MARKUS 15 - PERJANJIAN BARU NALCA YUBA

Yesus Ara Pilatus Bek Bo Byik Yuba

¹ Hyak lugunaʾ nong dara, yuba wa gakaʾ dub nang eb, Yahudi dub nang eb, yuba neksin nang eb, yuba yana lelesin nanga nidyaʾ, ban nang dara, unuwanamab aboka yuba seleb sabek. Dara, sikda Yesus ak henga geregoka bo balameknya nera, Pilatus bek bo elegel byik.

² Dara Pilatus bera Yesus ak, ”Anda Yahudi nimi dubnya ululam de?” wenyaboka heibuk. Wenyek Yesus ara, ”Alan, anja leblam an,” hyok.

³ Wenyek yuba wa gakaʾ dub nang era, alak sondaʾ amba malya unulamla aboka, yokaʾ-yokaʾ nauba yana kiboka lelemek.

⁴ Anasa Pilatus bera Yesus ak hnon, ”Anak yokaʾ-yokaʾ nauba yana kiboka lelenjaknya nera eiyilam de? Anasa anda, nera aldib, nera orok, aro lebnenggunusom de?” aboka heibuk.

⁵ Bok Yesus ara, anam hyak mekaʾ yuba doro sanaʾ orok anasa, Pilatus beneba alda hekasa do senewok.

Yesus Ara Gal Ak Oboka Glabnemab Hyek Yuba

⁶ Wera Yahudi nim edya perob sum yenewana dara, nimi nauba yok nim edya yuba saboka, benyek henga lobnesilim aboka molowan dara, henga geregoka beiyimna nang era lobol lolosuk. Dara ban anaso ununanya nera, sobaʾ unulusuk.

⁷ Wera ban salek era, nimi heika doluwoka oldalamek sum enyek, nim omekaʾ anasa, be hnonda Barabas beb, onoʾ yok nang eb henga geregoka beiyimek.

⁸ Anasa nimi nauba longol yeiniboka, unulusilimaʾ sunuwoka, be hnon nunsamba henga lob lobsilom aboka molowek.

^9-10 Yuba wa gakaʾ dub nang danera, hman ganya boboka, Yesus ara doboka elegel bilimekaʾ ella umokaʾ anasa, Pilatus bedya nimi nauba longomek nim ek, ”Wera Yahudi dubnya benyek, ugunsamba henga lob lobnesin de?” wenyaboka heibsuk.

¹¹ Bok yuba wa gakaʾ dub nang era, yok nim ek wenewoka Pilatus bek nunsamba dara, Barabas benyek henga lob lobnelam henelum aboka orugeisik.

¹² Wenyek Pilatus bera nimi nauba longomek nim ek, ”Ugunja Barabas benyek, nunsamba henga lob lobsilom hulum dara, Yahudi nimi dubnya alalumnya bek dara, hekaʾ hubnamna do?” aboka heibsuk.

¹³ Dara sikda, ”Alda bera, oboka gal ak glabnok,” aboka yeiriwoka lelemek.

¹⁴ Wenyek Pilatus bera sikenek, ”Bok alda hekaʾ ak meknewok do?” aboka heibsuk. Bok nimi nauba longomek nim era, ”Alda bera, oboka gal ak glabnok,” aboka onoʾ nauba yeiriwoka lelemek.

¹⁵ Anasa, Pilatus bera nimi ganya hekiyiwosunun senewoka, alda Barabas benyek siksamba henga lob lobsuk. Bok Yesus bek dara, legebnaʾ adya legeb-legeba obeekanya, oboka gal ak glabnelum aboka doboka elegousuk.

Yin Bon Nang Edya Yesus Ak Derelemek Yuba

¹⁶ Dara Yesus ara yin bonaʾ nang edya doboka bo balameknya nera, mok soko dubnya bedyaʾ ek bo byik. Anya, yin bonaʾ nanga nidyaʾ ara, mamaganalum aboka wenyabdangamek.

