MARKUS 5 - PERJANJIAN BARU NALCA YUBA

Bisaʾ Ganya Yamaʾ Gologomoknya Hwebok Yuba

¹ Wera Yesus ab alja yuba doro diriga ban nang eb dara, Galilea mek gemek, Gerasa nimi mok sokok lanal byik.

² Dara Yesus ara, mek ekla bunaʾ ak abaʾ ara, goboka gek sam yanggok sab-sab, nimi be hnon, bisaʾ gologomoknya, nimi dilinaʾ ak sam abaʾ ara goboka alak yok.

³ Ban bera nimi dilinaʾ pik ok ura yabalamok. Gel heng adya goublumekaʾ anyek babya, hyak buluk-buluka doloklomok enyek, sounuwoka geregamenggom anasa, or lolomek.

⁴ Li sobaʾ gel heng adya yana soruka ouruwoka gereklamnaʾ anyek babya, buluk-buluka dorogoka, yan moumenaʾ darawoka goumnaʾ anyek, somlegoka lobdo diyiboka yabalamok. Anya alda hyak migib nong adya, nim adya alak namenaʾ gebnamenggom dangalamok.

⁵ Ban bisaʾ gologomoknya bera, yubyek inimnek pik moruwoka, nimi dilinaʾ pik uboka, mok soko mein pik anaba, ngebdongora yabalamnakanya, girik adya al dam nang seikoka oldalamok.

⁶ Dara alda mok abaʾ Yesus yanggokaʾ eibuk dara, bera bik-bikal yeiniboka, Yesus ak koma lumugoka gibuk.

⁷ Wera hyak nauba bii aboka, ”Hyak imik ululanya Imik Neyung bedya me Yesus o! Anab nab dara, hekaʾ hnon ulusil do? Imik Neyung si sibuka, nak ol yangganenaʾ ara lobnenelem, hen!” alamok.

⁸ Ban bisaʾ gologomoknya bera wenyal yabokaʾ ara, Yesus adya, ”Anda bisaʾ o, anda ban benyek anyeb, goboka yibilom!” men wenyal yabokaʾ anasa, an yub era lebok.

⁹ Dara Yesus adya, ”Anda si ara heknya do?” aboka heibuk. Wenyek benedya dara, ”Nunda gong ulumab bok anasa, nadya si nera Legion,” hyok.

¹⁰ Anya bisaʾ gologomoknya bedya, Yesus ak, bisaʾ gong dara, mok enyek anyebaʾ ara loboka, goboka yibilulum hisilyek senewoka saam-saama molowok.

¹¹ Wera ban mok enyek, mok soko en abom pik anara, pama nauba yuʾ dero yabalamek.

¹² Dara ban bisaʾ gong danedya, Yesus ak, ”Nuk ban pam danyek an gologol binilum aboka orugeisilom,” wenyaboka molowek.

¹³ Wera Yesus adya or unuwanalum hyok dara, bisaʾ gong dara, gologomeknya bek ab goboka, pam mandebnaʾ lom enyek an wekel byik. Pam gong dara, hiboka nidyaʾ ara dua ribu anaso pam, mok soko abomek ab langa diniwoka, meka youruwoka si deb menegoka somogek.

¹⁴ Pama weilemek nim era yeiriwoka, nauba heikek abaʾ ara, mek heik pik, pam ara anaso unuwal aboka nekdo yibik. Dara nimi nidyaʾ ara, hekaʾ huwalaʾ ak lebak do senewoka, eibnobaʾ aboka kemel bilimek.

¹⁵ Dara sikda, Yesus ak yeiniboka kemelemek enyek, bisaʾ gologomoknya bera, anyagan bulumokaʾ ak eibek. Bera alda hyak ganya kaboka, boksom ongowoka perobaʾ nong anyek bulumokaʾ ak eibik dara, sikda loka dabsuk.

¹⁶ Nimi sikja okoka eibek nim era, bisaʾ gologomokaʾ anyek, Yesus adya hweboknya beb, pama mekek youruwoka meka si demokaʾ anyek, sikja yok nim ek anaso unuwal aboka nekdo yibik.

¹⁷ Dara, mok soko en dam nimi, sikda Yesus ak nunja mok soko ek ab men lo binilam aboka molob einiwek.

¹⁸ Wera Yesus ara bununaʾ aboka, mek ekla bunaʾ lomok sam welewoka bul yanggok dara, bisaʾ gologomokaʾ anyek, hwemoknya bedya Yesus ak, nara neikaʾ bininam aboka molowok.

¹⁹ Bok Yesus adya dara, orok senewoka benyek an, ”Anja heikek biniboka, sikenek Wenelesilnya bedya anak hekaʾ nidyaʾ ununggelaʾ anyek hnon, alja anak angoo yadyek senewoka arawagelnya nenyek, anaso unuwanel aboka nekdo binilam!” hyok.

²⁰ Dara Yesus adya hwemoknya bera, Dekapolis sokok sam heik pik biniboka, nara anaso unuwoka hwebnel aboka, neklemok. Dara, nimi nidyaʾ alja wenyal yabok yuba keboka, sikda ganya loka dabsuk.

Yairus Bedya Gelma Eb Akleng Ak Bebegemok Gel Gemba Yuba

²¹ Dara onoʾ Yesus ara, saaboka bilimok pik mek gemek sam yok dara, wera anyagan ara, al dam nimi nauba longowoka, aknel ganagal yeilimek. Dara, alda mek gemek ubok salek,

²² heik enyek an Imik Neyung e damnya, alja si Yairus bera yeindeboka, Yesus ak okoka eibuk dara, koma lumugoka oumuwoka gibuk.

