” hyok. Bok alja yuba don nang edya alak, ”Wei, walaʾ sekbadya anaso dobneseng rupiah edya, ban nimi deng mandebnaʾ danyek, denaʾ denokaʾ aboka nidyaʾ sunuwoka dekoka elekna dak leblam de?” hyek.

³⁸ Dara Yesus adya sikenek, ”Ugunuk ara, roti gwanenga hekbadya anaso ulumla do? Kemel biso,” hyok. Wera sikda seleb keeboka eiyi yek dara, Yesus ak, ”Roti gwanenga lambadya uboka, hadyaʾ ara penya ulumla,” hyek.

³⁹ Dara Yesus adya nimi nidyaʾ holaʾ eilib pik bokoka bokoka yok-yok buru yibilulum hululum aboka, alja yuba don nang ak orugosuk.

⁴⁰ Wera nimi mandebnaʾ dara, yok-yok bokoka, neikaʾ ak ara, hnonda denga dombadya anaso, hnonda denga penya anaso uboka buru yibek.

⁴¹ Seleb dara, Yesus ara gwaneng ab penya hadyaʾ danyeb dob salawoka, imik keebweininggoka, Imik Neyung ak perob aboka gibuk. Seleb dara, gwaneng soboka alja yuba doro diriga ban nang ek, nimi nidyaʾ ak bokdo yibinelum aboka elegosuk. Dara onoʾ penya hadyaʾ danaba gwaneng elegeisik sok, anaso bokdo yibek.

⁴² Dara sikda nidyaʾ nang delemekaʾ ara, mona buksuk.

⁴³ Anya seleb deregoka bok lobeknya nera, Yesus adya yuba doro diriga ban nang edya, neikaʾ ak bolowoka mamageknya nera, hiboka akleng obadya mamagek.

⁴⁴ Dara anyagan jek nimi mandebnaʾ era, nengmab ok anyek, hiboka denga salyaʾ anyek lambadya nang (lima ribu orang) demek.

Mek Eilib Pik Yana Ingibgiga Yalamok Yuba

⁴⁵ Dara Yesus, alja yuba doro diriga ban nang ek, giliwoka bolong sok, ugunda men meka garawoka Betsaida heikek balalulum wenyaboka orugosuk. Onoʾ nimi nauba longol yeilimek nim ek, ugumba or balamnelum aboka lebok.

⁴⁶ Wera nimi nauba ak, or pe binilum aboka lebok dara, Yesus ara Imik Neyung ak heng uboka molowonunaʾ aboka mok soko meinik sam byuk.

⁴⁷ Wera mok soko en seleb iniwoka dukdukanek enyek, alja yuba doro diriga ban nang era, hyak mek hnoumung nong ok buka balamek bok, Yesus ara albeyok or anam mek gemek ulumok.

⁴⁸ Wera Yesus adya kemelemok enyek, alja yuba doro diriga ban nang era anam mek hnoumung buka balamek bok, kaboʾ doroklomok digum pik balamekaʾ adya yeiriwoka pukdibigimekaʾ ak eibuk. Dara, gweleknek yangman wining yub ololomla salek enyek, Yesus ara, mek dub pik yan ingibgiga sikenek yalamok. Dara, alda sikenek loboka, alak men mengeb hwibnamna anasoʾ anyek yanggok.

⁴⁹ Wera alja yuba doro diriga ban nang edya, Yesus ara mek dub pik yan ingibgiga yanggokaʾ ak eibik dara, sikda nimi ganya yamaʾ an gom senewoka ngouluklemek.

⁵⁰ Dara sikda nidyaʾ alak eiyiboka, lok anasa, nauba ngoulugoka serek-serek alamek. Bok Yesus ara sikinek, ”Na anasa, malye, ngouluknenggom. Lok ganya bonaʾ ara mem,” hyok.

⁵¹ Dara Yesus ara mek ekla bunaʾ ak welewoka bukok dara, kaboʾ anaba dengaro lobok. Dara, sikda anyek eiyiboka hyak loka dabsuk.

⁵² Sik hogung ak Yesus adya lambadya gwaneng enyek, senenggomaʾ lok soʾ, nauba nenemokaʾ anaba, sikda ganya suʾ keboka soro-wara ab menegoka, sikda ganya pe olowanggusuk.

Genesaret Sam Nimi Hwebok Yuba

⁵³ Wera Yesus ab, alja yuba doro diriga ban nang eb dara, balamekaʾ ara, Genesaret nimi sokok biniboka, anyagan weklomek.

⁵⁴ Weklomekaʾ ara, mek ekla bunaʾ ak ab goboka sokok yanggek dara, nimi yok nim era, Yesus nong ak okoka eiyiboka, men ella ubek.

⁵⁵ Dara mok soko enyek an nim era, neiklemek nimi mok soko me nidyaʾ yeiriwoka eboka, Yesus ak bo yanggek. Wera onoʾ kebna enyek, Yesus ara wera anyagan ul yabel hen dara, wene salek neiknaʾ nim era, esonaʾ adya yangawoka Yesus ak bo yalamek.

⁵⁶ Wera Yesus ulumnaʾ ak ara, or nauba heikek gom, mek heikek gom, nimi nauba sobaʾ neiklamna nanga beʾ gologoka, jaboka heik gasaʾ ak bo beillil yalamek. Anya, sikda Yesus adya akleng ek mekaʾ soruk dem adya bebeganobaʾ aboka dublemek. Dara, nimi Yesus adya akleng ek soruka bebegan nim era, nidyaʾ gobdo merelemek.