¹⁷ Dara, sikja Yesus ak mouk dok bokaʾ akleng ongoyiwoka, gal si henga gwanewoka Yesus adya huk ak gwaragiyiwek.

¹⁸ Anya, sikda Yesus ak nauba sondaʾ amba giboka lelemekaʾ ara, ”Yahudi nimi dubnya o, perob aboka gibjab,” alamek.

¹⁹ Sikda Yesus adyaʾ huk ak gamaʾ adya saboka oboka, gamalaʾ nauba solob gouluwoka, onoʾ sene alak nauba oumuwoka giblemek.

²⁰ Wera nauba sene seleb wenyabgogowek dara, mouk dok bokaʾ akleng ongiyimekaʾ ara gwiriwoka, aljaʾ yokaʾ akleng ongiyiwek. Dara wera, oboka glabnobaʾ aboka, doboka bo gobek.

Yesus Ara Oboka Glabek Yuba

²¹ Wera obnobaʾ aboka pikek bo bek dara, nimi be hnon, Aleksander beb, Ufus beb dadya sikjaʾ neyung, Kirene mokek abnya, Simon benyek, mek heikek abaʾ ara nauba heikek yanggokaʾ anyek, dukaʾ lolowoka, Yesus ak oboka glabnemek gal ek bobnelam aboka orugek.

²² Dara, Yesus ara bo balameknya nera, mok soko meina, si ara Golgota, nunja yub edya dara, ”Huk yanggol mein,” alamekaʾ ak sam bo byik.

²³ Wera anyagan bo byikek ab dara, anggur mek ab, sik mek ab meemekaʾ anyek, Yesus ak elegek bok, dogom hyok.

²⁴ Anya Yesus ara oboka gal ak seleb glabek. Dara, alja aklenga gwiriwoka domekaʾ anyek, heknyek dobnamla do aboka, yina bomdewoka ulumek.

²⁵ Yesus ara lugunaʾ henga ikil yalamla jam sembilan anyek, oboka gal ak glabek.

²⁶ Dara, anasa omab anaʾ dibaʾ ara, ”Yahudi dubnya an e,” aboka momnya doboka elegek.

²⁷ Wera Yesus oboka glabekaʾ ak ara, yu hwam nang, nimi penya oboka neikaʾ glabsik. Dara, be hnonda sirikek sam, onoʾ yoknya bera waneng ek sam uboka glabek.

²⁸ Ban unuweknya nera, yuba bukuk sam men lero momnya dobokaʾ ara, ”Alda hiboka malya unaʾ nim aboka einiwanamak,” hyoknya nenyek gigiwolulaʾ aboka ubek.

²⁹ Dara Yesus oboka glabamek pik an yaban nim edya, huka gwakdewoka, derewoka walamekaʾ ara, ”Anda Imik Neyung e golowoka beibnyekanya, nadya dara, lika winilyok sobnamna alalumnya o,

³⁰ anda oboka glabanjak gal ak anyeb, merero beiyiboka sokok yinggimenekanya blebdalom!” wenyaboka walamek.

³¹ Anasonya nera, onoʾ yuba wa gakaʾ dub nang eb, yuba neksin nang eb danaba, Yesus ak nauba derewoka walamek. Anya sik moumen, ”Nimi yok nim era nauba merellilisuk bok, al damnya dara, merebdamenggom!

³² Alda Israeli nimi dubnya, nimi blebsinaʾ dubnya bera, nunda alak eiyiboka dib senewanamab anasa, glabnaʾ gal ak abaʾ ara, sokok yinggulul,” aboka derelemek. Anya onoʾ ban penya oboka glasik nang edyaʾ anaba, alak derewoka walerek.

Yesus Ara Somogok Yuba

³³ Dara yubyek dukdukanek jam duabelas soʾ enyek, mok soko nidyaʾ ara inibmorumokaʾ ara, jam tiga anaso sinik dok.