²³ Anya alja Yesus ak, ”Neyung o, nadyaʾ mek gelma era, hyak dubhin daknunaʾ aboka ulumlaʾ anasa, nadyaʾ ek yeiniboka, anya soruk al eilib dibmen enyek merewoka eikaʾ ulululaʾ aboka yalom,” wenyaboka yeiriwoka molowok.

²⁴ Dara Yesus ara yo aboka, Yairus beblaboka neikaʾ ek byik. Dara onoʾ nimi yok nanga nauba neik pik biniboka, nimi gong adya alak lelim-lelim al waraklemek.

²⁵ Dara anyaganara, gela hnon neik ek dangamookanya, gibnaʾ obadya lemok gel gek hnon ulumok.

²⁶ Wera ban gel genera, unulumoknya nenesa hwebnenokaʾ aboka, alja bonaʾ nidyaʾ hwenaʾ nang ek elegoka ulumok bok, alak ara hyak okoka hnon hwebnenggumek. Alda hwebnenyakaʾ aboka ulumna enyek, gel genyek an ulumok neiknaʾ era, sounuwoka nauba danggiga balamok.

²⁷ Alda Yesus ara, yokaʾ-yokaʾ nauba anaso unulamla an yuba kelemokaʾ adya, nimi hnoum ab weilik pik yeindiboka, Yesus adya boksom ek bebegel dal yok.

²⁸ Gel genedya ganya edya dara, ”Nara alja akleng ek mekaʾ soruk dem adya ok bebeganyaʾ anaba merewananunaʾ!” senewoka unuwok.

²⁹ Wera gel gera, wene sab-sab enyek, neik ek dangamokaʾ ara gobdo merewok. Dara gel genedyaʾ anaba, ”Nara an neiklamnaʾ anera, seleb gobdo mererowan,” senewok.

³⁰ Dara al neik salek enyek, Yesus adya alja migiba hnon goboka yabokaʾ ak eibdok. Dara, alda sam saaboka nimi hnoum, ”Heknedya nadya akleng ek ara, soruka bebeganel do?” aboka heibsuk.

³¹ Dara alja yuba doro diriga ban nang edya Yesus ak, ”Neyung, nimi nauba dukaʾ lolom-lolom alasakaʾ eiyilamjok, onoʾ anja dara, nadyaʾ akleng ek ara, heknedya bebegenel do aboka heilisilim,” wenhyek.

³² Bok Yesus adya alja aklenga bebegemoknya benyek, okoka eibnunaʾ aboka, anam kemero yabok.

³³ Dara gel gera, alak an unuwokaʾ ara ella ubdangoka, lok ganya boboka, ber-ber anaʾ nang penya, Yesus ak yeiniboka koma lumugoka hogung oumuwoka, alak nidyaʾ unumokaʾ ara laga nekok.

³⁴ Dara, Yesus adya gel genyek an, ”Nadya gelma o, anda nak dib senewanelemaʾ adya, wera hyak dibaʾ merewalem! Anda ganya daboka bimenekanya, or eikaʾ ululom!” hyok.

³⁵ Wera Yesus ara, anam yuba salamok sab-sab, Yairus bedyaʾ wa wel aran nang era yeiniboka, ”Neyung, anja gelma era seleb somogamlaʾ anasa, neksinya bek hnon lobaʾ nenenggom, mem,” hyek.

³⁶ Bok Yesus ara, nang danedya wenyal yabek yuba eiwaawom aboka, ”Yairus bek, lok ganya bonggom, mem. Anda dib senewanalamaʾ ok,” hyok.

³⁷ Dara Yesus ara, alda pikek bookanya, Petrus beb sik noungusuk Yakobus Yohanes nang danyek, nak ara yanamak bok, yok nanga salyaʾ dobol yangganenaʾ ara mem, hyok.

³⁸ Wera sikda Imik Neyung e damnya bedya ek lanal byik dara, Yesus ara, nimi nauba ngeboka engenaʾ glolomokaʾ ak eibuk.

³⁹ Dara Yesus ara ek wekoka anyagan nim ek, ”Ugunda hekasa yuba mandebnaʾ saboka, ngeboka engelelum do? Ban gelma enera, alda dibaʾ somoganggumla bok, alda hogung dem ok mamla,” hyok.

⁴⁰ Bok sikda Yesus ak lobaʾanya senewoka, alak okselemek. Dara, Yesus ara nimi danyek bululum aboka yaksuukanya, alda gelma en aljaʾ neyung genong ab, alab neikaʾ bilimek nim eb, gelma enedya man ek wekek.

⁴¹ Wera Yesus adya gelma enedya soruka glib salawoka, ”Talita kum,” hyok. Nunja yub edya dara, ”Gelma enya o, nara anak buklom, hegen!” hyok.

⁴² Dara gelma era, al wene sab-sab enyek, sekdo dorogoka yabok. Alja gibnaʾ ara seleb obadya lemok. Wera ban unuwokaʾ eibek nim era, hyak nauba loka daboka ingmuna bere bukek.

⁴³ Dara Yesus adya nim ek ban unu hwebnaʾ ara, ugunja dara, nimi yok nim ek ara, anaso unuwal aboka, nekdo yabanaʾ ara, hyak mem aboka yuba garawok. Anya lebokja, ”Ban gelma enera, denaʾ men elegolulum,” hyok.