³⁴ Wera ban salek era, Yesus ara naubaʾ bii aboka, ”Eloi, Eloi, lama sabakhtani?” wenyaboka bii alamok. Nunja yub edya dara, ”Nadyaʾ Imik Neyung o, nadyaʾ Imik Neyung o, anda hekasa nak lo yibinelem do?” alamok.

³⁵ Dara anyagan hnon seklemek nim edya, Yesus adya an wenyaboka lel yabokaʾ anyek kebek dara, ”Wera alda Elia be youblamlaʾ anyek keblulum!” hyek.

³⁶ Wenyek nimi be hnon yeiriwoka, gal esaʾ do yeindeboka, yu anggur mek ek hwiboka, gal benggenaʾ ak lomowoka, Yesus adyaʾ sik enegel yabookanya, ”Elia bedya yeiniboka blebnamla gom, orokaʾ ara eibnemab anasa, or loboka diri ubnemab,” aboka lebok.

³⁷ Dara, Yesus ara ebngalagoka lelemokaʾ ara, dubhina dakoka somogok.

³⁸ Ban salek era, Imik Neyung e lomok sam wiknelemek boksom akleng era, imik ab ara, sokok sam nidyaʾ gweldegok.

³⁹ Dara, yin bonaʾ dubnya anyagan we seklemokaʾ ara, Yesus ara an unura somogokaʾ ak okoka eibuk dara, alja lebokaʾ ara, ”Aldib, ban benera alda Imik Neyung bedya me ulumo!” wenyaboka lebok.

⁴⁰ Dra ono al neikek ara, gelewa wene nim mok ab sekoka, nidyaʾ an unulumokaʾ ara kemelemek. Wera gelewa gong dara, hnonda Maria Magdalena, hnonda mek Yakobus, Yoses eilin Maria, hnonda Salome ge hnon ulumek.

⁴¹ Yesus ara Galilea sokok anam ulumok dara, sikda Yesus ab neikaʾ ulumeekanya, aralamek gelewa. Dara onoʾ anyaganara, Yesus ab neikaʾ Yerusalem heikek ab yeilimek gelewa gong, yok nimi hnoum ulumek.

Yesus Ara Beʾ Dakoka Dibek Yuba

⁴² Dara mok soko ara, seleb sin dangoka iniwonunaʾ ubuk salek, anya ban sum era, mem sum gibnemab senewoka memero ulumek sum.

⁴³ Wera anasa, Arematea mok ebnya, Yusuf bera, alda yuba yana lelesin nang wa wenya perobnya ulumookanya, Imik Neyung adya wenelemnesilaʾ ara, eibnunaʾ aboka diri ulumok. Dara, alda asaʾ ganya boboka Pilatus bek, Yesus adya beʾ dakoka dibnamna aboka molol byuk.

⁴⁴ Wera Pilatus bera Yesus ara seleb somogamla an yuba kebok dara, loka dabok. Anasa, Pilatus bera yin bonaʾ dubnya bek yalom aboka, Yesus ara seleb somogamla gom aboka heibuk.

⁴⁵ Dara, Pilatus bera yin bonaʾ dubnya bedya Yesus ara aldib seleb somogamla hyokaʾ ak kebok dara, Yusuf bek, ”Yesus adya beʾ era, or dakoka dibnelam,” hyok.

⁴⁶ Dara, Yusuf bera nimi keboka dilin boksoma perobaʾ anyek dekok dara, Yesus adya beʾ dakoka nimi ken akleng edya kebok. Dara, Yesus nong ara keboka mok soko mein lomok girika hokomekaʾ ak sam doronggoka dibuk. Seleb dibuk dara, girik adya demegoka pika leboka seregok.

⁴⁷ Ban unu dililemek salek era, Maria Magdalena geb, Yoses eilin Maria geb dara, anyagan dibukaʾ ak ara eibdek.